སྟོན་པ་ལྐུགས་འཕྱེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །སྟོན་པ་ལྐུགས་འཕྱེས་བྲམ་ཟེའི་ཁྱེའུ་དེ་རྣམས་ཀྱི་བསམ་པ་དང་། བག་ལ་ཉལ་དང་ཁམས་དང་། རང་བཞིན་ཤེས་ནས། ཇི་ལྟར་བྲམ་ཟེའི་ཁྱེའུ་ལྔ་བརྒྱ་པོ་དེ་དག་གིས་མངོན་པར་ཤེས་པ་ལྔ་མངོན་སུམ་དུ་བྱས་པ་དེ་ལྟ་བུའི་ཆོས་བཤད་པ་བྱས་སོ། །རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྟོན་པ་ལྐུགས་འཕྱེ་གང་ཡིན་པ་དེ་ནི་ང་ཉིད་ཡིན་ནོ། །རྒྱལ་པོ་ཆེན་པོ་ངས་སེམས་ཅན་ལ་ཕན་པ་བྱས་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་བྱང་ཆུབ་སེམས་དཔའི་སྤྱོད་པས་སེམས་ཅན་ལ་ཕན་པ་བྱས་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བའི་མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པར་གྱུར་ཏོ། །མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ན་འཛམ་བུའི་གླིང་འདི་ཉིད་འབྱོར་པར་གྱུར་ཅིང་ཞེས་བྱ་བ་རྒྱས་པར་ཇི་སྐད་ཆོས་ལྡན་གྱི་མདོ་ལས་འབྱུང་བ་ལྟ་བུའོ། །ཇི་ཙམ་ན་མི་ཚེ་ལོ་བརྒྱད་ཁྲི་ཐུབ་པ་རྣམས་ལ་ལུས་ཀྱི་གནོད་པ་འདི་ལྟ་བུ་བྱུང་སྟེ། འདི་ལྟ་སྟེ་གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། འདོད་པ་དང་། ཟ་བ་དང་རྒ་བའོ། །མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ན་རྒྱལ་པོ་བྱེད་ལྡན་ཞེས་བྱ་བ་བྱུང་སྟེ། རྒྱལ་པོ་བྱེད་ལྡན་གྱི་སྐྱེད་མོས་ཚལ་གྱི་གནས་ན་ཤིང་ནྱ་གྲོ་དྷའི་རྒྱལ་པོ་ཤིན་ཏུ་རབ་གནས་ཞེས་བྱ་བ་ཞིག་ཡོད་དོ། །ནྱ་གྲོ་དྷའི་རྒྱལ་པོ་ཤིན་ཏུ་རབ་གནས་ཀྱི་དྲུང་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ་རྩིབས་ཀྱི་མུ་ཁྱུད་ཅེས་བྱ་བ་བྲམ་ཟེའི་ཁྱེའུ་ལྔ་བརྒྱ་ཙམ་ལ་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་གོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུ་རྩིབས་ཀྱི་མུ་ཁྱུད་གཅིག་པུ་དབེན་པར་སོང་ནས་སེམས་ལ་སེམས་ཀྱི་རྟོག་པ་འདི་ལྟ་བུ་སྐྱེས་ཏེ།