Degé Kangyur volume 2, F.171.b

ཅི་བདག་གི་རྒྱལ་སྲིད་ཀྱི་མི་རྣམས་ཞིང་ལས་བྱེད་དམ། དེ་ནས་དེས་སྨྲས་པ། ལྷས་ས་བོན་གྱི་རིགས་ཉི་ཤུ་རྩ་བདུན་གྱི་ཆར་ཕོབ་ཤིག་ཅེས་བྱས་པ་དང་། རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་ལྷས་ས་བོན་གྱི་རིགས་ཉི་ཤུ་རྩ་བདུན་གྱི་ཆར་ཕབ་བོ། །​རྒྱལ་པོ་ང་ལས་ནུས་ཡུལ་མི་རྣམས་ལ་དྲིས་པ། འདི་དག་སུའི་བསོད་ནམས་ཀྱིས་བྱུང་། དེ་རྣམས་ཀྱིས་སྨྲས་པ། ལྷའི་ཡང་ལགས། བདག་ཅག་གི་ཡང་ལགས་སོ། །​ཡང་མི་དེ་རྣམས་རས་བལ་གྱི་ཞིང་རྨོ་བར་བརྩམས་པ་དང་། ཡང་རྒྱལ་པོ་ང་ལས་ནུ་ལྗོངས་རྒྱུར་སོང་བས་མཐོང་ནས། དེས་བློན་པོ་རྣམས་ལ་སྨྲས་པ། མི་འདི་རྣམས་ཅི་ཞིག་བྱེད། བློན་པོ་རྣམས་ཀྱིས་སྨྲས་པ། ལྷ་མི་འདི་རྣམས་ནི་རས་བལ་གྱི་ཞིང་རྨེད་ལགས་སོ། །​རྒྱལ་པོས་སྨྲས་པ། ཅི་ཞིག་ཏུ་དགོས། དེ་རྣམས་ཀྱིས་སྨྲས་པ། ལྷ་གོས་བགྱི་བའི་སླད་དུའོ། །​དེ་ནས་རྒྱལ་པོ་ང་ལས་ནུས་སྨྲས་པ། ཅི་ངའི་རྒྱལ་སྲིད་ཀྱི་མི་རྣམས་རས་བལ་གྱི་ཞིང་རྨེད་དམ། ལྷས་རས་བལ་ཁོ་ནའི་ཆར་ཕོབ་ཅིག་ཅེས་བྱས་པ་དང་། རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་ལྷས་རས་བལ་ཁོ་ནའི་ཆར་ཕབ་བོ། །​རྒྱལ་པོས་ཡུལ་མི་རྣམས་ལ་དྲིས་པ། འདི་དག་སུའི་བསོད་ནམས་ཀྱིས་བྱུང་། དེ་རྣམས་ཀྱིས་སྨྲས་པ། ལྷའི་ཡང་ལགས། བདག་ཅག་གི་ཡང་ལགས་སོ། །​ཡང་མི་དེ་རྣམས་རས་བལ་དེ་རྣམས་འཁལ་བར་བརྩམས་པ་དང་། རྒྱལ་པོས་སྨྲས་པ། མི་འདི་དག་ཅི་ཞིག་བྱེད། བློན་པོ་རྣམས་ཀྱིས་སྨྲས་པ། ལྷ་སྐུད་པ་འཚལ་བའི་སླད་དུ་རས་བལ་དེ་འཁལ་ལགས་སོ། །​རྒྱལ་པོས་སྨྲས་པ། ཅི་ངའི་རྒྱལ་སྲིད་ཀྱི་མི་རྣམས་རས་སྐུད་འཁལ་ལམ། ལྷས་རས་སྐུད་ཀྱི་ཆར་ཁོ་ན་ཕོབ་ཤིག་ཅེས་བྱས་པ་དང་། རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་ལྷས་རས་སྐུད་ཁོ་ནའི་ཆར་ཕབ་བོ། །​རྒྱལ་པོ་དེས་སྨྲས་པ། འདི་དག་སུའི་བསོད་ནམས་ཀྱིས་བྱུང་། དེ་རྣམས་ཀྱིས་སྨྲས་པ། ལྷའི་ཡང་ལགས། བདག་ཅག་གི་ཡང་ལགས་སོ། །​དེ་ནས་རིམ་གྱིས་རས་འཐག་པར་བརྩམས་པ་དང་། རྒྱལ་པོས་སྨྲས་པ། འདི་དག་ཅི་ཞིག་བྱེད། དེ་རྣམས་ཀྱིས་སྨྲས་པ། ལྷ་གོས་སུ་བགྱི་བའི་སླད་དུ་རས་འཐག་ལགས་སོ། །​རྒྱལ་པོས་བསམས་པ། ད་ཅི་ངའི་རྒྱལ་སྲིད་ཀྱི་མི་རྣམས་རས་འཐག་གམ་སྙམ་ནས།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8237#UT22084-001-006-8237