སེ་མོ་དོའི་སྒྲས་འགྱིང་ཞིང་འགྲོ་བ། སྐྲ་གནག་ལ་འཇམ་པ། བདེ་སོགས་ལྟར་རྐང་པ་རྐང་གདུབ་ཀྱིས་བརྒྱན་ཅིང་གསེར་གྱི་འོག་པག་ཅན། ལྟོ་ཕྱང་ངེ་བ་དོ་ཤལ་མང་པོ་དཔྱངས་པ། མདོག་གསེར་བཙོམ་ལྟར་བཟང་བ་མཐོང་ངོ་། །མཐོང་མ་ཐག་ཏུ་གཞོན་ནུ་འདོད་ཆགས་ཀྱི་ཞགས་པ་ཆུ་ཟླ་དྲི་མ་མེད་ཅིང་གསལ་བ་གཡོ་བའི་རང་བཞིན་ལྟ་བུར་གཟུང་དཀའ་བ། ཀླུང་ཆུ་རླབས་དང་བཅས་པའི་ཆུ་སྲིན་ལྟ་བུར་རྟོགས་པར་དཀའ་བ། ནམ་མཁའ་ལྡིང་དང་རླུང་གི་ཤུགས་དང་འདྲ་བར་འགྲོ་བ། ཤིང་བལ་གྱི་འདའ་བ་ལྟ་བུར་མྱུར་དུ་འགྱུར་བ། སྤྲེའུ་ལྟར་ས་གཅིག་ན་མི་འདུག་པས་གཡོ་ཞིང་ཙབ་ཡབ་ཅན་གྱིས་ནི་དམ་དུ་ཟིན། འདོད་ཆགས་ཀྱི་མདའ་རྟག་ཏུ་ཉོན་མོངས་པ་བསྟེན་པ་གོམས་པའི་འདོད་ཆགས་ཀྱི་བདེ་བ་རོ་མྱོང་བ་ལ་བརྐམ་པ་ཉོན་མོངས་པ་ཐམས་ཅད་ཀྱི་ཡུལ་ངན་འགྲོའི་གཡང་ས་ལས་མི་ཟློགས་པ། བཟང་མོ་ལ་རྗེས་སུ་ཆགས་པའི་སེམས་ཀྱིས་ཤིན་ཏུ་དྲི་མ་ཅན་དུ་བྱས་པ། ཕྲད་པར་འདོད་པས་ཤིན་ཏུ་དབྱུང་མི་བཟོད་པའི་སྒྲ་འབྱིན་པ། ཚུལ་བཞིན་མ་ཡིན་པའི་གཞུས་འཕངས་པས་ནི་སྙིང་པོ་ལ་ཕོག་སྟེ། མེའི་ནང་དུ་ཕྱེ་མ་ལེབ་བཞིན་དུ་དེ་ཉིད་དུ་འགྱེལ་ཏེ་སྨྲས་པ། དབྱར་གྱི་ཆར་སྤྲིན་ནང་ནས་གློག་ནི་འགྱུ་བ་ལྟར། །བཞིན་རས་ཟླ་བ་འདྲ་དེ་ནོར་བཟངས་ཀྱིས་མཐོང་སྟེ། །དེ་ལ་ཆགས་པའི་འདོད་པ་སྟེག་ཚོལ་ལས་བྱུང་བའི། །འདོད་ཆགས་མདའ་ཡིས་དེ་ཡི་སེམས་ལ་ཕོག། །།འདུལ་བ་གཞི། བམ་པོ་བཞི་བཅུ་རྩ་ལྔ་པ། དེ་ནས་རྒྱལ་བུ་ནོར་བཟངས་ཀྱིས་ཡིད་འཕྲོག་མ་ཁྲིད་དེ་གླང་པོའི་ཁྱིམ་གྱི་གྲོང་ཁྱེར་དུ་སོང་ནས་རྔོན་པ་དེ་ལ་ཡང་གྲོང་ཁྱེར་མཆོག་ཅིག་བྱིན་ནོ། །དེ་ནས་གཞོན་ནུ་ནོར་བཟངས་ཡིད་འཕྲོག་མ་དང་ལྷན་ཅིག་སྟེང་གི་ཁང་བཟངས་ཀྱི་གཞིར་དོང་ནས་ལྷན་ཅིག་ཏུ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ་ཡིད་འཕྲོག་མའི་གཟུགས་དང་ན་ཚོད་དང་བསྙེན་བཀུར་བརྒྱ་ཕྲག་དུ་མའི་ཡོན་ཏན་གྱིས་གཞོན་ནུ་ནོར་བཟངས་ཀྱི་སེམས་ཇི་ལྟར་དེ་དང་སྐད་ཅིག་ཀྱང་འབྲལ་མི་ཕོད་པ་དེ་ལྟར་ཕྲོགས་སོ། །ཇི་ཙམ་དུས་གཞན་ཞིག་ན་བྲམ་ཟེ་གཉིས་ཤིག་ལྗོངས་རྒྱུ་ཞིང་འོངས་པ་ལས་དེ་ལས་གཅིག་ནི་རྒྱལ་པོ་ལ་རྟེན་བཅས་སོ།