།བློན་པོ་རྣམས་ཀྱིས་རྒྱལ་པོ་ཐམས་ཅད་བཤེས་གཉེན་ལ་སྨྲས་པ། ལྷ་ཁྱོད་ཀྱི་སྲས་ཐམས་ཅད་སྒྲོལ་གྱིས་གླང་པོའི་མཆོག་བཀྲ་ཤིས་ལྡན་ཞེས་བགྱི་བ་ཕྱིར་རྒོལ་བས་མངགས་པ་ལ་སྩལ་ཏོ། །རྒྱལ་པོས་ཐོས་ནས་ཤིན་ཏུ་ཁྲོས་འཁྲུགས་ཏེ་བསྒོ་བ། ཤེས་ལྡན་དག་དེང་ལ་ཐམས་ཅད་སྒྲོལ་ཁྲིད་དེ་ཤོག་ཤིག །དེ་རྣམས་ཀྱིས་དེ་ཁྲིད་དེ་འོངས་པ་དང་། རྒྱལ་པོ་ཐམས་ཅད་ཀྱི་བཤེས་གཉེན་གྱིས་ཐམས་ཅད་སྒྲོལ་ལ་སྨྲས་པ། གཞོན་ནུ་ཁོ་བོས་ཁྱོད་ལ་གང་ཅུང་ཟད་ཁམས་ཀྱི་རྒྱལ་ཕྲན་རྣམས་སྤ་འགོང་བར་བྱེད་པ་དེ་ཐམས་ཅད་ནི་གླང་པོའི་མཆོག་འདིའི་མཐུ་ཡིན་གྱིས། ཁྱོད་ཐམས་ཅད་གཏོང་ན་ཡང་གླང་པོའི་མཆོག་འདི་ནི་ཞོག་ཤིག །ཅེས་སྔ་མོ་ཞིག་ཏུ་མ་བསྒོའམ། ཅིའི་ཕྱིར་ཁྱོད་ཀྱིས་གླང་པོའི་མཆོག་ཡོངས་སུ་བཏང་། དེས་མཉན་ནས་སྨྲས་པ། ཡབ་བསླངས་ན་ཇི་ལྟར་མི་སྩལ། ཅི་ཇི་སྙེད་བསླངས་པ་དེ་ཐམས་ཅད་སྦྱིན་ནམ། ཚིགས་སུ་བཅད་དེ་སྨྲས་པ། ཁྱིམ་ན་གནས་པའི་སྐྱེས་བུ་ཡིས། །ཅི་རིགས་པར་ནི་སྦྱིན་པ་གཏང་། །འོན་ཏེ་ནགས་སུ་སོང་ན་ནི། །ངེས་པ་ཡི་ནི་མཆོག་བྱའོ། །ཡབ་གལ་ཏེ་སྦྱིན་པ་དག་བཏང་། བསོད་ནམས་དག་བགྱིར་མ་མཆིས་ན་དཀའ་ཐུབ་ཀྱི་ནགས་སུ་བརྟེན་པར་བགྱིའོ། །གཞོན་ནུ་དེ་བཞིན་དུ་གྱིས་ཤིག །བྱང་ཆུབ་སེམས་དཔས་རྒྱགས་སྦྱིན་མའི་དྲུང་དུ་སོང་སྟེ་སྨྲས་པ། རྒྱགས་སྦྱིན་མ་བདག་ནི་དཀའ་ཐུབ་ཀྱི་ནགས་སུ་གནས་ཀྱིས། ཁྱོད་ཁྱིམ་ན་བག་ཡོད་པར་གནོས་ཤིག །དེས་སྨྲས་པ། རྗེའི་སྲས་དང་ཐབས་ཅིག་དཀའ་ཐུབ་ཀྱི་ནགས་སུ་གནས་པར་བགྱིའོ། །རྒྱགས་སྦྱིན་མ་བྱང་ཆུབ་སེམས་དཔའ་རྣམས་ནི་སྦྱིན་པ་ལ་དགའ་བས་གལ་ཏེ་ཁྱོད་འགའ་ཞིག་སློང་ན་བྱིན་པར་འགྱུར་རོ། །རྗེའི་སྲས་གལ་ཏེ་ཁྱོད་ཀྱིས་བཏང་ན་སྩལ་དུ་གསོལ། བྱང་ཆུབ་སེམས་དཔས་སྨྲས་པ། ཁྱོད་ཀྱིས་དམ་བཅས་པ་འདི་དྲན་པར་བྱོས་ཤིག །དེ་ནས་བྱང་ཆུབ་སེམས་དཔའ་ཕའི་དྲུང་དུ་སོང་ནས་མགོ་བོས་ཕྱག་བྱས་ཏེ་སྨྲས་པ། ཡབ་གཅིག་བདག་གིས་སྦྱིན་སླད་གླང་ཆེན་བཏང་། །ནོངས་པ་གང་ལགས་ས་བདག་བཟོད་པར་གསོལ། །