དེ་ནས་ཁ་ལོ་སྒྱུར་བ་མ་ལ་གདུས་རྒྱལ་པོ་མུ་ཁྱུད་ལ་སྨྲས་པ། ཁྱོད་ཀྱི་ཤིང་རྟ་གང་ནས་དྲང་། གང་ན་སེམས་ཅན་སྡིག་པའི་ལས་ཅན་རྣམས་སྡིག་པ་མི་དགེ་བའི་ལས་ཀྱི་རྣམ་པར་སྨིན་པ་ཉམས་སུ་མྱོང་བ་ནས་སམ། གང་ན་སེམས་ཅན་དགེ་བའི་ལས་ཅན་རྣམས་ལས་དགེ་བའི་རྣམ་པར་སྨིན་པ་ཉམས་སུ་མྱོང་བ་ནས་དྲང་། མ་ལ་གདུ་དེའི་ཕྱིར་གང་ན་སེམས་ཅན་སྡིག་པའི་ལས་ཅན་རྣམས་སྡིག་པ་མི་དགེ་བའི་རྣམ་པར་སྨིན་པ་ཉམས་སུ་མྱོང་བ་ཡོད་པ་དང་། གང་ན་སེམས་ཅན་དགེ་བའི་ལས་ཅན་རྣམས་ལས་དགེ་བའི་རྣམ་པར་སྨིན་པ་ཉམས་སུ་མྱོང་བ་དག་ཡོད་པ་གཉིས་ཀ་བལྟས། དེ་དག་གང་ན་བ་དེ་ལོགས་སུ་ཤིང་རྟ་དྲོངས་ཤིག །དེ་ནས་ཁ་ལོ་སྒྱུར་བ་མ་ལ་གདུས་རྒྱལ་པོ་མུ་ཁྱུད་ཀྱིས་ཅི་ནས་ཀྱང་གང་ན་སེམས་ཅན་སྡིག་པའི་ལས་ཅན་རྣམས་སྡིག་པ་མི་དགེ་བའི་ལས་ཀྱི་རྣམ་པར་སྨིན་པ་ཉམས་སུ་མྱོང་བ་ཡོད་པ་དང་། གང་ན་སེམས་ཅན་དགེ་བའི་ལས་ཅན་རྣམས་ལས་དགེ་བའི་རྣམ་པར་སྨིན་པ་ཉམས་སུ་མྱོང་བ་ཡོད་པ་གཉི་ག་མཐོང་བར་འགྱུར་བ་དེ་ལྟར་རྒྱལ་པོ་མུ་ཁྱུད་ལྡན་གྱི་ཤིང་རྟ་དྲངས་སོ། །རྒྱལ་པོ་མུ་ཁྱུད་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་ཕྱིན་ནས་རྒྱལ་པོ་མུ་ཁྱུད་ལྷ་རྣམས་ཀྱི་འདུན་ས་ཆོས་བཟང་དུ་ཞུགས་པ་དང་། ལྷ་རྣམས་ཀྱི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་ལ་སྟན་ཕྱེད་བསྟབས་ནས་རྒྱལ་པོ་མུ་ཁྱུད་དང་ལྷ་རྣམས་ཀྱི་དབང་པོ་བརྒྱ་བྱིན་སྟན་ཕྱེད་ཕྱེད་ལ་འདུག་གོ། །རྒྱལ་པོ་ཆེན་པོ་རྒྱལ་པོ་མུ་ཁྱུད་དང་ལྷ་རྣམས་ཀྱི་དབང་པོ་བརྒྱ་བྱིན་སྟན་ཕྱེད་ཕྱེད་ལ་འདུག་པ་ན་ཁྱད་པར་རམ། བསམ་པའམ། ཐ་དད་དུ་བྱ་བ་ཅུང་ཟད་ཀྱང་མེད་དེ། གཞན་དུ་ན་ལྷ་རྣམས་ཀྱི་དབང་པོ་བརྒྱ་བྱིན་ནི་མིག་མི་འཛུམས་པར་ཟད་དོ། །དེ་ནས་རྒྱལ་པོ་མུ་ཁྱུད་ཀྱིས་བདག་ཉིད་ཀྱི་མཆོད་སྦྱིན་ཕུན་སུམ་ཚོགས་པ་མཐོང་ནས་དེའི་ཚེ་ཚིགས་སུ་བཅད་དེ་སྨྲས་པ། དགེ་ལས་བྱས་དང་དེ་བཞིན་དུ། །མི་དགེའི་ལས་བྱས་མཐོང་ནས་ནི། །མི་གང་བག་མེད་བྱེད་པ་དེ། །སྐྱེས་བུ་ཐ་ཤལ་སྙིང་རེ་རྗེ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་ལ་འདི་སྐད་ཅེས་སྨྲས་སོ།