Degé Kangyur volume 2, F.150.b

།དུས་གཞན་ཞིག་ན་དེ་གཉིས་ཕན་ཚུན་དུ་རྩོད་པ་བྱུང་ནས་དོན་དེའི་ཕྱིར་དེ་གཉིས་དེའི་དྲུང་དུ་དོང་ནས་རྐང་པ་ལ་ཕྱག་བྱས་ཏེ་སྨྲས་པ། བདག་ཅག་གཉིས་ལ་འདི་དང་འདི་ལྟ་བུའི་རྩོད་པ་བྱུང་ན་ཞི་བར་མཛད་དུ་གསོལ། དེས་བསམས་པ། གལ་ཏེ་བདག་གིས་འདི་གཉིས་ཀྱི་རྩོད་པ་དེང་ཁོ་ན་ཞི་བར་བྱས་ན་རག་མ་ལས་པས་འདི་གཉིས་ཕྱིས་འོང་བར་མི་འགྱུར་རོ་སྙམ་ནས། དེས་དགེ་འདུན་ཐམས་ཅད་བསོགས་ནས་རྩོད་པ་དེ་དགེ་འདུན་གྱི་ནང་དུ་གླེངས་ནས་ཆད་པར་ནི་མ་བྱས་སོ། །​ཕྱི་དེ་ཉིན་ཡང་དེ་ལ་རི་འོར་དུ་དོགས་པ་ཞིག་བྱུང་ནས་དེ་དེར་སོང་བ་དང་། དེ་ནས་དེ་གཉིས་ཀྱིས་ཐོགས་སོ་ཞེས་དགེ་འདུན་གྱི་ནང་དུ་རྩོད་པ་དེ་གླེངས་ནས་དེ་ནས་དགེ་འདུན་གྱིས་ཞི་བར་བྱས་སོ། །​ཇི་ཙམ་ན་དགེ་སློང་སྡེ་སྣོད་གསུམ་པ་དེ་རི་འོར་དེ་ནས་འོངས་ཏེ་ལམ་གྱིས་དུབ་པ་བསལ་ནས་ལྷན་ཅིག་གནས་པ་དང་ཉེ་གནས་རྣམས་ལ་དྲིས་པ་རེ་ཞིག་རྩོད་པ་དང་རྩོད་ཟླ་གཉིས་མི་འོང་ངམ། དེ་རྣམས་ཀྱིས་སྨྲས་པ། མཁན་པོ་དེ་གཉིས་ཀྱི་རྩོད་པ་དེ་ཞི་བར་བགྱིས་ལགས་སོ། །​སུ་ཞིག་གིས་ཞི་བར་བྱས། དགེ་འདུན་གྱིས་སོ། །​ཇི་ལྟར་བྱས། དེ་རྣམས་ཀྱིས་རྒྱས་པར་སྨྲས་པ་དང་། དེས་ངག་རྩུབ་པོའི་ལས་བྱུང་བ། ཚེ་དང་ལྡན་པ་དག་མི་ཤེས་ཏེ། ཇི་ལྟར་གནག་རྫི་རྣམས་ཀྱི་ལྟར་རྩོད་པ་དེ་ཞི་བར་བྱས་སོ། །​དེ་རྣམས་ཀྱིས་ཀྱང་མཁན་པོ་དེ་དེ་བཞིན་ཏེ། ཇི་ལྟར་གནག་རྫི་རྣམས་ཀྱི་ལྟར་རྩོད་པ་ཞི་བར་བགྱིས་སོ་ཞེས་མཐུན་པར་སྨྲས་སོ། །​དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ན་དགེ་སློང་སྡེ་སྣོད་གསུམ་པ་གང་ཡིན་པ་དེ་ནི་གནག་རྫི་དགའ་བོ་འདི་ཉིད་ཡིན་ནོ། །​དེའི་ལྷན་ཅིག་གནས་པ་དང་ཉེ་གནས་ལྔ་བརྒྱ་པོ་གང་ཡིན་པ་དེ་དག་ནི་གནག་རྫི་ལྔ་བརྒྱ་པོ་འདི་དག་ཉིད་ཡིན་ནོ། །​གང་ཡང་འདིས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཉན་ཐོས་ཀྱི་དགེ་འདུན་ལ་གནག་རྫི་ཞེས་བྱ་བའི་ཚིག་སྨྲས་ཤིང་། ལྷན་ཅིག་གནས་པ་དང་ཉེ་གནས་རྣམས་ཀྱིས་ཀྱང་མཐུན་པར་སྨྲས་པས། ལས་དེའི་རྣམ་པར་སྨིན་པས་ཚེ་རབས་ལྔ་བརྒྱར་འཁོར་ལྔ་བརྒྱ་དང་གནག་རྫི་རྣམས་སུ་སྐྱེས་པར་གྱུར་ཏོ། །



The English translation of this folio by 84000 - Translating the words of the Buddha can be found at:
https://read.84000.co/translation/toh1-6.html?part=UT22084-001-006-8195#UT22084-001-006-8195