སྙུན་གསོས་ཀྱི་རྐྱེན་སྨན་གྱི་ཡོ་བྱད་རྣམས་འབུལ་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་ཅང་མི་གསུང་བས་གནང་ངོ་། །དེ་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཀོ་ས་ལའི་རྒྱལ་པོ་གསལ་རྒྱལ་གྱིས་ཟླ་བ་གསུམ་དུ་ཞལ་ཟས་རོ་བརྒྱ་དང་ལྡན་པ་གསོལ་ནས་དགེ་སློང་རེ་རེ་ལ་ཡང་འབུམ་རི་བའི་གོས་རེ་རེ་བསྐོན་ཏེ། འབྲུ་མར་གྱི་བུམ་པ་བྱེ་བ་བསོགས་ནས་མར་མེའི་ཕྲེང་བ་བལྟམ་པར་བརྩམས་སོ། །དེ་ན་གདུགས་ཚོད་ཀྱི་ཁ་དང་། མཆོད་པའི་ཚེ་ཅ་ཅོའི་སྒྲ་ཆེན་པོ་གྲག་པ་དང་། ཅི་ཙམ་ན་གྲོང་ཉུག་མ་ཤིན་ཏུ་སྡུག་བསྔལ་བ་ཞིག་རྫའི་ཆག་དུམ་ཞིག་ཐོགས་ཏེ་སློང་བ་ལ་ཞུགས་པ་དེས་སྒྲ་ཆེན་པོ་དང་སྒྲ་མཐོན་པོ་ཐོས་སོ། །ཐོས་ནས་ཀྱང་དྲིས་པ། ཤེས་ལྡན་དག་སྒྲ་མཐོན་པོ་དང་སྒྲ་ཆེན་པོ་འདི་ཅི་ཞིག་ཡིན། གཞན་དག་གིས་སྨྲས་པ། ཀོ་ས་ལའི་རྒྱལ་པོ་གསལ་རྒྱལ་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཟླ་བ་གསུམ་དུ་གདུགས་ཚོད་གསོལ་ནས་དགེ་སློང་རེ་རེ་ལ་ཡང་འབུམ་རི་བའི་གོས་རེ་རེ་བསྐོན་ཏེ། འབྲུ་མར་གྱི་བུམ་པ་བྱེ་བ་བསོགས་ཏེ་མར་མེའི་ཕྲེང་བ་གཏོང་བར་རྩོམ་པ་ཡིན་ནོ། །དེ་ནས་གྲོང་ཉུག་མ་དེ་འདི་སྙམ་དུ་སེམས་ཏེ། ཀོ་ས་ལའི་རྒྱལ་པོ་གསལ་རྒྱལ་འདི་བསོད་ནམས་ཀྱིས་ངོམས་མི་ཤེས་ནས་ད་དུང་ཡང་སྦྱིན་པ་དག་གཏོང་བསོད་ནམས་དག་བྱེད་ན། མ་ལ་བདག་གིས་ཀྱང་འགའ་ཞིག་ལས་བསླངས་ལ་བཅོམ་ལྡན་འདས་ལ་མེ་མར་ཞིག་བལྟམ་མོ་སྙམ་ནས། དེས་བསླངས་པའི་འབྲུ་མར་ཉུང་ཟད་སྣོད་གྱོ་རལ་གྱི་ནང་དུ་བླུགས་ཏེ་བཅོམ་ལྡན་འདས་ཀྱི་འཆག་སའི་སླད་དུ་མར་མེ་བལྟམ་ནས། ཞབས་གཉིས་ལ་གཏུགས་ཏེ་སྨོན་ལམ་བཏབ་པ། དགེ་བའི་རྩ་བ་འདིས་ཇི་ལྟར་སྟོན་པ་བཅོམ་ལྡན་འདས་ཤཱཀྱ་ཐུབ་པ་འདི་སྐྱེ་དགུའི་ཚེ་ལོ་བརྒྱ་ཐུབ་པ་ན་འཇིག་རྟེན་དུ་བྱུང་བ་དེ་བཞིན་དུ་བདག་ཀྱང་སྐྱེ་དགུའི་ཚེ་ལོ་བརྒྱ་ཐུབ་པ་ན་སྟོན་པ་ཤཱཀྱ་ཐུབ་པ་ཞེས་བྱ་བ་ཁོ་ནར་འགྱུར་ཞིང་། ཡང་ཇི་ལྟར་འདིའི་ཟུང་མཆོག་དང་ཟུང་བཟང་པོ་ཤཱ་རིའི་བུ་དང་། མཽད་གལ་གྱི་བུ་དང་། ཉེ་གནས་དགེ་སློང་ཀུན་དགའ་བོ་དང་། ཡབ་ཟས་གཙང་དང་། ཡུམ་ལྷ་མོ་སྒྱུ་འཕྲུལ་ཆེན་མོ་དང་། སྲས་གཞོན་ནུ་སྒྲ་ཅན་ཟིན་བཟང་པོ་དང་། གྲོང་ཁྱེར་སེར་སྐྱའི་གཞི་ལགས་པ་དེ་བཞིན་དུ་བདག་གི་ཡང་ཟུང་མཆོག་དང་ཟུང་བཟང་པོ་ཤཱ་རིའི་བུ་དང་།