ཆུ་སྲིན་འཛིན་ཁྲིས་གང་བ་ཡི། །ཆུ་བོ་མང་པོ་རྒལ་མཛོད་ཅིག །ནང་ག་ཕྱེ་མ་ལབ་གདུངས་དང་། །སྣ་ཚོགས་ངུད་མོ་དགོད་པ་དང་། །སྦྲུལ་ཅན་འོད་མ་ཅན་གྱི་ཀླུང་། །ནང་ག་ན་ནི་སྲིན་མོ་ཁྲོ། །ཕྱེ་མ་ལབ་ན་མི་མ་ཡིན། །གདུངས་པ་ན་ནི་འཛིན་ཁྲི་མང་། །སྣ་ཚོགས་ཅན་ན་འདོད་སྒྱུར་གཟུགས། །ངུད་མོར་མིའམ་ཅི་ཡི་བྲན། །དགོད་པ་ན་ནི་མིའམ་ཅིའོ། །མནའ་མ་སྦྲུལ་ཅན་སྦྲུལ་མང་ན། །འོད་མ་ཅན་ཀླུང་ཤལ་མ་ལི། །ནང་ག་ལ་ནི་བརྟན་པར་བྱ། །ཕྱེ་མ་ལབ་ལ་རྟུལ་ཕོད་བྱ། །གདུངས་པར་འཛིན་ཁྲི་ཁ་བཅིང་ངོ་། །སྣ་ཚོགས་ཅན་དུ་ཀླུ་སྣ་ཚོགས། །དུད་མོ་ཅན་དུ་ཡིད་བདེ་བས། །དགོད་བྱེད་དུ་མི་སྨྲ་བ་ཡི། །སྦྱོར་བས་ཀུན་དུ་རྒལ་བར་མཛོད། །སྦྲུལ་ཅན་དུ་ནི་སྦྲུལ་དུག་གི། །སྔགས་ཀྱི་སྦྱོར་དང་འོད་མ་ཅན། །ཀླུང་དུ་མཚོན་རྣོན་གདབ་པ་ཡི། །སྦྱོར་བས་ཀུན་དུ་རྒལ་བར་མཛོད། །ཆུ་བོ་རྣམས་རྒལ་ནས་གཅན་པའི་གནས་ན་གནོད་སྦྱིན་ལྔ་བརྒྱ་ཡོད་པ་དེ་རྣམས་ལ་སྲན་ཚུགས་ཏེ་གཞོམ་པར་མཛོད་ཅིག །དེ་ནས་ནི་མི་འམ་ཅིའི་རྒྱལ་པོའི་ཕོ་བྲང་མཆིས་སོ་ཞེས་གསུངས་ཤིག །དྲང་སྲོང་དེ་ལ་ཡིད་འཕྲོག་མས་དེ་སྐད་ཅེས་སྨྲས་ནས་རྐང་པ་གཉིས་ལ་མགོ་བོས་གཏུགས་ཏེ་དེ་ནས་སོང་ངོ་། །ཇི་ཙམ་ན་གཞོན་ནུ་ནོར་བཟངས་ཀྱིས་རི་འོར་དེ་ཕབ་ནས་སྐྱེས་ཁྱེར་ཏེ་གླང་པོའི་གྲོང་ཁྱེར་དུ་འོངས་སོ་ཞེས་རྒྱལ་པོས་ཐོས་ནས་མཆོག་ཏུ་དགའ་བ་སྐྱེས་སོ། །དེ་ནས་གཞོན་ནུ་ངལ་སོས་ནས་ཕའི་དྲུང་དུ་སོང་སྟེ་ཕྱག་བྱས་ནས་མདུན་དུ་འདུག་པ་དང་། རྒྱལ་པོས་མཆོག་ཏུ་དགའ་བར་འགྱུར་བའི་གཏམ་བྱས་ནས་སྨྲས་པ། གཞོན་ནུ་ཁྱོད་བདེ་བར་འོངས་སམ། ལྷ་ཁྱོད་ཀྱི་བཀའ་དྲིན་གྱིས་རི་འོར་བ་ཕབ་སྟེ་གཏེའུ་བཟུང་། སྣ་བོ་བསྐོས་ལགས་ཏེ། དཔྱ་དང་སྐྱེས་ཀྱང་འདི་དག་ལགས་ཀྱིས་ཕྱག་མཛོད་དུ་གཞུག་ཏུ་གསོལ། རྒྱལ་པོས་སྨྲས་པ། བུ་ལེགས་པར་བྱས་ཀྱིས་བཞེས་སོ། །དེ་ནས་གཞོན་ནུས་ཕ་ལ་ཕྱག་བྱས་ནས་ཆས་པ་དང་། རྒྱལ་པོས་སྨྲས་པ། གཞོན་ནུ་སྐྱེས་ལ་ལྷན་ཅིག་ཁོ་ནར་ལོངས་སྤྱད་ཀྱིས་འདུག་ཤིག །ལྷ་བདག་གིས་ཡིད་འཕྲོག་མ་མ་མཐོང་ནས་ཡུན་རིང་ཞིག་ལགས་པས་མཆི་ལགས་སོ། །གཞོན་ནུ་དེང་འགྲོ་བ་ཤོལ་ལ་སང་སོང་ཤིག