དུང་དང་། རྔ་ཕ་ཊ་ཧ་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དག་བུན་ལོང་ཞིང་། མི་བཞིས་བཏེག་ནས་མགྱོགས་མིས་ནི་སྣ་དྲངས། སྐྱེས་བུ་ལག་ན་ཤིང་ཐོགས་པ་ནི་ཕྱི་བཞིན་འབྲང་ཞིང་ཀྱི་ཧུད་ཕ། ཀྱི་ཧུད་སྡུག་པ། ཀྱི་ཧུད་སྤུན། ཀྱི་ཧུད་ཇོ་བོ་ཞེས་ཀུན་དུ་ངུད་མོའི་སྒྲ་འདོན་པ་མཐོང་ངོ་། །མཐོང་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་རས་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ཀྱིས་ཁྱོགས་བརྒྱན་ཅིང་ཞེས་བྱ་བ་ནས། ངུད་མོའི་སྒྲ་འདོན་པ་འདི་ཅི་ཞིག་ཡིན་ཞེས་བྱ་བའི་བར་གོང་མ་བཞིན་དུའོ། །བློན་པོ་རྣམས་ཀྱིས་སྨྲས་པ། ལྷ་འདི་ནི་གུམ་པ་ཞེས་བགྱིའོ། །རྒྱལ་པོས་སྨྲས་པ། ཤེས་ལྡན་དག་ང་ལ་ཡང་འདི་ལྟ་བུའི་ཆོས་འབྱུང་བར་འགྱུར་རམ། དེ་རྣམས་ཀྱིས་སྨྲས་པ། ལྷ་ཆོས་འདི་ནི་ཐུན་མོང་ལགས་སོ། །དེ་ནས་རྒྱལ་པོས་རྒས་པ་དང་། ནད་པ་དང་། ཤི་བ་ཡང་དག་པར་མཐོང་ནས་ཡིད་བྱུང་སྟེ། བདག་གིས་ཀྱང་འདི་ལྟ་བུའི་ལོངས་སྤྱོད་རྣམས་སྤང་དགོས་སོ་སྙམ་ནས་སླར་ལོག་སྟེ། མྱ་ངན་གྱི་ཁང་པར་ཞུགས་ནས་འདུག་གོ། །དེའི་ཡུལ་ན་བྲམ་ཟེ་དུས་དཔོག་ཅེས་བྱ་བ་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་ཡོད་དེ། དེས་ཇི་ལྟར་རྒྱལ་པོས་རྒས་པ་དང་། ནད་པ་དང་། ཤི་བ་མཐོང་སྟེ་ཡིད་བྱུང་ནས་མྱ་ངན་གྱི་ཁང་པར་ཞུགས་ནས་འདུག་པ་ཐོས་སོ། །ཐོས་ནས་ཀྱང་བྲམ་ཟེ་བརྒྱ་སྟོང་དུ་མས་ཡོངས་སུ་བསྐོར་ཅིང་ཤིང་རྟ་རྟ་རྒོད་མ་དང་ལྡན་པ་ཐམས་ཅད་ནས་དཀར་བའི་ནང་དུ་ཞུགས་ཏེ། གསེར་གྱི་ཁར་བ་དང་རིལ་བ་སྤྱི་བླུགས་ཐོགས་ནས་རྒྱལ་པོ་སྨྱུག་སྦམས་གང་ན་བ་དེར་སོང་སྟེ་ཕྱིན་པ་དང་། རྒྱལ་པོ་ལ་བློན་པོ་རྣམས་ཀྱིས་སྨྲས་པ། ལྷ་བྲམ་ཟེ་དུས་དཔོག་ཆབ་སྒོ་ན་མཆིས་སོ། །དེ་ནས་རྒྱལ་པོ་ཕྱིར་བྱུང་ནས་དཀོར་ཁང་དུ་འདུག་པ་དང་། བྲམ་ཟེ་དུས་དཔོག་གིས་རྒྱལ་བ་དང་ཚེ་སྤེལ་བ་དག་བྱས་ཏེ་འདུག་ནས་སྨྲས་པ། ལྷ་ཅིའི་སླད་དུ་ཐུགས་ངན་གྱི་ཁང་པར་ཞུགས་ཏེ་བཞུགས། རྒྱལ་པོས་ཇི་ལྟར་གྱུར་པ་ཐམས་ཅད་བྲམ་ཟེ་དུས་དཔོག་ལ་རྒྱས་པར་སྨྲས་པ་དང་། དེས་སྨྲས་པ་ལྷ་འཇིག་རྟེན་ནི་རང་གི་ལས་ཀྱི་འབྲས་བུ་ལ་སྤྱོད་པ་ལགས་པས་འདི་ལ་ཐུགས་ངན་བགྱིར་མ་མཆིས་སོ།