།དེ་ལྟ་བས་ན་ང་ཁྱོད་ལ་དེ་སྐད་དུ་ཅི་ནས་ཀྱང་ཁྱོད་ཀྱིས་དགེ་བའི་ལམ་ངེས་པ་འདི་ལྟ་བུ་ལ་ཞུགས་པའི་རྗེས་སུ་འཇུག་པར་བྱ་ཞིང་། རྒྱུན་འཆད་པར་མི་བྱ་ཞིང་སྐྱེས་བུ་ཐ་ཤལ་དུ་གྱུར་པར་མི་བྱའོ་ཞེས་སྨྲའོ། །དེ་ནས་རྒྱལ་པོ་ལྷ་ཆེན་པོས་གཞོན་ནུ་ཐུ་བོ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་ནས་ཡུལ་བཅོམ་བརླག་འདི་ཉིད་ཀྱི་ལྷ་ཆེན་པོའི་ཨ་མྲའི་ཚལ་འདི་ཉིད་དུ་རྒྱལ་པོའི་དྲང་སྲོང་གི་ཚངས་པར་སྤྱོད་པ་སྤྱད་དོ། །རྒྱལ་པོ་ལྷ་ཆེན་པོའི་གཞོན་ནུ་ཐུ་བོ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་པ་གང་ཡིན་པ་དེ་ཡང་རྒྱལ་པོ་ལྷ་ཆེན་པོ་ཞེས་བྱ་བ་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ་ཞེས་བྱ་བ་ནས་གནས་སོ་ཞེས་བྱ་བའི་བར་གོང་མ་བཞིན་ནོ། །དེ་ནས་རྒྱལ་པོ་ལྷ་ཆེན་པོའི་སྐྲ་དང་ཁ་སྤུ་དག་སྐྲ་མཁན་གྱི་མིས་འཆོས་པ་ན་ཞེས་བྱ་བ་ནས། སྐྱེས་བུ་ཐ་ཤལ་དུ་གྱུར་པར་མི་བྱའོ་ཞེས་བྱ་བའི་བར་གོང་མ་བཞིན་ནོ། །དེ་ནས་རྒྱལ་པོ་ལྷ་ཆེན་པོས་གཞོན་ནུ་ཐུ་བོ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་ནས་རྒྱལ་པོའི་དྲང་སྲོང་གི་ཚངས་པར་སྤྱོད་པ་སྤྱོད་དོ། །དེ་ལྟར་བུ་དང་ཚ་བོ་དང་ཡང་ཚ་བརྒྱུད་པས་ལྷ་ཆེན་པོ་བརྒྱད་ཁྲི་བཞི་སྟོང་གིས་རྒྱལ་པོའི་དྲང་སྲོང་གི་ཚངས་པར་སྤྱོད་པ་སྤྱད་དོ། །དེ་ནས་རྒྱལ་པོ་ལྷ་ཆེན་པོས་བདག་ཉིད་ཀྱི་མཆོད་སྦྱིན་ཕུན་སུམ་ཚོགས་པ་མཐོང་ནས་ཚིགས་སུ་བཅད་དེ་སྨྲས་པ། ལྷ་དང་མི་ཡི་ནང་དག་ཏུ། །དབང་ཕྱུག་དོན་དུ་གཉེར་བ་དང་། །དབུལ་བའི་འཇིགས་པས་སྐྲག་པ་ཡིས། །ཅི་ནུས་ཀྱིས་ནི་སྦྱིན་པ་གཏང་། །འཇིག་རྟེན་ན་ནི་སྦྱིན་བྱེད་མཆོད། །སྦྱིན་བྱེད་ལྷ་ཡི་ནང་མཆོད་དེ། །བྱ་ཡི་འབྲས་ལྡན་ཤིང་བཞིན་དུ། །འབྱུང་པོ་ཀུན་གྱི་སྐྱབས་འོས་ཡིན། །རྒྱལ་པོ་ཆེན་པོ་དེའི་ཚེ་དེའི་དུས་ན་རྒྱལ་པོ་ལྷ་ཆེན་པོ་ཞེས་བྱ་བ་འཁོར་ལོས་སྒྱུར་བའི་རྒྱལ་པོ་གང་གིས་དགེ་བའི་ལམ་ངེས་པ་དེ་སྲོལ་བཏོད་ཅིང་དགེ་བའི་ལམ་ངེས་པ་སྲོལ་བཏོད་པ་དེ་ལ་བརྟེན་ནས་ལྷ་ཆེན་པོ་བརྒྱད་ཁྲི་བཞི་སྟོང་གིས་རྒྱལ་པོའི་དྲང་སྲོང་གི་ཚངས་པར་སྤྱོད་པ་སྤྱད་པ་དེ་གཞན་ཞིག་ཡིན་སྙམ་ན། ཁྱོད་ཀྱིས་དེ་ལྟར་མི་བལྟ་སྟེ། ང་ཉིད་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་ལྷ་ཆེན་པོ་ཞེས་བྱ་བར་གྱུར་ཏེ། ང་ཉིད་ཀྱིས་དགེ་བའི་ལམ་ངེས་པ་དེ་སྲོལ་བཏོད་ཅིང་དགེ་བའི་ལམ་ངེས་པ་སྲོལ་བཏོད་པ་དེ་ལ་བརྟེན་ནས་ལྷ་ཆེན་པོ་བརྒྱད་ཁྲི་བཞི་སྟོང་གི་རྒྱལ་པོའི་དྲང་སྲོང་གི་ཚངས་པར་སྤྱོད་པ་སྤྱད་དོ།