བདག་ཅག་རྒྱལ་ལ་མི་ལྡོག་སྟེ། །གཞོན་ནུ་བློ་དང་ལྡན་ལ་མིན། །རྒྱལ་པོ་ཞོ་ཤས་འཚོ་རྣམས་ཀྱིས། །བདག་ཅག་འཇིགས་ཤིང་སྐྲག་གྱུར་མོད། །ཅེས་སྨྲས་ནས་དེ་རྣམས་ཀྱིས་སྒོ་ཕྱེ་སྟེ། དེ་ནས་རྒྱལ་མཚན་དང་བ་དན་བསྒྲེང་ནས་བུམ་པ་གང་བ་དང་རོལ་མོའི་སྒྲ་སྣ་ཚོགས་ཀྱིས་གཞོན་ནུ་ནོར་བཟངས་བསུའོ། །དེས་ཀྱང་དབུགས་ཕྱུང་ནས་དེ་རྣམས་འདྲང་བ་ལས་སྣ་བོ་བསྐོས་ཏེ་དཔྱ་ཐང་བཅད། གཏེའུ་ཡང་བཟུང་ངོ་། །དེ་ནས་རི་འོར་བ་དེ་རྣམས་ཆམ་དུ་ཕབ་ནས་གཞོན་ནུ་ནོར་བཟངས་སླར་ལོག་གོ། །རྒྱལ་པོ་ནོར་ཅན་གྱིས་དེ་ཉིད་ཀྱི་ནུབ་མོའི་རྨི་ལམ་ན་བྱ་རྒོད་ཅིག་འོངས་ཏེ་རྒྱལ་པོའི་ལྟོ་དྲལ་ནས་རྒྱུ་མ་གཟངས་ཏེ་གྲོང་ཁྱེར་དེ་ཐམས་ཅད་ཀྱི་མཐའ་བསྐོར་བ་དང་རིན་པོ་ཆེ་སྣ་བདུན་ཁྱིམ་དུ་འོངས་པར་མཐོང་ངོ་། །མཐོང་ནས་དེ་ནས་རྒྱལ་པོ་འཇིགས་སྐྲག་མི་དགའ་ཞིང་སྤུ་ཟིང་ཞེས་བྱེད་ནས་མྱུར་བ་མྱུར་བར་ལངས་ཏེ་མལ་ཆེན་པོ་ལ་འདུག་ནས་ལག་པ་འགྲམ་པ་ལ་གཏད་དེ་གཞི་འདི་ལས་བདག་རྒྱལ་སྲིད་ལས་ཉམས་པའམ། སྲོག་གི་བར་ཆད་དུ་མི་འགྱུར་གྲང་སྙམ་ནས་སེམས་ཁོང་དུ་ཆུད་ཅིང་འདུག་པ་ལས་དེ་ནམ་ནངས་ནས་རྨི་ལམ་དེ་བྲམ་ཟེ་མདུན་ན་འདོན་ལ་སྨྲས་པ་དང་། དེས་བསམས་པ། ལྷ་རྨི་ལམ་དེ་ལྟ་བུ་མཐོང་བ་ནི་གདོན་མི་ཟ་བར་གཞོན་ནུས་རི་འོར་བ་རྣམས་ཕམ་པར་བྱས་ཀྱིས་ལོག་པ་ཞིག་ཏུ་བསྟན་པར་བྱའོ་སྙམ་ནས་སྨྲས་པ། ལྷ་ཁྱོད་ཀྱིས་རྨང་ལམ་དུ་གཟིགས་པ་ནི་བཟང་བ་མ་ལགས་ཏེ། གདོན་མ་འཚལ་བར་གཞི་འདི་ལས་ལྷའི་རྒྱལ་སྲིད་ལས་ཉམས་པའམ། སྐུ་ཚེའི་བར་ཆད་དུ་འགྱུར་ལགས་སོ། །འོན་ཀྱང་འདི་བཟློག་པའི་ཐབས་མཆིས་ཏེ། དེ་ཡང་བྲམ་ཟེ་རྣམས་ཀྱིས་གསང་ཚིག་ལས་མཐོང་ངོ་། །བཟློག་པའི་ཐབས་དེ་ཅི་ཡིན། ལྷ་སྐྱེད་མོས་ཚལ་དུ་རྫིང་དབྱིབས་ལེགས་པ་ཚད་ལ་བབ་པ་བགྱིས་ལ། དེ་ནས་རྡོ་ཐལ་གྱིས་བྱུགས་ཏེ། ལེགས་པར་བསྟར་ལ་རི་དགས་ཕྲ་མོ་རྣམས་ཀྱི་ཁྲག་གིས་བཀང་ལ་དེ་ནས་ལྷས་ཁྲུས་ལ་གཤེགས་པ་ན་རྫིང་དེ་ལ་ཐེམ་སྐས་གཅིག་ལས་འཇུག་པར་བགྱིའོ། །གཅིག་ལས་ཞུགས་ནས་གཉིས་པ་ལ་འཛེག་པར་བགྱིའོ། །གཉིས་པ་ལས་ཞུགས་ནས་གསུམ་པ་ལ་འཛེག་པར་བགྱིའོ།