།དེ་དང་མདའ་རྣོན་ཁྱད་དུ་བསད་ནས་ནི། །ངུར་སྨྲིག་འཕགས་པའི་རྒྱལ་མཚན་གྱུར་པ་དེ། །མཐོང་ནས་ཡིད་ནི་རབ་ཏུ་དང་བར་བྱ། །སྦྱིན་པ་ཁ་ཅིག་ལེན་པ་ལས་འདག་སྟེ། །དེ་བཞིན་གཞན་ནི་སྦྱིན་པ་པོ་ལས་འདག །དེ་ཡི་ཕྱིར་ནི་འདིར་ནི་རང་སེམས་ལས། །ཡོན་གྱི་དག་པ་ཡང་དག་བསྐྱེད་པར་འབད། །དེ་ནས་བྱང་ཆུབ་སེམས་དཔས་འདི་ནི་འདོད་ཆགས་དང་བྲལ་བའི་རྒྱལ་མཚན་ཡིན་ནོ་སྙམ་ནས་ངུར་སྨྲིག་དེ་ཉིད་ལ་རྟོག་ཅིང་སེམས་རབ་ཏུ་དང་བར་བྱས་ཏེ། མཆེ་བ་དེ་རྣམས་རང་གི་ལག་ནས་བྱིན་ནས་སྨྲས་པ། དུག་ཅན་མདའ་ཡིས་ཕོག་ནས་བདག་གི་སྙིང་ལ་ནི། །མི་དགའ་ཅུང་ཟད་མ་གྱུར་བདེན་པ་གང་ཡིན་པའི། །བདེན་པ་དེ་ཡིས་ཡང་དག་བྱང་ཆུབ་མཆོག་ཐོབ་ནས། །འགྲོ་བ་ཉམ་ཐག་སྡུག་བསྔལ་དག་ལས་ཡོངས་ཐར་བྱ། །རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ན་གླང་པོ་ཆེའི་རྒྱལ་པོ་མཆེ་བ་དྲུག་པར་གྱུར་པ་དེ་གཞན་ཞིག་ཡིན་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ང་ཉིད་དེའི་ཚེ་དེའི་དུས་ན་གླང་པོ་ཆེའི་རྒྱལ་པོ་མཆེ་བ་དྲུག་པ་ཞེས་བྱ་བར་གྱུར་ཏེ། རྒྱལ་པོ་ཆེན་པོ་དེ་ན་ངས་བྱམས་པའི་སེམས་ཉེ་བར་བསྒྲུབས་པ་དང་། བྱ་དཀའ་བའི་སྦྱིན་པ་ཡོངས་སུ་བཏང་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་བྱམས་པའི་སེམས་དང་གཏང་དཀའ་བའི་སྦྱིན་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་རྐྱེན་ཙམ་དང་ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་རི་བོང་དུ་གྱུར་པ་ན་དྲང་སྲོང་ལ་བདག་ཉིད་ཀྱི་ཤ་བྱིན་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་འདས་པ་ན་རི་ཁྲོད་ཆུ་མིག་དང་། མེ་ཏོག་དང་། འབྲས་བུ་དང་། རྩ་བ་ཕུན་སུམ་ཚོགས་པ་ཞིག་ན་དྲང་སྲོང་དཀའ་ཐུབ་དྲག་པོ་ཅན་འབྲས་བུ་དང་རྩ་བ་དང་ཆུ་སྤྱོད་པ། གཡང་གཞི་དང་ཤིང་ཤུན་གྱོན་པ། མེའི་སྦྱིན་སྲེག་བྱེད་པ་ཞིག་གནས་སོ། །དྲང་སྲོང་དེའི་གྲོགས་པོ་རི་བོང་མིའི་སྐད་དུ་སྨྲ་བ་ཞིག་ཡོད་དེ། དེ་ཉིན་པར་དྲང་སྲོང་གི་དྲུང་དུ་སོང་ནས་སོན་པ་དང་ཕྱག་བྱས་ཏེ་གཏམ་རྣམ་པ་སྣ་ཚོགས་ཀྱིས་ཡང་དག་པར་མགུ་བར་བྱེད་པས་དེ་གཉིས་ཕ་དང་བུ་ཁོ་ན་བཞིན་དུ་སྡུག་པས་གནས་པར་གྱུར་ཏོ།