།རྒྱལ་པོ་ཆེན་པོ་དེའི་ཚེ་དེའི་དུས་ན་ཁྱིམ་བདག་འདུམ་བྱེད་ཅེས་བྱ་བར་གྱུར་པ་གང་གིས་མུ་གེ་ལོ་བཅུ་གཉིས་སུ་བྱུང་བ་ན་རང་སངས་རྒྱས་སྟོང་ལ་བསོད་སྙོམས་སྦྱར་ཅིང་དེའི་གྲོགས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱས་པ་དེ་གཞན་ཞིག་ཡིན་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ང་ཉིད་དེའི་ཚེ་དེའི་དུས་ན་ཁྱིམ་བདག་འདུམ་བྱེད་ཅེས་བྱ་བ་དེར་གྱུར་ཏེ། ང་ཉིད་ཀྱིས་དེ་ན་མུ་གེ་ལོ་བཅུ་གཉིས་སུ་བྱུང་བ་ན་རང་སངས་རྒྱས་སྟོང་ལ་བསོད་སྙོམས་སྦྱར་བས་ངའི་གྲོགས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱས་སོ། །རྒྱལ་པོ་ཆེན་པོ་ངའི་སྦྱིན་པའམ། སྦྱིན་པའི་བགོ་བཤའ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། འོན་ཀྱང་ངའི་སྦྱིན་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ།། །།སྡོམ་ལ། སྤྲིན་ཤུགས་དབང་པོ་སྦྲུལ་མགོ་གཉིས། །དེ་བཞིན་ཆུ་སྲེག་ནེ་ཙོ་དང་། །སྟོན་མོ་རུ་སྦལ་སྡེ་བཟངས་དང་། །དེད་དཔོན་ཚོགས་སུ་བསྡུས་པ་ཡིན། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སེམས་ཅན་རྣམས་རྗེས་སུ་གཟུང་བ་བྱས་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་འཛམ་བུའི་གླིང་གི་དོན་མཐུན་ནོར་ཚོལ་བ་རབ་ཏུ་མང་པོ་དག་ཅིག་རྒྱ་མཚོའི་གྲུ་བོ་ཆེ་བསྒྲུབས་ཏེ། རྒྱ་མཚོ་ཆེན་པོར་འཇུག་པར་འདོད་ནས་དེ་རྣམས་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་རྒྱ་མཚོ་ཆེན་པོར་ཞུགས་པ་རྣམས་འདི་ལྟ་སྟེ། གཅིག་ལ་གཅིག་ཕན་ཐོགས་པར་མངོན་པ་མེད་ཀྱིས། མ་ལ་བདག་ཅག་ནོར་ཚོལ་བ་རྣམས་སོ་སོ་ནས་ཕོངས་པ་ན་དགོས་པ་རྐྱལ་གྱི་ཆ་སྤྱད་དག་ཁྱེར་ཏེ་རྒྱ་མཚོ་ཆེན་པོར་འཇུག་པར་བྱའོ་ཞེས་དེ་ལྟར་ཆས་བཅད་ནས་ནོར་ཚོལ་བ་རྣམས་སོ་སོ་ནས་ཕོངས་པ་ན་དགོས་པ་རྐྱལ་གྱི་ཆ་སྤྱད་ཁ་ཅིག་གིས་ནི་ཤིང་ཤལ་མ་ལིའི་སྤང་ལེབ། ཁ་ཅིག་གིས་ནི་རས་སྒྱེ་ནང་ཚངས་ཅན། ཁ་ཅིག་གིས་ནི་ཀུ་བ་བརྒྱུས་པ། ཁ་ཅིག་གིས་ནི་ར་རྐྱལ་ཁྱེར་ཏེ་རྒྱ་མཚོ་ཆེན་པོར་ཞུགས་སོ། །དེ་རྣམས་རྒྱ་མཚོ་ཆེན་པོའི་དབུས་སུ་ཕྱིན་པ་དང་། ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བོ་ཆེ་བཤིག་གོ། །གྲུ་བོ་ཆེ་བཤིག་པ་དང་། དེ་རྣམས་རྐྱལ་པ་རེ་རེ་ལ་ཞོན་ཏེ་ཆུ་ཇི་ལྟ་བ་བཞིན་དུ་ཁྱེར་ཏེ་དོང་བ་ལས། དེ་རྣམས་ཀྱི་ལས་ཀྱི་རྣམ་པར་སྨིན་པ་ལས་བྱུང་བའི་རླུང་བྱང་ཕྱོགས་ནས་ལངས་ཏེ།