འོན་ཀྱང་ངའི་སྦྱིན་པ་དེ་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཀྱི་རྒྱུ་ཙམ་དང་། རྐྱེན་ཙམ་དང་། ཚོགས་ཙམ་ཡིན་ནོ། །རྒྱལ་པོ་ཆེན་པོ་གཞན་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཕྱིར་སྦྱིན་པ་དག་བཏང་བསོད་ནམས་དག་བྱས་པ་གང་ཡིན་པ་དེ་ཉོན་ཅིག །རྒྱལ་པོ་ཆེན་པོ་སྔོན་བྱུང་བ་ཡུལ་མི་ཐི་ལར་རྒྱལ་པོ་ལྷ་ཆེན་པོ་ཞེས་བྱ་བ་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ་ཆོས་དང་ལྡན་པ་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ཞིག་བྱུང་སྟེ། དེའི་རིན་པོ་ཆེ་སྣ་བདུན་ནི་འདི་ལྟ་བུ་དག་ཡིན་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེའོ། །དེ་ལ་བུ་དཔའ་བ་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམ་པ་སྟོང་ཡང་ཚང་བར་ཡོད་ཅིང་། དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པར་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ་ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་སོ། །དེ་ནས་རྒྱལ་པོ་ལྷ་ཆེན་པོའི་སྐྲ་མཁན་གྱི་མི་སྐྲ་དང་ཁ་སྤུ་འཆོས་པ་ན་སྐྲ་མཁན་གྱི་མི་ལ་སྨྲས་པ། །ཀྱེ་ནང་རྗེ་ཁྱོད་ཀྱིས་གང་གི་ཚེ་ངའི་མགོ་ལས་གཤིན་རྗེའི་ཕོ་ཉ་སྐྲ་དཀར་སྐྱེས་པ་མཐོང་བ་དེའི་ཚེ་ང་ལ་སྦྲོན་ཅིག །ལྷ་བཀའ་བཞིན་འཚལ་ཞེས་སྐྲ་མཁན་གྱི་མིས་རྒྱལ་པོ་ལྷ་ཆེན་པོའི་ལྟར་མཉན་ཏོ། །དུས་གཞན་ཞིག་ན་སྐྲ་མཁན་གྱི་མིས་རྒྱལ་པོ་ལྷ་ཆེན་པོའི་སྐྲ་དང་ཁ་སྤུ་འཆོས་པ་ན་རྒྱལ་པོ་ལྷ་ཆེན་པོའི་མགོ་ལས་གཤིན་རྗེའི་ཕོ་ཉ་སྐྲ་དཀར་སྐྱེས་པ་མཐོང་ངོ་། །མཐོང་ནས་ཀྱང་ཡང་རྒྱལ་པོ་ལྷ་ཆེན་པོ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛོད་ཅིག །དབུ་ལ་གཤིན་རྗེའི་ཕོ་ཉ་དབུ་སྐྲ་དཀར་པོ་སྐྱེས་ལགས་སོ། །ཀྱེ་ནང་རྗེ་དེའི་ཕྱིར་ཁྱོད་ཀྱིས་སྐྲ་དཀར་དེ་དག་རིམ་གྱིས་དལ་བུས་དལ་བུས་ཕྱུང་ལ་ངའི་ལག་པར་བྱིན་ཅིག །ལྷ་བཀའ་བཞིན་འཚལ་ཞེས་སྐྲ་མཁན་གྱི་མིས་རྒྱལ་པོ་ལྷ་ཆེན་པོའི་ལྟར་མཉན་ནས་སྐྲ་སྐྱ་བོ་དེ་དག་གསེར་གྱི་སྨང་ཙེར་གྱིས་རིམ་གྱིས་དལ་བུས་དལ་བུས་ཕྱུང་ནས་རྒྱལ་པོ་ལྷ་ཆེན་པོའི་ལག་ཏུ་བཞག་གོ། །དེ་ནས་རྒྱལ་པོ་ལྷ་ཆེན་པོས་སྐྲ་སྐྱ་བོ་དེ་དག་ལག་པ་གཉིས་ཀྱིས་བརྐྱང་ནས་ཚིགས་སུ་བཅད་དེ་སྨྲས་པ།