Degé Kangyur volume 2, F.174.b

བཀའ་འོག་ཏུ་མ་ཆུད་པའི་གླིང་གཞན་འགའ་ལྟ་ཡོད་དམ། ལྷ་མ་མཆིས་སོ། །​འོན་ཀྱང་ལྷ་སུམ་བཅུ་རྩ་གསུམ་པའི་ལྷ་ཚེ་རིང་བ། ཁ་དོག་དང་ལྡན་པ། བདེ་བ་མང་ཞིང་གཞལ་མེད་ཁང་མཐོན་པོ་ན་ཡུན་རིང་དུ་གནས་པ་དག་མཆིས་ཀྱིས། ཀྱེ་མ་ལྷ་སུམ་བཅུ་རྩ་གསུམ་པའི་ལྷ་རྣམས་ལ་གཟིགས་སུ་བཞུད་ཅིག །​དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། བདག་ལ་འཛམ་བུའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ་ཡང་ཡོད། བདག་ལ་རིན་པོ་ཆེ་སྣ་བདུན་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེ་ཡང་ཡོད། བདག་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡང་ཚང་། བདག་གི་ཕོ་བྲང་གི་ནང་དུ་ཡང་རིན་པོ་ཆེའི་ཆར་ཞག་བདུན་དུ་ཕབ། བདག་ཤར་གྱི་ལུས་འཕགས་ཀྱི་གླིང་དུ་ཡང་སོང་སྟེ། ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ཤར་གྱི་ལུས་འཕགས་ཀྱི་གླིང་དུ་རྗེས་སུ་བསྟན། བདག་ནུབ་ཀྱི་བ་ལང་སྤྱོད་ཀྱི་གླིང་དུ་ཡང་སོང་སྟེ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་ནུབ་ཀྱི་བ་ལང་སྤྱོད་ཀྱི་གླིང་དུ་རྗེས་སུ་བསྟན། བདག་བྱང་གི་སྒྲ་མི་སྙན་གྱི་གླིང་དུ་ཡང་སོང་སྟེ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་བདག་གིས་བྱང་གི་སྒྲ་མི་སྙན་གྱི་གླིང་དུ་རང་གི་དཔུང་གི་ཚོགས་ལ་རྗེས་སུ་བསྟན་ན། སུམ་བཅུ་རྩ་གསུམ་པའི་ལྷ་ཚེ་རིང་བ། ཁ་དོག་དང་ལྡན་པ། བདེ་བ་མང་ཞིང་གཞལ་མེད་ཁང་མཐོན་པོ་ན་ཡུན་རིང་དུ་གནས་པ་དག་ཅིག་ཡོད་ཅེས་གྲག་གིས། མ་ལ་བདག་སུམ་བཅུ་རྩ་གསུམ་པའི་ལྷ་རྣམས་བལྟ་བའི་ཕྱིར་འགྲོའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དཔུང་གི་ཚོགས་བྱེ་བ་བརྒྱད་འབུམ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8243#UT22084-001-006-8243