བརྩོན་འགྲུས་དྲག་པོས་མངོན་པར་ཤེས་པ་ལྔ་མངོན་སུམ་དུ་བྱས་སོ། །དེ་ནས་དུས་གཞན་ཞིག་ན་དྲང་སྲོང་དེ་དུས་ཀྱི་ཆོས་དང་ལྡན་པར་གྱུར་ནས་གཞོན་ནུ་ལྐུགས་འཕྱེས་དྲང་སྲོང་དེའི་རོ་དྲི་སྣ་ཚོགས་ཀྱི་ཤིང་ཕུང་པོར་སྤུངས་ནས། བསྲེགས་ཏེ་མཆོད་པ་དང་བཀུར་སྟི་ཆེར་བྱས་སོ། །གཞོན་ནུ་ལྐུགས་འཕྱེས་བྲམ་ཟེའི་ཁྱེའུ་ལྔ་བརྒྱ་པོ་དེ་རྣམས་ལ་གདམས་ངག་བྱིན་ནས། དེ་རྣམས་ཀྱིས་འབད་པ་དང་། བརྩལ་བ་དང་། བརྩོན་འགྲུས་དྲག་པོས་མངོན་པར་ཤེས་པ་ལྔ་མངོན་སུམ་དུ་བྱས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་གཞོན་ནུ་ལྐུགས་འཕྱེ་རྒྱལ་སྲིད་ལག་མཐིལ་དུ་འོངས་པ་ཡོངས་སུ་སྤངས་ཏེ། བྲམ་ཟེའི་ཁྱེའུ་ལྔ་བརྒྱ་དང་མངོན་པར་ཤེས་པ་ལྔ་མངོན་སུམ་དུ་བྱས་པ་གང་ཡིན་པ་དེ་ནི་ང་ཉིད་ཡིན་ནོ། །རྒྱལ་པོ་ཆེན་པོ་ངས་སེམས་ཅན་ཐམས་ཅད་ལ་ཕན་པ་བྱས་པ་དང་། རྒྱལ་སྲིད་སྤངས་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངས་སེམས་ཅན་ལ་ཕན་པ་བྱས་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་རི་དགས་དང་བྱའི་ཚོགས་མེའི་འཇིགས་པ་ལས་ཐར་པར་བྱས་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་ནགས་ཚལ་སྟུག་པོ་རི་དང་ཆུ་དང་། རྩྭ་སྔོན་པོ་དང་། གེལ་པ་དང་། ཤིང་སཱ་ལ་དང་པ་ལ་ཤ་རྣམས་ཀྱིས་མཛེས་པར་བྱས་པ་ཞིག་གི་ཚལ་གསེབ་ན་བྱའི་ཚོགས་ཆེན་པོ་ཞིག་གནས་སོ། །ཚལ་སྟུག་པོ་དེ་ན་ཡང་ཤིང་གཉིས་ཕན་ཚུན་འདྲུད་པས་མེ་བྱུང་བར་གྱུར་ཏོ། །དེ་ན་བྱའི་ཚོགས་གང་དག་འཕུར་ནུས་པ་དེ་དག་ནི་དོང་ངོ་། །འཕུར་མི་ནུས་པ་གང་ཡིན་པ་དང་། སྒོ་ང་རྣམས་ནི་དེ་ཉིད་དུ་བོར་རོ། །དེའི་ཚེ་བྱང་ཆུབ་སེམས་དཔའ་སྲེག་པ་ཞིག་ཏུ་སྐྱེས་སོ། །བྱང་ཆུབ་སེམས་དཔས་མེ་ཆེན་པོ་སྲེག་ཅིང་རྒྱང་རིང་པོ་ཁོ་ན་ནས་འོང་བ་མཐོང་ངོ་། །མཐོང་ནས་ཀྱང་དེ་སེམས་ཅན་དེ་རྣམས་ལ་སྙིང་བརྩེ་བ་ཆེན་པོ་སྐྱེས་སོ།