།དེ་ནས་ལམ་གྱིས་དུབ་པའི་ངལ་བསོས་ནས་རིན་པོ་ཆེ་རྣམ་པ་སྣ་ཚོགས་པ་དག་ཁྱེར་ཏེ་ཕའི་དྲུང་དུ་སོང་ནས་རྒྱལ་པོའི་སྟན་གྱི་གློ་ཞིག་ཏུ་འདུག་སྟེ། མིའམ་ཅིའི་གྲོང་ཁྱེར་དུ་སོང་བ་དང་འོངས་པ་རྣམས་རྒྱས་པར་སྨྲས་སོ། །དེ་ནས་རྒྱལ་པོ་ནོར་ཅན་གྱིས་འདི་ནི་ཤིན་ཏུ་སྟོབས་དང་། བརྩོན་འགྲུས་དང་། ཕ་རོལ་གནོན་པ་ཅན་ནོ་ཞེས་བྱ་བར་རིག་ནས་རྒྱལ་པོའི་དབང་བསྐུར་བས་དབང་བསྐུར་ཏོ། །གཞོན་ནུ་ནོར་བཟངས་ཀྱིས་བསམས་པ། གང་བདག་ཡིད་འཕྲོག་མ་དང་ལྷན་ཅིག་ཚོགས་པ་དང་། རྒྱལ་སྲིད་ཀྱི་དབང་བསྐུར་བ་ཐོབ་པར་གྱུར་པ་འདི་ནི་སྔོན་བྱས་པའི་རྒྱུའི་ཁྱད་པར་ཡིན་གྱིས། མ་ལ་ད་ཡང་བདག་གིས་སྦྱིན་པ་དག་ནི་བཏང་། བསོད་ནམས་དག་ནི་བྱའོ་སྙམ་ནས། དེས་གླང་པོའི་ཁྱིམ་གྱི་གྲོང་ཁྱེར་དུ་ལོ་བཅུ་གཉིས་སུ་གཏན་པ་མེད་པའི་མཆོད་སྦྱིན་བྱས་སོ། །རྒྱལ་པོ་ཆེན་པོ་དེའི་ཚེ་དེའི་དུས་ན་གཞོན་ནུ་ནོར་བཟངས་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། ང་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའི་སྤྱད་པ་སྤྱོད་པ་ན་རྒྱལ་པོ་ནོར་བཟངས་ཞེས་བྱ་བར་གྱུར་ཏོ། །ངས་གང་ཡིད་འཕྲོག་མའི་ཕྱིར་སྟོབས་དང་། བརྩོན་འགྲུས་དང་། ཕ་རོལ་གནོན་པ་བསྟན་ནས། ལོ་བཅུ་གཉིས་སུ་གཏན་པ་མེད་པའི་མཆོད་སྦྱིན་བྱས་པ་དེས་ངས་བླ་ན་མེད་པའི་བྱང་ཆུབ་མ་ཐོབ་མོད་ཀྱི། འོན་ཀྱང་སྦྱིན་པ་དེ་དང་། བརྩོན་འགྲུས་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སྦྱིན་པ་དག་བཏང་། བསོད་ནམས་དག་བྱས་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་ཐམས་ཅད་ཅེས་བྱ་བའི་གྲོང་རྡལ་གྱི་གྲོང་ཁྱེར་ན་རྒྱལ་པོ་ཐམས་ཅད་ཀྱི་བཤེས་གཉེན་ཞེས་བྱ་བ་ཞིག་རྒྱལ་སྲིད་བྱེད་དུ་འཇུག་སྟེ། འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་དང་། འཐབ་པ་དང་། ཐབ་མོ་དང་། ཁྲག་ཁྲུག་དང་། འགྱེད་པ་རྣམས་རབ་ཏུ་ཞི་བ་ཞེས་བྱ་བ་ནས།