།དེ་ནས་དེས་མཚོ་དེའི་ཁོ་ར་ཁོར་ཡུག་བརྟགས་ན་མཚན་མ་ལ་མཁས་པ་ཞིག་པས་ཀླུའི་བུ་སྐྱེ་བ་སྣ་ཚོགས་པ་དེ་ནི་ཕྱོགས་འདི་ཁོ་ན་ཉིད་ན་འདུག་གོ་སྙམ་ནས། དེ་ནས་གཏོར་མ་དང་ཡོ་བྱད་ཀྱི་ཕྱིར་སླར་སོང་ནས་བློན་པོ་རྣམས་ལ་སྨྲས་པ། བདག་ལ་གཏོར་མ་དང་ཡོ་བྱད་རྣམས་སྩོལ་ཅིག་དང་ཞག་བདུན་གྱི་ཉིན་པར་ཀླུའི་བུ་དེ་ཕྲོགས་ཏེ། ཁྲིད་དེ་མཆིའོ། །སྦྲུལ་ཁས་སྡིགས་པ་དེ་ཡང་དེས་མཐོང་ནས་དེ་ནི་བདག་འཕྲོག་ཏུ་འོངས་ཏེ་ཞག་བདུན་གྱི་ཉིན་པར་བདག་ཕྲོགས་ནས་ཕ་མ་དང་བྲལ་བ་ལས་བྱུང་བའི་སྡུག་བསྔལ་ཆེན་པོ་བདག་གིས་མྱོང་བར་འགྱུར་ན་ཇི་ལྟར་བྱ། སུ་ལ་སྐྱབས་བཙལ་སྙམ་པ་དང་། ཡང་མཚོ་དེ་ནས་ཧ་ཅང་ཡང་མི་རིང་བ་ཞིག་ན་རྔོན་པ་སྲན་ཅན་དང་སྤང་ལེབ་ཅན་གཉིས་གནས་ཏེ། དེ་གཉིས་མཚོ་དེའི་དྲུང་ན་གནས་བཅས་ནས་གང་དག་སྐམ་ལ་ཡོད་པའི་སྲོག་ཆགས་རི་བོང་དང་ལྡང་སྐོ་སྐ་དང་། ཕག་ལ་སོགས་པ་མཚོ་དེ་ལ་འཐུང་དུ་འགྲོ་བ་དང་། གང་ཡང་ཆུ་ན་ཡོད་པ་ཉ་དང་རུ་སྦལ་དང་སྦལ་པ་ལ་སོགས་པ་བསད་ཅིང་འཚོ་བར་བྱེད་པ་ལས་དེ་ན་ཡང་སྲན་ཅན་ནི་ཤིའོ། །སྤང་ལེབ་ཅན་ནི་གསོན་ནོ། །ཀླུའི་བུ་སྐྱེ་བ་སྣ་ཚོགས་པས་བསམས་པ་རྔོན་པ་སྤང་ལེབ་ཅན་མ་གཏོགས་པ་སྐྱབས་གཞན་མེད་དོ་སྙམ་ནས། དེ་ནས་མིའི་ཆ་བྱད་དུ་བྱས་ཏེ་རྔོན་པ་སྤང་ལེབ་ཅན་གྱི་དྲུང་དུ་སོང་ནས་སྨྲས་པ། ཀྱེ་ནང་རྗེ་རྒྱལ་པོ་ནོར་ཅན་གྱི་ཡུལ་འབྱོར་པ་དང་རྒྱས་པ་དང་བདེ་བ་དང་ལོ་ལེགས་པ། སྐྱེ་བོ་དང་མི་མང་པོས་གང་བ་ཞེས་བྱ་བ་ནས་འབྲས་སཱ་ལུ་དང་། བུ་རམ་ཤིང་དང་བ་ལང་དང་མ་ཧེ་ཕུན་སུམ་ཚོགས་པ་ཞེས་བྱ་བའི་བར་གོང་མ་བཞིན་དུ་སྟེ། སུའི་མཐུ་ལས་གྱུར་པ་ཇི་ག་ཁྱོད་ཀྱིས་ཤེས་སམ། དེས་སྨྲས་པ་ཤེས་ཏེ་རྒྱལ་པོ་དེ་ཆོས་དང་ལྡན་པས་ཆོས་བཞིན་གྱིས་རྒྱལ་སྲིད་བྱེད་དེ་བྱམས་པའི་སེམས་དང་། ཕན་པའི་སེམས་དང་བརྩེ་བའི་སེམས་ཀྱིས་ཡུལ་བསྐྱངས་པས་སོ། །དེས་སྨྲས་པ། ཇི་དེ་འབའ་ཞིག་གམ་གཞན་གྱིས་ཀྱང་ཡིན་རྔོན་པས་སྨྲས་པ། གཞན་གྱི་ཡོན་ཏན་ཞིག་ཀྱང་ཡོད་དེ། མཚོ་འདི་ན་ཀླུའི་བུ་སྐྱེ་བ་སྣ་ཚོགས་པ་ཞེས་བྱ་བ་གནས་ཏེ། དེས་དུས་དུས་སུ་ཆར་གྱི་རྒྱུན་ལེགས་པར་ཕབ་ནས་ལྷག་པར་ལོ་ཏོག་ཕུན་སུམ་ཚོགས་པར་གྱུར་ཏོ།