།གཞན་ཡང་རྒྱལ་པོ་ལེགས་མཐོང་ཆེན་པོ་ནི་གཟུགས་བཟང་བ། མཛེས་པ། བལྟ་ན་སྡུག་པ་ཡིན་ཏེ། མིའི་ཁ་དོག་ལས་ནི་འདས་ལ་ལྷའི་ཁ་དོག་ནི་མ་ཐོབ་པ་སྟེ། རྒྱལ་པོ་ལེགས་མཐོང་ཆེན་པོ་གཟུགས་བཟང་བ། མཛེས་པ། བལྟ་ན་སྡུག་པ་གང་ཡིན་པ་འདི་ནི་རྒྱལ་པོ་ལེགས་མཐོང་ཆེན་པོའི་འབྱོར་པ་ཞེས་བྱའོ། །གཞན་ཡང་རྒྱལ་པོ་ལེགས་མཐོང་ཆེན་པོ་ནི་གནོད་པ་ཆུང་ཞིང་ནད་མེད་པའི་རང་བཞིན་ཅན་ཡིན་ཏེ་ཕོ་བ་ཧ་ཅང་བསིལ་བ་མ་ཡིན་ཞིང་ཧ་ཅང་དྲོ་བ་མ་ཡིན་པ། དྲོད་སྙོམས་པ་དང་། དུས་ཀུན་དུ་བདེ་བ་དང་། གནོད་པ་མེད་པ་དང་ལྡན་པས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ལེགས་པར་བདེ་བར་འཇུ་བར་འགྱུར་ཏེ། རྒྱལ་པོ་ལེགས་མཐོང་ཆེན་པོ་གནོད་པ་ཆུང་ཞིང་ནད་མེད་པའི་རང་བཞིན་ཅན་གང་ཡིན་པ་འདི་ནི་རྒྱལ་པོ་ལེགས་མཐོང་ཆེན་པོའི་འབྱོར་པ་ཞེས་བྱའོ། །གཞན་ཡང་རྒྱལ་པོ་ལེགས་མཐོང་ཆེན་པོ་ནི་གྲོང་མི་དང་ཡུལ་མི་རྣམས་ཀྱི་སྙིང་དུ་སྡུག་ཅིང་ཡིད་དུ་འོང་བ་ཡིན་ཏེ། དཔེར་ན་བུ་རྣམས་ལ་ཕ་བཞིན་ཏེ། རྒྱལ་པོ་ཆེན་པོ་དུས་གཅིག་ཅིག་ན་རྒྱལ་པོ་ལེགས་མཐོང་ཆེན་པོ་སྐྱེད་མོས་ཚལ་གྱི་གནས་སུ་སོང་བ་ན་ཤིང་རྟ་སྒྱུར་བ་ལ་སྨྲས་པ། ཤིང་རྟ་སྒྱུར་བ་རེ་ཞིག་ཤིང་རྟ་རིམ་གྱིས་དལ་བུ་དལ་བུས་སྒྱུར་ཅིག །ངས་གྲོང་མི་དང་། ཡུལ་མི་རྣམས་ལ་ཡུན་རིང་དུ་བལྟའོ། །གྲོང་མི་དང་ཡུལ་མི་རྣམས་ཀྱིས་ཀྱང་ཤིང་རྟ་སྒྱུར་བ་ལ་སྨྲས་པ། ཤིང་རྟ་སྒྱུར་བ་རེ་ཞིག་ཤིང་རྟ་རིམ་གྱིས་དལ་བུ་དལ་བུས་སྒྱུར་ཅིག་དང་། བདག་ཅག་ཀྱང་ལྷ་ལ་ཡུན་རིང་དུ་བལྟའོ། །རྒྱལ་པོ་ལེགས་མཐོང་ཆེན་པོ་གྲོང་མི་དང་ཡུལ་མི་པ་རྣམས་ཀྱི་སྙིང་དུ་སྡུག་ཅིང་ཡིད་དུ་འོང་བ་གང་ཡིན་པ་འདི་ནི་རྒྱལ་པོ་ལེགས་མཐོང་ཆེན་པོའི་འབྱོར་པ་ཞེས་བྱའོ། །དེ་ནས་དུས་གཞན་ཞིག་ན་གྲོང་མི་དང་ཡུལ་མི་རྣམས་གསེར་དང་། དངུལ་དང་། ནོར་བུ་རིན་པོ་ཆེ་དང་། ལ་བ་རིན་པོ་ཆེ་མང་པོ་དག་ཐོགས་ནས་རྒྱལ་པོ་ལེགས་མཐོང་ཆེན་པོ་གང་ན་བ་དེར་དོང་སྟེ་ཕྱིན་པ་དང་། རྒྱལ་པོ་ལེགས་མཐོང་ཆེན་པོ་ལ་འདི་སྐད་ཅེས་སྨྲས་སོ། །ལྷའི་སླད་དུ་བདག་ཅག་གིས་གསེར་དང་། དངུལ་དང་། ནོར་བུ་རིན་པོ་ཆེ་དང་ལ་བ་རིན་པོ་ཆེ་མང་པོ་འདི་དག་འཚལ་ཏེ་མཆིས་ལགས་ན། ལྷ་ཐུགས་བརྩེ་བའི་སླད་དུ་འདི་དག་བཞེས་སུ་གསོལ།