།དེ་ནས་རྔོན་པ་དེ་དོན་ཡོད་པའི་ཞགས་པ་ལ་ཆགས་པ་སྐྱེས་ནས་དྲང་སྲོང་གི་ཚིག་མཉན་ཏེ་སླར་ཀླུའི་གནས་སུ་སོང་བ་དང་། དེ་ནས་ཇི་ཙམ་ན་ཀླུའི་ཁང་པའི་སྒོ་ན་དོན་ཡོད་པའི་ཞགས་པ་དེ་མཐོང་ནས་དེ་འདི་སྙམ་དུ་སེམས་ཏེ། བདག་འདོད་པའི་དོན་ཡོད་པའི་ཞགས་པ་གང་ཡིན་པ་དེ་ནི་འདི་ཁོ་ན་ཡིན་ནོ་སྙམ་ནས་ཀླུའི་གནས་སུ་ཞུགས་སོ། །དེ་ནས་ཀླུའི་བུ་སྐྱེ་བ་སྣ་ཚོགས་པ་དང་། ཀླུ་གཞན་རྣམས་ཀྱིས་ཡང་དག་པར་དགའ་བ་དང་། མགུ་བ་དག་བྱས་ནས་རིན་པོ་ཆེ་དག་བསྟབས་པ་དང་། དེས་སྨྲས་པ། ཁོ་བོ་ལ་རིན་པོ་ཆེ་མི་དགོས་ཀྱི། འོན་ཀྱང་དོན་ཡོད་པའི་ཞགས་པ་འདི་ཁོ་བོ་ལ་བྱིན་ཅིག །སྐྱེ་བ་སྣ་ཚོགས་པས་སྨྲས་པ། ཁྱོད་ལ་འདི་ཅི་དགོས་ཁོ་བོ་ཅག་ལ་ནི་དགོས་རབ་སྟེ། གང་གི་ཚེ་ནམ་མཁའ་ལྡིང་གིས་གནོད་པ་བྱས་པ་དེའི་ཚེ་འདིས་ཁོ་བོ་ཅག་བསྲུང་བར་འགྱུར་རོ། །རྔོན་པས་སྨྲས་པ། ཁྱེད་ཅག་ལ་ནི་ནམ་མཁའ་ལྡིང་གི་གནོད་པ་ལན་འགའ་ཞིག་འབྱུང་བ་ན་འདི་དགོས་ཀྱི། ཁོ་བོ་ལ་ནི་དུས་ཀུན་དུ་དགོས་ཀྱིས་གལ་ཏེ་ལེགས་པ་བྱས་པ་དང་ཕན་བཏགས་པ་དྲན་པ་ལྟ་ན་བྱིན་ཅིག །ཀླུའི་བུ་སྐྱེ་བ་སྣ་ཚོགས་པ་འདི་སྙམ་དུ་སེམས་ཏེ། འདིས་བདག་ལ་ཕན་ཆེར་བཏགས་ཀྱིས་ཕ་མ་ལ་བརྟགས་ཏེ་སྦྱིན་ནོ་སྙམ་ནས་དེས་ཕ་དང་མ་ལ་བརྟགས་ཏེ་ཞགས་པ་དེ་བྱིན་ནོ། །དེ་ནས་རྔོན་པ་དེས་བདག་ཐོབ་པ་བཞིན་དུ་བདེ་བ་དང་ཡིད་བདེ་བས་ཚིམ་ནས། དོན་ཡོད་པའི་ཞགས་པ་ཁྱེར་ཏེ་ཀླུའི་གནས་ནས་བྱུང་ནས་རང་གི་ཁྱིམ་དུ་སོང་ངོ་། །ཇི་ཙམ་དུས་གཞན་ཞིག་ན་རྒྱལ་པོ་ནོར་ཅན་བཙུན་མོ་དང་ལྷན་ཅིག་རྩེ་བར་བྱེད་དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད་དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་ཕོ་ཡང་མེད། བུ་མོ་ཡང་མེད་ནས་ལག་པ་ལ་འགྲམ་པ་གཏད་དེ་བདག་གི་ཁྱིམ་དུ་ནོར་རྫས་འདི་སྙེད་ཅིག་བསགས་ཀྱང་བདག་ལ་བུ་ཕོ་ཡང་མེད། བུ་མོ་ཡང་མེད་པས་བདག་འདས་ན་བདག་གི་གདུང་རྒྱུད་འཆད་ཅིང་ཡུལ་འཆོར་བ་དང་། བདོག་པ་རིལ་ཡང་རྒྱལ་པོ་གཞན་གྱིས་དབང་བྱེད་པར་འགྱུར་རོ་སྙམ་ནས། སེམས་ཁོང་དུ་ཆུད་ཅིང་འདུག་པ་དང་དེ་ལ་དགེ་སྦྱོང་དང་། བྲམ་ཟེ་དང་། གྲོགས་པོ་དང་། མཛའ་བཤེས་དང་། ཉེ་དུ་རྣམས་ཀྱིས་སྨྲས་པ། ལྷ་ཅིའི་སླད་དུ་ཐུགས་མི་དགྱེས།