འཇིག་རྟེན་ལོང་བ་འདྲེན་པ་མེད་པ་ཡོངས་སུ་འདྲེན་པ་མེད་པར་སེམས་ཅན་མ་རྒལ་བ་རྣམས་སྒྲོལ་བ་དང་མ་གྲོལ་བ་རྣམས་དགྲོལ་བ་དང་དབུགས་མ་ཕྱིན་པ་རྣམས་དབུགས་འབྱིན་པ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་ཟློ་བའི་སངས་རྒྱས་སུ་འགྱུར་བར་བྱའོ། །དེ་ནས་དྲང་སྲོང་དེས་ཚིག་འདི་ཐོས་ནས་རི་བོང་ལ་སྨྲས་པ། གང་གི་ཚེ་ཁྱེད་སངས་རྒྱས་སུ་གྱུར་པ་དེའི་ཚེ་བདག་ལ་ཡང་དགོངས་ཤིག །རི་བོང་གིས་སྨྲས་པ་དེ་བཞིན་དུ་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ན་རི་བོང་དུ་གྱུར་པ་གང་ཡིན་པ་དེ་ནི་ང་ཉིད་དེའི་ཚེ་དེའི་དུས་ན་རི་བོང་དེར་གྱུར་ཏེ། རྒྱལ་པོ་ཆེན་པོ་དེ་ན་ངས་བྱ་དཀའ་བ་བདག་ཉིད་ཡོངས་སུ་བཏང་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་དེ་ལྟར་མི་བལྟ་སྟེ། འོན་ཀྱང་ངའི་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་རྐྱེན་ཙམ་དང་ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་ཕ་དང་མ་ལོང་བ་ཕྲག་པས་ཁྱེར་བ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་བཱ་རཱ་ཎ་སཱིའི་གྲོང་ཁྱེར་དུ་རྒྱལ་པོ་ཚངས་སྦྱིན་ཞེས་བྱ་བ་རྒྱལ་སྲིད་བྱེད་དེ། འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ་འཐབ་པ་དང་། ཐབ་མོ་དང་། ཁྲག་ཁྲུག་དང་། འགྱེད་པ་དང་། ཆོམ་རྐུན་མེད་ཅིང་ནད་རབ་ཏུ་ཞི་བར་གྱུར་པ། འབྲས་དང་། བུ་རམ་ཤིང་དང་། བ་ལང་དང་། མ་ཧེ་ཕུན་སུམ་ཚོགས་པ་ལ་ཆོས་ཀྱི་རྒྱལ་པོ་ཆོས་དང་ལྡན་པ་ཆོས་བཞིན་གྱིས་རྒྱལ་སྲིད་བྱེད་དོ། །དེའི་མདུན་ན་འདོན་གྱི་བྲམ་ཟེ་དེའི་བུ་ལྗང་གུ་ཞེས་བྱ་བ་རིག་པའི་གནས་བཅྭ་བརྒྱད་ཀྱི་ཕ་རོལ་དུ་ཕྱིན་པ། དད་པ་བཟང་བ། དགེ་བའི་བསམ་པ་ཅན། བདག་ལ་ཕན་པ་དང་གཞན་ལ་ཕན་པར་ཞུགས་པ། སྙིང་རྗེ་ཅན། ཕ་དང་མ་ལ་སྲི་ཞུ་བྱེད་པ་ཡོད་དེ་བུ་ནི་གཅིག་པུ་དེར་ཟད་ལ་ཕ་དང་མ་དེ་དག་ཀྱང་རྒས་ནས་མིག་ཉམས་ཏེ་མདོངས་ལ་ཐུག་པ་དང་། དེ་ནས་དེའི་ཕ་མས་རྒྱལ་པོ་ཚངས་སྦྱིན་ལ་གསོལ་པ།