མ་ཤི་བར་དེ་དག་གིས་ངང་པའི་སྡེ་དཔོན་དེ་ཁྱེར་ནས་རྒྱལ་པོའི་དྲུང་དུ་སོང་ངོ་། །ཅིག་ཤོས་དེ་ཡང་མ་བཟུང་བཞིན་དུ་ཆགས་པའི་རྙིས་བཅིངས་པས་རང་ཉིད་སོང་ངོ་། །ངང་པའི་སྡེ་དཔོན་རྒྱལ་པོ་ལ་ཕུལ་བ་དང་། རྒྱལ་པོས་སྨྲས་པ། ཤེས་ལྡན་དག་ཅིག་ཤོས་འདི་ཅི་སྟེ་ཁྱེར་ཏེ་འོངས། དེ་རྣམས་ཀྱིས་སྨྲས་པ། ལྷ་བདག་ཅག་གིས་ནི་འདི་མ་བཟུང་ན་འོན་ཀྱང་རང་ཉིད་མཆིས་ལགས་སོ། །རྒྱལ་པོ་མཆོག་ཏུ་ངོ་མཚར་དུ་གྱུར་ཏེ་དད་པ་ཆེན་པོ་སྐྱེས་སོ། །དེ་ནས་རྒྱལ་པོས་ངང་པའི་སྡེ་དཔོན་སེང་གེའི་ཁྲིའི་སྟེང་དུ་བཞག་གོ། །དེ་ནས་ངང་པའི་སྡེ་དཔོན་གྱིས་མིའི་སྐད་ཀྱིས་གང་ཐོས་ནས་རྒྱལ་པོ་འཁོར་དང་བཅས་པ་དགེ་བ་བཅུའི་ལས་ཀྱི་ལམ་ལ་བཀོད་པ་དེ་ལྟ་བུའི་ཆོས་བཤད་པར་བྱས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་བཱ་རཱ་ཎ་སཱིའི་གྲོང་ཁྱེར་དུ་དྲིལ་སྒྲོགས་སུ་ཆུག་ལ། ངའི་ཡུལ་ན་ཆུ་ན་རྒྱུ་བའི་སྲོག་ཆགས་རྣམས་སུས་ཀྱང་མ་བསད་ཅིག །དེ་རྣམས་ཀྱིས་དྲིལ་སྒྲོགས་སུ་བཅུག་ནས་སུ་ཡང་ཆུ་ན་རྒྱུ་བའི་སྲོག་ཆགས་མ་གསོད་ཅིག །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་ངང་པའི་སྡེ་དཔོན་བཞིན་རྒྱས་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ངས་སེམས་ཅན་དེ་སྙེད་ལ་ཕན་པ་བྱས་སོ། །རྒྱལ་པོ་ཆེན་པོ་ངས་སེམས་ཅན་ལ་ཕན་པ་བྱས་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངས་སེམས་ཅན་ལ་ཕན་པ་བྱས་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སེམས་ཅན་ལ་ཕན་པ་བྱས་ཏེ་དགེ་བ་ལ་བཙུད་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་སྟོན་པ་མིག་མཛེས་ཞེས་བྱ་བ་ཕྱི་རོལ་པའི་མུ་སྟེགས་རྫུ་འཕྲུལ་དང་ལྡན་པ་འདོད་པ་རྣམས་ལས་འདོད་ཆགས་དང་བྲལ་བ་ཞིག་བྱུང་སྟེ། སྟོན་པ་མིག་མཛེས་ཀྱི་ཉན་ཐོས་བརྒྱ་ཕྲག་དུ་མ་དང་།