དེ་རྟག་ཏུ་ལུས་འཕགས་ཀྱི་ཡུལ་འདོད་པ་ཁོ་ནའི་ཕྱིར་ལུས་འཕགས་ཀྱི་རྒྱལ་པོ་དང་མི་མཐུན་པར་གྱུར་ཏོ། །ལུས་འཕགས་ཀྱི་རྒྱལ་པོ་ནི་དེ་བས་ཁྱད་ཞུགས་པའི་མཐུ་དང་ལྡན་ཡང་ཡུལ་དེ་མི་འདོད་པས་རྟག་ཏུ་དེ་ལ་བྱམས་པའི་སེམས་དང་། ཕན་པའི་སེམས་དང་། སྙིང་བརྩེ་བས་གནས་སོ། །འོན་ཀྱང་དེ་སྲིད་པས་འཁོལ་བས་ཡུལ་དེ་ཁོ་ན་འདོད་པའི་ཕྱིར་དེ་དཔུང་གི་ཚོགས་ཡན་ལག་བཞི་པ་གོ་བསྐོན་ནས་ལུས་འཕགས་ཀྱི་རྒྱལ་པོ་དང་གཡུལ་སྤྲད་པའི་ཕྱིར་ཆས་སོ། །དེ་ནས་ལུས་འཕགས་ཀྱི་རྒྱལ་པོས་ཐོས་ནས་དཔག་ཚད་ཕྱེད་དང་གསུམ་གྱི་ལམ་བསྟར་དུ་བཅུག་སྟེ། གྲོང་ཁྱེར་དེ་ཐམས་ཅད་རྡོ་བ་དང་གསེག་མ་དང་། གྱོ་མོ་བསལ་ནས་རྒྱལ་མཚན་དང་བ་དན་ནི་བསྒྲེང་། དར་གྱི་ཆུན་འཕྱང་མང་པོ་ནི་དཔྱངས། དྲི་ཞིམ་པོའི་པོག་པོར་ནི་བཤམས། ཙན་དན་གྱི་ཆུའི་ཆག་ཆག་གིས་བཏབ་ཅིང་མེ་ཏོག་སིལ་མ་སྣ་ཚོགས་ཀྱིས་དགའ་དགའ་ལྟར་བྱས་ནས་གཙང་ཞིང་བསོད་པའི་བཟའ་བ་རབ་ཏུ་མང་པོ་དག་སྟ་གོན་བྱས་ཏེ་གྲོང་མི་དང་བློན་པོ་རྣམས་སྩུར་བཀྱེ་ནས་མགུ་བར་འགྱུར་བ་བརྒྱ་ཕྲག་དག་སྤྲིང་བ་ཐོས་པ་དང་། རྒྱལ་པོ་ཚངས་སྦྱིན་ཀུན་ནས་དཀྲིས་པ་དང་བྲལ་ཏེ་དེ་ནས་བསམས་པ། ལུས་འཕགས་ཀྱི་རྒྱལ་པོ་ལ་སོ་སོར་ཡང་དག་པར་དགའ་བར་འགྱུར་བ་ཞིག་བྱས་ཏེ་སླར་ལྡོག་གོ་སྙམ་དུ་བསམས་ནས། ལུས་འཕགས་ཀྱི་རྒྱལ་པོའི་དྲུང་དུ་སོང་བ་དང་། ལུས་འཕགས་ཀྱི་རྒྱལ་པོས་བཀུར་སྟི་ཆེན་པོས་བསུ་ནས་ནང་དུ་ཁྲིད་དེ། ཁ་ཟས་བསོད་པ་རྣམས་ཀྱིས་ཚིམ་པར་བྱས་ནས་ཚིགས་སུ་བཅད་དེ་སྨྲས་པ། རྒྱལ་དབང་བདག་ལ་བཟོད་པར་མཛོད། །ཁྱོད་ལ་བདག་ནི་རྟག་ཏུ་འདུད། །བདག་ནི་གྲོགས་པོར་གྱུར་ལགས་ན། །ཁྱོད་ཀྱིས་བདག་ལ་བརྩེ་བར་མཛོད། །དེས་ཀྱང་ཚིགས་སུ་བཅད་དེ་སྨྲས་པ། བཟོད་པ་ཡི་ནི་གཞུ་བདུངས་ནས། །ཁྲོ་དང་ང་རྒྱལ་འཇོམས་པ་ཡི། །ཡོན་ཏན་ལྡན་པའི་མདའ་གཅིག་གིས། །ཁྱོད་ཀྱིས་བདག་ཅག་རིལ་བཅོམ་མོ། །དེ་ནས་དེ་གཉིས་ཕན་ཚུན་ཡིད་གཅུགས་པར་གྱུར་ནས་རྒྱལ་པོ་ཚངས་སྦྱིན་ཡང་རང་གི་ཡུལ་དུ་སོང་ངོ་། །ལུས་འཕགས་ཀྱི་ཡུལ་མི་རྣམས་ཀྱང་འཇིགས་པ་དང་བྲལ་བར་གྱུར་ཏོ།