Degé Kangyur volume 2, F.180.a

འཛམ་བུའི་གླིང་དུ་འོངས་ནས་ནད་ཚབས་པོ་ཆེ་ཞིག་གིས་ཐེབས་ཏེ་སྡུག་བསྔལ་མི་བཟད་པ་འཆི་བ་ལ་ཐུག་པ་མྱོང་བ་དང་། དེ་ནས་རྒྱལ་པོ་ང་ལས་ནུའི་བློན་པོ་དང་། རྩིས་པ་དང་། རྒྱལ་སྲིད་འབུལ་བའི་སྣ་ཆེན་པོ་ལ་གཏོགས་པ་དང་། གསང་སྔགས་ཀྱིས་ལྷན་ཅིག་འཚོ་བར་བྱེད་པ་རྣམས་རྒྱལ་པོ་ང་ལས་ནུ་གང་ན་བ་དེར་སོང་སྟེ་ཕྱིན་པ་དང་། རྒྱལ་པོ་ང་ལས་ནུ་ལ་འདི་སྐད་ཅེས་སྨྲས་སོ། །​ལྷ་འདས་ནས་ཡུལ་འཁོར་གྱི་མི་སླད་མ་རྣམས་ཤེས་ལྡན་དག་རྒྱལ་པོ་ང་ལས་ནུས་ནོངས་པའི་དུས་ཀྱི་ཚེ་ཅི་ཞིག་གསུངས་ཞེས་འདྲི་ན། དེ་སྐད་དུ་འདྲི་བ་དེ་དག་ལ་བདག་ཅག་གིས་ཇི་སྐད་དུ་ལན་གདབ་པར་བགྱི། སྣ་བོ་དག་ང་འདས་ནས་གལ་ཏེ་ཁྱེད་ཅག་ལ་སྐྱེ་བོ་ཕྱི་མ་རྣམས་ཉེ་བར་འོངས་ནས་དེ་སྐད་དུ་འདྲི་བར་བྱེད་ན། འདྲི་བ་དེ་དག་ལ་ཁྱེད་ཀྱིས་ལན་འདི་སྐད་ཅེས་ཐོབ་ཤིག །​ཤེས་ལྡན་དག་རྒྱལ་པོ་ང་ལས་ནུ་ནི་རིན་པོ་ཆེ་སྣ་བདུན་དང་ཡང་ལྡན། མིའི་འབྱོར་པ་རྣམ་བཞིས་གླིང་བཞིར་རྒྱལ་སྲིད་ཀྱི་དབང་ཕྱུག་ལ་ཡང་དབང་བྱེད་དུ་བཅུག །​སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་ཡང་སོང་ནས་འདོད་པའི་ཡོན་ཏན་རྣམ་པ་ལྔ་པོ་དག་གིས་མ་ངོམས་བཞིན་དུ་ནོངས་སོ་ཟེར་རོ་ཞེས་གྱིས་ཤིག །​ཚིགས་སུ་བཅད་པ་དག་ཀྱང་སྨྲས་པ། ཀཱར་ཥཱ་པ་ཎའི་ཆར་བབ་ཀྱང་། །​འདོད་པ་དག་ལ་ངོམས་པ་མེད། །​མཁས་པས་འདོད་པ་མནོག་ཆུང་ཞིང་། །​སྡུག་བསྔལ་མང་པོར་ཤེས་ནས་ནི། །​ལྷ་ཡི་འདོད་པ་རྣམས་ལ་ཡང་། །​དགའ་བར་འགྱུར་བ་མེད་པ་ཉིད། །​ཡང་དག་རྫོགས་པའི་སངས་རྒྱས་ཀྱི། །​ཉན་ཐོས་སྲེད་པ་ཟད་ལ་དགའ། །གངས་ཀྱི་རི་དང་མཉམ་པ་ཡི། །​གསེར་གྱི་རི་བོར་གྱུར་ཀྱང་ནི། །​གཅིག་གི་ནོར་དུའང་དེས་མི་ཆོག །​མཁས་པས་དེ་ལྟར་ཤེས་པར་བྱ། །​གང་ཞིག་གཞི་འདིས་སྡུག་བསྔལ་རྟོག་པ་དེ། །​འདོད་པ་དག་ལ་གཞར་ཡང་ཇི་ལྟར་དགའ། །​འཇིག་རྟེན་ནོར་དག་ཟུག་རྔུར་རྟོགས་ནས་ནི། །བརྟན་པས་དེ་ཉིད་གདུལ་ཕྱིར་བསླབ་པར་བྱ། །​རྒྱལ་པོ་ཆེན་པོ་དེ་ལྟ་བས་ན་རྣམ་གྲངས་འདིས་ཁྱོད་ཀྱིས་འདི་ལྟར་གང་མིའི་འཇིག་རྟེན་ན་འདོད་པའི་ཡོན་ཏན་ལྔས་ངོམས་ཤིང་ཆོག་ཤེས་ཏེ་འཆི་བར་འགྱུར་བའི་མི་གང་དག་ཡིན་པ་དེ་དག་ནི་ཉུང་ལ། མིའི་འཇིག་རྟེན་ན་འདོད་པའི་ཡོན་ཏན་ལྔས་མི་ངོམས་ཤིང་ཆོག་མི་ཤེས་ཏེ་འཆི་བར་འགྱུར་བ་ནི་ཆེས་མང་བར་རིག་པར་བྱའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8254#UT22084-001-006-8254