འདི་ནི་མདའ་ཡིས་བསྣུན་པར་གྱུར། །དེ་ནས་དེའི་ཕ་མ་དག་སྙིང་རྗེ་རྗེ་སྐད་དུ་སྨྲེ་ཞིང་བདེན་པས་གསོལ་བ་བྱེད་པ། བུ་ཁྱོད་ཀྱིས་ནི་ཕ་མ་ལ། །བསྙེན་བཀུར་ལྷ་ལ་མེ་ཡི་ནི། །སྦྱིན་སྲེག་བྱས་པའི་བདེན་པ་གང་། །དེས་ནི་དུག་ཀྱང་ཞི་བར་ཤོག །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་གནས་གཡོས་པར་གྱུར་ནས་དེས་གཡོས་པ་འདི་ཅི་ལས་གྱུར་ཅེས་བརྟགས་ན། བསྐལ་པ་བཟང་པོའི་བྱང་ཆུབ་སེམས་དཔའ་གནད་དུ་མདས་ཕོག་སྟེ་དུག་གིས་གློངས་པས་སྡུག་བསྔལ་བར་གྱུར་བ་མཐོང་ངོ་། །དེ་ནས་གནས་ནས་བབས་ནས་བདུད་རྩིས་བཏབ་སྟེ་ཕ་མའི་བདེན་པའི་ཚིག་གང་ཡིན་པ་དང་། ལྷ་རྣམས་ཀྱི་དབང་པོའི་མཐུ་གང་ཡིན་པ་དང་ཟུག་རྔུ་ཕྱུང་བ་གང་ཡིན་པ་དེས་རྨ་ཡང་རུབ་དུག་གི་ཤུགས་དེ་ཡང་ཞི་ནས་ལྗང་གུ་སྡུག་བསྔལ་དེ་ལས་ཡོངས་སུ་ཐར་ནས་ཡུན་རིང་པོར་ཕ་དང་མ་གཉིས་ལ་བསྙེན་བཀུར་བྱས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ན་ལྗང་གུ་ཞེས་བྱ་བར་གྱུར་པ་གང་ཡིན་པ་དེ་ང་ཉིད་ཡིན་ཏེ། རྒྱལ་པོ་ཆེན་པོ་ངས་ཕ་མ་གཉིས་ལ་བསྙེན་བཀུར་བྱས་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ།། །།འདུལ་བ་གཞི། བམ་པོ་བཞི་བཅུ་རྩ་དགུ་པ། རྒྱལ་པོ་ཆེན་པོ་གཞན་ཡང་ངས་སེམས་ཅན་ལ་ཕན་པ་བྱས་པ་དེ་ཉོན་ཅིག །འཇིག་རྟེན་ཆོས་ཀྱི་འདུ་ཤེས་ཀྱིས་ཕ་མ་དག་སྨྱུང་བ་ལ་འཇོག་པར་བྱེད། མེར་འཇུག་པ་དང་། ཆུར་འཇུག་པར་བྱེད་པ་དམ་པ་མ་ཡིན་པའི་ཆོས་དེ་ངས་ཐམས་ཅད་ཀྱི་ཐམས་ཅད་དུ་བཅད་དོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་པའི་ཕྱིར་ཉན་ཐོས་དུ་མ་མངོན་པར་ཤེས་པ་ལྔ་ལ་བཀོད་པ་གང་ཡིན་པ་དེ་ཉོན་ཅིག