གཞོན་ནུ་ཀུ་ཤས་སྨྲས་པ། ཅིའི་ཕྱིར་དེ་ལྟར་འདུག །སེང་གེའི་འཇིགས་པས་སོ། །ཅི་སྟེ་མི་གསོད། མི་ནུས་མོད། གལ་ཏེ་བདག་གིས་བསད་ན། བདག་ལ་ཅི་སྦྱིན། དཔུང་གི་ཚོགས་ཡན་ལག་བཞི་པའི་ཕྱེད་དོ། །གཞོན་ནུ་ཀུ་ཤས་སེང་གེའི་དྲུང་དུ་ཉེ་བར་སོང་ནས་དུང་བུས་པ་དང་དེའི་རྣ་བ་རྡོལ་ཏེ་ཤི་ནས། དེས་དེ་ཁྱེར་ཏེ་རི་འོར་དུ་སོང་ནས་ཤེས་ལྡན་དག་སེང་གེ་དེ་ནི་འདི་ཡིན་ནོ། །དཔུང་གི་ཚོགས་ཡན་ལག་བཞི་པའི་ཕྱེད་ཁྱེར་ཅིག །དེས་སྨྲས་པ། ཁྱེད་ཅག་ཉིད་ཀྱི་ལག་ཏུ་ཞོག་ལ་སླར་འོངས་ན་བྱིན་ཅིག །དེ་རི་འོར་གང་ན་ཆུང་མ་དེ་ཡོད་པའི་རི་འོར་དེར་སོང་ནས་མེ་ཏོག་ཕྲེང་རྒྱུད་མཁན་ཞིག་གི་དྲུང་དུ་ཕྱིན་པ་དང་། དེས་སྨྲས་པ། ཁྱོད་འདྲ་སུ་ཞིག །དེས་སྨྲས་པ། མེ་ཏོག་ཕྲེང་རྒྱུད་མཁན་གྱི་བུ་ཡིན་ནོ། །ཁྱོད་ཀྱི་མིང་ཅི་ཡིན། སྤོང་བྱེད་དོ། །བྱང་ཆུབ་སེམས་དཔའ་རྣམས་ནི་བཟོའི་གནས་དང་ལས་ཀྱི་གནས་དེ་དང་དེ་རྣམས་ལ་མཁས་པ་ཡིན་པས་དེས་མེ་ཏོག་ཕྲེང་ལེགས་པར་བརྒྱུས་པ་དང་། མེ་ཏོག་ཕྲེང་རྒྱུད་མཁན་དེས་བུ་མོ་དེ་ལ་མེ་ཏོག་ཕྲེང་བ་དེ་བྱིན་ནོ། །དེས་སྨྲས་པ། འདི་འདྲ་བའི་མེ་ཏོག་ཕྲེང་བ་ནི་ཁྱོད་ཀྱིས་སྔོན་ལན་འགའ་ཡང་མ་བརྒྱུས་ན་འདི་ལ་རྒྱུ་ཅི་ཡོད། བདག་གི་སློབ་མས་བརྒྱུས་སོ། །ཁྱོད་ཀྱི་སློབ་མ་དེ་བལྟའོ། །དེས་དེ་དེར་ཁྲིད་པ་དང་། དེས་མཐོང་ནས་དེས་བསམས་པ། ཤ་ཟ་འདི་གང་ནས་འོངས་པ་ཞིག་སྙམ་ནས། དེས་ཤ་ཟ་ཤ་ཟ་ཞེས་སྒྲ་ཕྱུང་སྟེ་དེ་བསྐྲད་པ་ལས། གཡོས་མཁན་ཞིག་གི་དྲུང་དུ་ཕྱིན་པ་དང་། དེས་སྨྲས་པ། ཁྱོད་སུ་ཞིག །ཁོ་བོ་གཡོས་མཁན་གྱི་བུ་ཡིན་ནོ། །ཁྱོད་ཀྱི་མིང་ཅི་ཡིན། སྣོད་དྲི་ཞིམ་ཞེས་བྱའོ། །དེས་བཙོ་བ་དང་། བསྲེག་པ་ལེགས་པར་བྱས་པ་དང་། གཡོས་མཁན་དེས་ཀྱང་བུ་མོ་དེ་ལ་བཙོས་པ་དང་། བསྲེགས་པ་དེ་བསྟབས་སོ། །དེས་སྨྲས་པ། ཀྱེ་ནང་རྗེ་བཙོ་བ་དང་། བསྲེག་པ་ལེགས་ན་སུས་གཡོས། བདག་གི་སློབ་མས་གཡོས་སོ། །ཁྱོད་ཀྱི་སློབ་མ་དེ་བལྟའོ་ཞེས་བྱ་བ་ནས་དེ་ནས་ཀྱང་བསྐྲད་དོ་ཞེས་བྱ་བའི་བར་དུ་སྟེ། སྨན་པ་ཞིག་གི་དྲུང་དུ་ཕྱིན་པ་ལས་དེས་སྨྲས་པ་ཁྱོད་སུ་ཞིག །སྨན་པའི་བུ་ཡིན་ནོ། །ཁྱོད་ཀྱི་མིང་ཅི་ཡིན། རྒྱུན་ཤེས་ཀྱི་བུ་ཞེས་བྱའོ། །བུ་མོ་དེ་ཀླད་ནད་ཀྱིས་ཐེབས་པར་གྱུར་པ་དང་། སྨན་པས་གསོ་མ་ནུས་ནས་སྨན་པ་སེམས་ཁོང་དུ་ཆུད་ཅིང་འདུག་གོ།