དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་དང་བུ་མོ་དག་བཙས་ཏེ། ཇི་སྲིད་འཛམ་བུའི་གླིང་གི་དོན་མཐུན་གཞན་རྣམས་ཀྱི་རྒྱ་མཚོའི་གྲུ་བོ་ཆེ་ཞིག་གོ་ཞེས་མ་ཐོས་པ་དེ་སྲིད་དུ་བུད་མེད་དེ་དག་དང་བདག་ཅག་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། གང་གི་ཚེ་བུད་མེད་རྣམས་ཀྱིས་འཛམ་བུའི་གླིང་གི་དོན་མཐུན་རབ་ཏུ་མང་པོ་གཞན་དག་ཀྱང་རྒྱ་མཚོ་ཆེན་པོའི་དབུས་སུ་ཕྱིན་པ་དང་། ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བོ་ཆེ་བཤིག་གོ་ཞེས་ཐོས་ནས། དེ་ནས་བདག་ཅག་གི་དྲུང་དུ་འོངས་ཏེ། ཁ་ཅིག་ནི་ཟོས་སོ། །སྐྱས་པ་ཟ་བར་བྱེད་པ་ན་ལྷག་རོལ་སྐྲའམ། སྤུའམ། སེན་མོའམ། སོ་ལུས་པ་གང་དག་ཡིན་པ་དེ་དག་ཀྱང་མ་ལུས་པར་ཟ་བར་བྱེད་དོ། །དེ་རྣམས་ཟ་བར་བྱེད་པ་ན་ཁྲག་དྲོན་པོའི་ཐིགས་པ་ས་ལ་ལྷུང་བ་གང་དག་ཡོད་ན་ཡང་དེ་དག་ཀྱང་སོར་མོའི་རྩེ་མོ་རྣམས་ཀྱིས་བྲུད་དེ་ས་དང་བཅས་པར་ཁར་འཇུག་པར་བྱེད་དོ། །བདག་ཅག་ཁ་ཅིག་ནི་ལྕགས་ཀྱི་མཁར་འདིར་བཅུག་གོ། །ཀྱེ་ནང་རྗེ་འདི་དག་ནི་མིའི་བུད་མེད་མ་ཡིན་ཏེ། སྲིན་མོ་ཡིན་གྱིས་འདི་དག་ལས་བདག་ཉིད་སྲུངས་ཤིག །དེ་སྐད་ཅེས་སྨྲས་པ་དང་། ཚོང་པ་མཁས་པའི་རང་བཞིན་ཅན་གྱིས་སྐྱེ་བོའི་ཚོགས་ཆེན་པོ་དེ་ལ་འདི་སྐད་ཅེས་སྨྲས་སོ། །གང་གིས་ན་ཁྱེད་ཅག་དང་བདག་ཅག་ལེགས་པ་དང་། བདེ་བར་འཛམ་བུའི་གླིང་དུ་ཕྱིན་པར་འགྱུར་བའི་ཐབས་འགའ་ཅི་ཡོད། དེ་རྣམས་ཀྱིས་འདི་སྐད་ཅེས་སྨྲས་སོ། །ཀྱེ་ནང་རྗེ་རེ་ཞིག་བདག་ཅག་གང་གིས་ན་ལེགས་པ་དང་། བདེ་བར་འཛམ་བུའི་གླིང་དུ་ཕྱིན་པར་འགྱུར་བའི་ཐབས་ནི་ཅུང་ཟད་ཀྱང་ཁོ་བོ་ཅག་ལ་མེད་དེ། དེ་ཅིའི་ཕྱིར་ཞེ་ན། གལ་ཏེ་བདག་ཅག་གིས་འདི་སྙམ་དུ་ཀྱེ་མ་བདག་ཅག་གིས་ལྕགས་ཀྱི་མཁར་འདི་ལས་རྒལ་ཏེ་འབྲོས་སོ་སྙམ་དུ་བསམས་ན། དེའི་ཉིས་གྱུར་རམ་དེའི་སུམ་གྱུར་གྱིས་མཐོན་པོར་འགྱུར་རོ། །གལ་ཏེ་བདག་ཅག་གིས་འདི་སྙམ་དུ། ཀྱེ་མ་བདག་ཅག་གིས་ལྕགས་ཀྱི་མཁར་འདིའི་གློ་ཕུག་སྟེ་འབྲོས་སོ་སྙམ་དུ་བསམས་ན། དེའི་ཉིས་གྱུར་རམ། དེའི་སུམ་གྱུར་གྱིས་ཞེང་དུ་སྐྱེ་བར་འགྱུར་ཏེ། དེ་ལྟར་རེ་ཞིག་བདག་ཅག་ལེགས་པ་དང་། བདེ་བར་འཛམ་བུའི་གླིང་དུ་ཕྱིན་པར་འགྱུར་བའི་ཐབས་བདག་ཅག་ལ་མེད་དོ།