བརླང་བ་ཞིག་པས་རྒྱུན་ཁོ་ནར་ངང་པ་རྣམས་ལ་སྡིགས་པར་བྱེད་དེ། ཁ་ཅིག་ལ་སྒྲོ་འབྱིན། ཁ་ཅིག་ལ་ནི་སྡེར་མོས་རྨ་འབྱིན་ཏེ། དེ་ལྟ་བུ་དང་། གནོད་པ་གཞན་ཡང་བརྒྱ་ཕྲག་དག་བྱས་ནས་ངང་པ་རྣམས་ངང་པའི་སྡེ་དཔོན་ཡུལ་འཁོར་སྐྱོང་གི་དྲུང་དུ་སོང་ནས་ཉི་མ་རེ་རེ་ཞིང་ཡང་གོ་བར་བྱེད་པ་དང་། དེས་བསམས་པ། གང་བ་ནི་གཏུམ་པ། གཟུ་ལུམས་ཅན། བརླང་བ་ཡིན་ཏེ། གལ་ཏེ་འདི་རྒྱལ་ཚབ་ཏུ་བཅུག་ན་བདག་འདས་པ་དང་འདིས་ངང་པའི་ཁྱུ་བཤིག་པར་འགྱུར་གྱིས་དེ་ལ་ཐབས་ཞིག་བཤམ་པར་བྱའོ་སྙམ་ནས། དེས་གང་བ་དང་། བཞིན་རྒྱས་གཉིག་བཀུག་སྟེ་སྨྲས་པ། འབབ་ཆུའི་དངོ་དང་། མཚོ་དང་། མཚེའུ་རྣམས་བལྟས་ཏེ་ངའི་དྲུང་དུ་ཐོག་མར་སུ་འོངས་པ་དེ་ངས་ངང་པ་རྣམས་ཀྱི་སྡེ་དཔོན་དུ་གཞུག་གོ། །དེ་གཉིས་ཕན་ཚུན་འགྲན་པས་འཁོར་ལྔ་བརྒྱ་ལྔ་བརྒྱ་དང་དོང་བ་ལས་དེ་གཉིས་ཀྱིས་འབབ་ཆུའི་དངོ་དང་། མཚོ་དང་། མཚེའུ་རྣམས་ཕན་ཚུན་དུ་བལྟས་ནས་དེ་གཉིས་རིམ་གྱིས་བཱ་རཱ་ཎ་སཱིའི་གྲོང་ཁྱེར་དུ་ཕྱིན་ཏོ། །དེའི་ཚེ་བཱ་རཱ་ཎ་སཱིའི་གྲོང་ཁྱེར་ན་རྒྱལ་པོ་ཚངས་སྦྱིན་ཞེས་བྱ་བ་རྒྱལ་སྲིད་བྱེད་དེ། འབྱོར་པ་དང་། རྒྱས་པ་དང་ཞེས་བྱ་བ་ནས་སྐྱེ་བོ་དང་མི་མང་པོས་རབ་ཏུ་གང་བ་ཞེས་བྱ་བའི་བར་དུ་སྟེ། བཱ་རཱ་ཎ་སཱིའི་སྐྱེད་མོས་ཚལ་ན་དེའི་རྫིང་ཚངས་ལྡན་ཞེས་བྱ་བ་མཚོ་བས་ཁྱད་པར་དུ་འཕགས་པར་ཟབ་པ་ཞིག་ཡོད་དེ། དེ་ལས་ཆུ་ལས་སྐྱེས་པའི་མེ་ཏོག་རྣམ་པ་སྣ་ཚོགས་བསྐྱེད་ཅིང་ཕྱོགས་བཞི་འཁོར་བར་ཡང་མེ་ཏོག་དང་འབྲས་བུའི་ཤིང་སྟོང་ཕྲག་དུ་མ་དག་བསྐྲུན་ནས། དེ་ཨུཏྤ ལ་དང་། པད་མ་དང་། ཀུ་མུ་ད་དང་། པད་མ་དཀར་པོས་ཁེབས་ལ་ཤིང་རྣམ་པ་དུ་མས་སྟུག་པོར་བརྒྱན་ནས་བྱ་རྣམ་པ་མང་པོ་དག་སྐད་འབྱིན་ཏོ། །དེའི་འབྱོར་པ་དེ་མཐོང་ནས་གང་བ་ངང་པ་ལྔ་བརྒྱས་ཡོངས་སུ་བསྐོར་ཏེ་བབས་ནས་ཅི་དགར་རྒྱུ་ཞིང་དེས་རྩེ་བར་བརྩམས་སོ། །བཞིན་རྒྱས་ལ་ཡང་རང་གི་ཁྱུས་སྨྲས་པ། ཁྱོད་ཀྱང་བོབས་ལ་རྩེད་མོ་མཛོད། དེས་སྨྲས་པ། རེ་ཞིག་རྒྱལ་སྲིད་ཇེ་བླངས་ལ། དེ་ནས་ཕྱིས་འོངས་ཏེ་རྩེ་བར་བྱའོ། །ཞེས་དེས་མྱུར་བ་མྱུར་བར་སོང་ནས་རྒྱལ་སྲིད་བླངས་ཏེ།