Degé Kangyur volume 2, F.151.b

།གང་ཡང་ང་ལ་སེམས་མངོན་པར་དད་པར་བྱས་པས་དེས་ན་རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་པར་གྱུར་ཏོ། །​གང་ཡང་དག་པར་རྫོགས་པའི་སངས་རྒྱས་འོད་སྲུང་ལས་ཚངས་པར་སྤྱོད་པ་སྤྱད་པས་དེས་ན་ད་ལྟར་བདེན་པ་མཐོང་བར་བྱས་སོ། །​དགེ་སློང་དག་དེ་ལྟ་བས་ན་གཅིག་ཏུ་གནག་པ་རྣམས་ཀྱི་ལས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་བརྩོན་པར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །​ཞེས་དེ་སྐད་ཅེས་བཀའ་སྩལ་ཏོ་ཞེས་བྱ་བའི་བར་གོང་མ་བཞིན་དུའོ། །​དེ་ནས་བཅོམ་ལྡན་འདས་ཆུ་བོ་གང་གཱ་རྒལ་བ་དང་། དེ་ན་ངང་པ་དང་། ཉ་དང་རུ་སྦལ་ལྔ་བརྒྱས་བསྐོར་ཏེ་བསྐོར་བ་བྱས་སོ། །​དེ་རྣམས་ལ་བཅོམ་ལྡན་འདས་ཀྱིས་ཚིག་གསུམ་གྱི་ཆོས་བཤད་པ་མཛད་དེ། བཞིན་བཟངས་དག་འདི་ལྟར་འདུ་བྱེད་ཐམས་ཅད་ནི་མི་རྟག་པའོ། །​ཆོས་ཐམས་ཅད་ནི་བདག་མེད་པའོ། །​མྱ་ངན་ལས་འདས་པ་ནི་ཞི་བ་ཡིན་པས་ང་ལ་སེམས་མངོན་པར་དད་པར་གྱིས་ལ། ཅི་ནས་ཀྱང་དུད་འགྲོའི་སྐྱེ་གནས་ལ་འདོད་ཆགས་དང་བྲལ་བར་གྱིས་ཤིག །​དེ་རྣམས་འདི་སྙམ་དུ་སེམས་ཏེ། གང་བདག་ཅག་གིས་བཅོམ་ལྡན་འདས་ལས་ཚིག་གསུམ་གྱི་ཆོས་ཐོས་ནས་ཁ་ཟས་ཟ་བར་བྱེད་པ་ནི་བདག་ཅག་གི་ཆ་མ་ཡིན་ནོ་སྙམ་ནས། དེ་རྣམས་ཀྱིས་བཟས་བཅད་པ་དང་། དུད་འགྲོའི་སྐྱེ་གནས་སུ་སོང་བ་རྣམས་ནི་མེའི་ཤས་ཆེ་བས་དུས་ལས་འདས་ཏེ་ཤི་འཕོས་པ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་སོ། །​ཆོས་ཉིད་ཀྱིས་ལྷའི་བུའམ་ལྷའི་བུ་མོ་སྐྱེས་ནས་རིང་པོ་མ་ལོན་པར་སེམས་གསུམ་སྐྱེ་བར་འགྱུར་ཏེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་ཡིན་པའོ། །​དེ་རྣམས་ཀྱིས་བལྟས་ན་དུད་འགྲོ་དག་ལས་ཤི་འཕོས་ནས་རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་པ་དང་ཞེས་བྱ་བ་ནས། མེ་ཏོག་མན་དཱ་ར་བས་ཐུ་བ་བཀང་སྟེ་བཅོམ་ལྡན་འདས་ཀྱི་ཉེ་འཁོར་དང་ཆུ་བོ་གང་གཱ་སྣང་བས་གསལ་བར་བྱས་ནས་བཅོམ་ལྡན་འདས་ལ་མེ་ཏོག་གིས་གཏོར་ཏེ། བཅོམ་ལྡན་འདས་ལ་ཀུན་ནས་བསྐོར་ཏེ་འདུག་གོ། །​བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང་། བག་ལ་ཉལ་དང་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8197#UT22084-001-006-8197