།དཔེར་ན་ཐགས་བཅས་པ་ཇི་ཙམ་བཏགས་པ་དེ་ཙམ་དུ་བཏག་པར་བྱ་བ་རྟིང་ལ་ཐུག་པར་འགྱུར་རོ། །དེ་བཞིན་དུ་སྲོག་ཀྱང་བཏག་པར་བྱ་བ་རྟིང་ལ་ཐུག་པ་ལྟ་བུ་ཡིན་ནོ། །དཔེར་ན་གསད་པར་ཁྲིད་པའི་ཕྱུགས་ནི་གོམ་རེ་བོར་ཞིང་གསད་པ་ལ་ཉེ་བ་ཡིན་ནོ། །དེ་བཞིན་དུ་ཚེ་ཡང་གསད་པའི་ཕྱུགས་ལྟ་བུ་ཡིན་ནོ། །དཔེར་ན་གསད་པར་ཁྲིད་པའི་མི་ནི་གོམ་རེ་བོར་ཞིང་གསད་པ་ལ་ཉེ་བ་ཡིན་ནོ། །དེ་བཞིན་དུ་ཚེ་ཡང་གསད་པའི་མི་ལྟ་བུ་ཡིན་ནོ། །དཔེར་ན་ཤའི་ཁམ་ཚད་ཅིག་ཟངས་ཆུ་མང་པོའི་ནང་དུ་བཅུག་སྟེ་འོག་ནས་མེ་སྦར་ན་མྱུར་དུ་གོར་བར་འགྱུར་ཞིང་རིང་པོར་མི་གནས་སོ། །དེ་བཞིན་དུ་ཚེ་ཡང་ཤའི་ཁམ་ཚད་ལྟ་བུ་ཡིན་ནོ།། །།འདུལ་བ་གཞི། བམ་པོ་ལྔ་བཅུ་པ། དཔེར་ན་རི་ལས་འབབ་པའི་ཆུ་བོ་གཏིང་ཟབ་པ། ཤུགས་དྲག་པ། ཐག་རིང་པོར་འབབ་པ་ཤིང་རྩི་དེད་པར་བྱེད་པ་ནི་ཉིན་ཞག་དེ་དག་འདས་ཤིང་སྐད་ཅིག་དང་། ཐང་ཅིག་དང་། ཡུད་ཙམ་དེ་དག་འདས་ན་ཆུའི་གནས་པ་དང་འཇིག་པ་མི་མངོན་ནོ། །དེ་བཞིན་དུ་མི་རྣམས་ཀྱི་ཚེ་ཡང་ཆུ་བོའི་རྒྱུན་ལྟ་བུ་སྟེ། རིང་པོར་མི་ཐོགས་པ། ཉོན་མོངས་པ་ཡིན་ལ་དེ་ཡང་སྡུག་བསྔལ་དང་ལྡན་ནོ། །བྲམ་ཟེའི་ཁྱེའུ་དག་བདག་ནི་བྱམས་པ་དང་ལྡན་པ་ཞེས་བྱ་བ་ནས། རྒྱས་པར་སྙིང་རྗེ་དང་། དགའ་བ་དང་། བཏང་སྙོམས་དང་ལྡན་པའི་སེམས་ཞེས་བྱ་བ་ནས་གནས་སོ་ཞེས་བྱ་བའི་བར་དུའོ། །བྲམ་ཟེའི་ཁྱེའུ་དག་ཚུར་ཁྱེད་ཀྱིས་ཀྱང་བྱམས་པ་དང་ལྡན་པའི་སེམས་དང་། སྙིང་རྗེ་དང་། དགའ་བ་དང་། བཏང་སྙོམས་དང་ལྡན་པའི་སེམས་ཀྱི་བར་གྱིས་གནས་པར་གྱིས་ཤིག །རྒྱལ་པོ་ཆེན་པོ་སྟོན་པ་རྩིབས་ཀྱི་མུ་ཁྱུད་དེ་དེ་ཙམ་དུ་ཚེ་རིང་། དེ་ཙམ་དུ་རིང་དུ་གནས། དེ་ཙམ་གྱིས་ཚེའི་མཐར་ཐུག་པ་ཡང་རེ་ཞིག་དགེ་སློང་དག་ལ་མི་རྣམས་ནི་ཚེ་ཐུང་བ། རིང་པོར་མི་ཐོགས་པ། ཉོན་མོངས་པ་ཡིན་ལ། དེ་ཡང་སྡུག་བསྔལ་དང་ལྡན་ནོ་ཞེས་བྱ་བ་དེ་ལྟ་བུའི་ཆོས་སྟོན་ཏོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། དེའི་ཚེ་དེའི་དུས་ན་སྟོན་པ་རྩིབས་ཀྱི་མུ་ཁྱུད་ཅེས་བྱ་བར་གྱུར་པ་དེ་གཞན་ཞིག་ཡིན་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ།