ཆུན་མ་དག་བཞག་ཅིང་གནས་པའི་ཁང་པ་རྣམ་པ་གསུམ་པོ་དགུན་གྱི་དང་། དཔྱིད་ཀྱི་དང་དབྱར་གྱི་རྣམས་བརྩིགས་ནས། སྐྱེད་མོས་ཚལ་རྣམ་པ་གསུམ་པོ་དགུན་གྱི་དང་། དཔྱིད་ཀྱི་དང་དབྱར་གྱི་དག་བཙུགས་སོ། །དེ་ནས་གཞོན་ནུ་ནོར་བཟངས་སྟེང་གི་ཁང་བཟངས་ཀྱི་གཞི་ལ་སྐྱེས་པ་མེད་པར་སོང་ནས་སིལ་སྙན་རྣམས་ཀྱིས་རྩེ་བར་བྱེད། དགའ་བར་བྱེད་དགའ་མགུར་སྤྱོད་པར་བྱེད་དོ། །ཇི་ཙམ་དུས་གཞན་ཞིག་ན་རྔོན་པ་སྤང་ལེབ་ཅན་རི་དགས་ཚོལ་ཞིང་དེ་དང་དེ་དག་ཏུ་རྒྱུ་བ་ན་རི་བོ་གཞན་ཞིག་ལ་ཕྱིན་པ་དང་། དེས་རི་བོ་དེའི་ཤོད་ན་དྲང་སྲོང་གི་བསྟི་གནས་མེ་ཏོག་དང་འབྲས་བུ་ཕུན་སུམ་ཚོགས་པ། བྱ་སྣ་ཚོགས་རྒྱུ་བ་དེ་ན་མཚོ་ཆེན་པོ་ཨུཏྤ་ལ་དང་། ཀུ་མུ་ད་དང་། པད་མ་དཀར་པོས་ཡོག་པ། ངང་པ་དང་། བྱ་ཀཱ་རཎྜ་བ་དང་། ངུར་པས་མཛེས་པ་དེ་མཐོང་ནས་དེ་བསྟི་གནས་དེར་འཁྱམ་པར་བརྩམས་པ་ལས། ཇི་ཙམ་ན་དྲང་སྲོང་སྐྲ་དང་། ཁ་སྤུ་དང་། སེན་མོ་དང་། སྤུ་རྣམས་རིང་བ། ལུས་རླུང་དང་ཚ་བས་གདུངས་པ། ཤིང་གོས་གྱོན་པ་ཞིག་ཤིང་གི་དྲུང་དུ་གནས་བཅས་ཏེ་རྩྭའི་སྤྱིལ་བུ་ན་འདུག་པ་མཐོང་ངོ་། །མཐོང་ནས་ཀྱང་རྐང་པ་ལ་མགོ་བོས་ཕྱག་བྱས་ཏེ་ཐལ་མོ་སྦྱར་ནས་དྲིས་པ། ལེགས་ལྡན་ཕྱོགས་འདིར་ཁྱོད་བཞུགས་ནས་ཡུན་ཇི་སྲིད་ཅིག་ལགས་ལོ་བཞི་བཅུ་ལོན་ནོ། །ཁྱོད་ཀྱིས་ཡུན་དེ་སྲིད་ཅིག་ཏུ་ཕྱོགས་འདིར་ལོན་ན་ངོ་མཚར་རྨད་དུ་བྱུང་བའི་ཆོས་འགའ་ལྟ་གཟིགས་པའམ་གསན་པ་ལྟ་མཆིས་སམ། དྲང་སྲོང་ཞི་བའི་བདག་ཉིད་དེས་དལ་བུ་དལ་བུས་སྨྲས་པ། བཞིན་བཟངས་ཁྱོད་ཀྱིས་མཚོ་འདི་མཐོང་ངམ། ལེགས་ལྡན་མཐོང་ལགས་སོ། །འདི་ནི་ཚངས་པ་འདུ་བའི་རྫིང་ཞེས་བྱ་སྟེ། ཨུཏྤ་ལ་དང་། ཀུ་མུ་ད་དང་། པད་མ་དཀར་པོས་གང་བ། བྱ་སྣ་ཚོགས་ཀྱི་ཚོགས་ཀྱིས་བསྟེན་པ། ཁ་བ་དང་དངུལ་དང་བ་མོའི་མདོག་ལྟ་བུའི་ཆུས་ཤིན་ཏུ་གང་བ། ཤིན་ཏུ་དྲི་ཞིམ་པའི་མེ་ཏོག་གིས་བསྐོར་བའི་ཆུའི་རྫིང་འདིར་ཚེས་བཅྭ་ལྔ་ལ་མིའམ་ཅིའི་རྒྱལ་པོ་ལྗོན་པའི་བུ་མོ་ཡིད་འཕྲོག་མ་ཞེས་བྱ་བ་མིའམ་ཅི་མོ་ལྔ་བརྒྱས་ཡོངས་སུ་བསྐོར་ནས་མགོ་ཁྲུས་དང་བསྐུ་མཉེ་སྣ་ཚོགས་དང་འོངས་ནས་ཁྲུས་བྱེད་དོ། །དེ་ཁྲུས་བྱེད་པའི་ཚེ་བྲོ་གར་དང་། གླུ་དང་རོལ་མོའི་སྒྲ་སྙན་པས་བྱ་དང་རི་དགས་རྣམས་ཀྱང་ཡིད་འཕྲོག་པར་བྱེད་དོ།