Degé Kangyur volume 2, F.177.a

སུམ་བཅུ་རྩ་གསུམ་པའི་ལྷ་རྣམས་དབྱར་ཟླ་བ་བཞི་ལྷའི་འདོད་པའི་ཡོན་ཏན་ལྔ་དང་འབྱོར་ཅིང་ལྡན་པར་དེ་ན་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ཀྱིས། སྣ་བོ་དག་ཁྱེད་ཅག་ཀྱང་དེར་ཕྱིན་ནས་འདོད་པའི་ཡོན་ཏན་ལྔ་དང་འབྱོར་ཅིང་ལྡན་པར་རྩེ་བར་གྱིས། དགའ་བར་གྱིས་དགའ་མགུར་སྤྱད་པར་གྱིས་ཤིག ། ཡང་རྒྱལ་པོ་ང་ལས་ནུས་རི་རབ་ཀྱི་རྩེ་ན་དཀར་ཞིང་དཀར་བ་སྤྲིན་སྤུངས་པ་ལྟ་བུ་མཐོན་པོ་ཞིག་མཐོང་ངོ་། །​མཐོང་ནས་ཀྱང་གནོད་སྦྱིན་ལྷ་གནས་ལ་སྨྲས་པ། ལྷ་གནས་དཀར་ཞིང་དཀར་བ་སྤྲིན་སྤུངས་པ་ལྟ་བུ་མཐོན་པོ་ཕ་བི་ཅི་ཞིག་ཡིན། ལྷ་དེ་ནི་སུམ་བཅུ་རྩ་གསུམ་པའི་ལྷ་རྣམས་ཀྱི་འདུན་ས་ཆོས་བཟང་ལགས་ཏེ། སུམ་བཅུ་རྩ་གསུམ་པའི་ལྷ་རྣམས་དང་། རྒྱལ་ཆེན་བཞི་རྣམས་དེར་འདུས་ཤིང་ཚོགས་ནས་ལྷ་དང་མི་རྣམས་ཀྱི་དོན་སེམས་པར་བགྱིད། འཇལ་བར་བགྱིད། ཉེ་བར་རྟོག་པར་བགྱིད་དེ། ལྷ་ཡང་དེར་བཞུད་པར་འགྱུར་རོ། །​རྒྱལ་པོ་ང་ལས་ནུས་ཐོས་ནས་བློན་པོ་རྣམས་ལ་སྨྲས་པ། སྣ་བོ་དག་ཁྱེད་ཅག་གིས་དཀར་ཞིང་དཀར་བ་སྤྲིན་སྤུངས་པ་ལྟ་བུ་མཐོན་པོ་མཐོང་ངམ། ལྷ་མཐོང་ལགས་སོ། །​སྣ་བོ་དག་དེ་ནི་སུམ་བཅུ་རྩ་གསུམ་པའི་ལྷ་རྣམས་ཀྱི་འདུན་ས་ཆོས་བཟང་ཞེས་བྱ་བ་ཡིན་ཏེ། སུམ་བཅུ་རྩ་གསུམ་པའི་ལྷ་རྣམས་དང་། རྒྱལ་ཆེན་བཞི་རྣམས་དེར་འདུས་ཤིང་ཚོགས་ནས་ལྷ་དང་མི་རྣམས་ཀྱི་དོན་སེམས་པར་བྱེད། འཇལ་བར་བྱེད། ཉེ་བར་རྟོག་པར་བྱེད་དེ། སྣ་བོ་དག་ཁྱེད་ཅག་ཀྱང་དེར་འགྲོ་བར་འགྱུར་རོ། །​སུམ་བཅུ་རྩ་གསུམ་པའི་ལྷ་རྣམས་ཀྱི་གྲོང་ཁྱེར་བལྟ་ན་སྡུག་ཅེས་བྱ་བ་ནི་ཆུ་དང་ཞེང་དུ་དཔག་ཚད་ཉིས་སྟོང་ལྔ་བརྒྱ་ཡོད་དེ། ཁོ་ར་ཁོར་ཡུག་ཏུ་དཔག་ཚད་ཁྲི་ཡོད་པ། གསེར་གྱི་ར་བ་རིམ་པ་བདུན་གྱིས་ཡོངས་སུ་བསྐོར་བ་སྟེ། ར་བ་དེ་རྣམས་ཀྱི་འཕང་དུ་ནི་དཔག་ཚད་ཕྱེད་དང་གསུམ་ཡོད་དོ། །​ར་བ་དེ་རྣམས་ལ་ཅོག་རྣམ་པ་བཞི་པོ་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་དག་བཏགས་སོ། །​སྐར་ཁུང་ཁ་ཡར་ལྟ་བ་དང་། མར་ལྟ་བ་དག་ཀྱང་བཏོད་དོ། །​གྲོང་ཁྱེར་བལྟ་ན་སྡུག་གི་ནང་གི་སའི་ཕྱོགས་ནི་བཟང་པོ། མཛེས་པ།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8248#UT22084-001-006-8248