།དེ་ནས་བཅོམ་ལྡན་འདས་ཀྱིས་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་རྒྱལ་པོ་བྲམ་ཟེ་མེས་སྦྱིན་གྱི་དྲུང་དུ་སོང་ལ་ནད་མེད་པར་གྱུར་ཅིག་ཅེས་བྱོས་ལ་འདི་སྐད་ཅེས་རྒྱལ་པོ་ཆེན་པོ་ཁྱེད་ཀྱི་ཡུལ་དུ་ཁོ་བོས་ཟླ་བ་གསུམ་གནས་ཟིན་ཏེ་འགྲོས་ཤེས་པར་གྱིས་ཤིག་ཅེས་ཀྱང་སྨྲོས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས། རྒྱལ་པོ་བྲམ་ཟེ་མེས་སྦྱིན་གྱི་ཁྱིམ་གང་ན་བ་དེར་སོང་བ་དང་། དེའི་ཚེ་རྒྱལ་པོ་བྲམ་ཟེ་མེས་སྦྱིན་བཀྲ་ཤིས་འོང་བ་ལ་སྡོད་ཅིང་འདུག་གོ། །དེ་ནས་ཚེ་དང་ལྡན་པ་ཀུན་དགའ་བོས་སྒོ་བའི་སྐྱེས་པ་ལ་སྨྲས་པ། ཀྱེ་ནང་རྗེ་ཚུར་ཁྱོད་རྒྱལ་པོ་བྲམ་ཟེ་མེས་སྦྱིན་གང་ན་བ་དེར་སོང་ལ་ཕྱིན་ནས་རྒྱལ་པོ་བྲམ་ཟེ་མེས་སྦྱིན་ལ་འདི་སྐད་ཅེས་དགེ་སློང་ཀུན་དགའ་བོ་ལྷ་མཐོང་བར་འཚལ་ནས་སྒོ་ན་སྡོད་ཅིང་མཆིས་སོ་ཞེས་སྨྲོས་ཤིག །འཕགས་པ་བཀའ་བཞིན་འཚལ་ཞེས་སྒོ་བའི་སྐྱེས་པས་ཚེ་དང་ལྡན་པ་ཀུན་དགའ་བོའི་ལྟར་མཉན་ནས་རྒྱལ་པོ་བྲམ་ཟེ་མེས་སྦྱིན་གང་ན་བ་དེར་སོང་སྟེ་ཕྱིན་ནས། རྒྱལ་པོ་བྲམ་ཟེ་མེས་སྦྱིན་ལ་འདི་སྐད་ཅེས་སྨྲས་སོ། །ལྷ་དགེ་སློང་འཕགས་པ་ཀུན་དགའ་བོ་ལྷའི་ཞལ་མཐོང་བར་འཚལ་ནས་སྒོ་ན་སྡོད་ཅིང་མཆིས་སོ། །དེས་སྨྲས་པ། ཀྱེ་སྐྱེས་བུ་ང་བཀྲ་ཤིས་འོང་བ་སྡོད་ཅིང་འདུག་གིས་དགེ་སློང་ཀུན་དགའ་བོ་ནི་བསོད་ནམས་ཀྱི་མཐུ་ཆེན་པོ་དང་ལྡན་པ་ཡིན་ཏེ། དེ་ཉིད་ངའི་བཀྲ་ཤིས་སུ་གྱུར་ཅིག ། དེ་ལ་ནི་བཟང་པོ་ལྔ་ཡོད་དེ། མིང་བཟང་བ་དང་། གཟུགས་བཟང་བ་དང་། ཁ་དོག་བཟང་བ་དང་། སྤོབས་པ་བཟང་བ་དང་། སྒྲུབ་པ་བཟང་བ་ཡིན་གྱིས་ནང་དུ་སྤྱོན་ཅིག །ཤེས་ལྡན་ཀུན་དགའ་བོ་ལ་སུ་ཞིག་འགོག །སྒོ་བས་ཚེ་དང་ལྡན་པ་ཀུན་དགའ་བོ་ལ་དེ་བཞིན་དུ་སྨྲས་ནས་ཚེ་དང་ལྡན་པ་ཀུན་དགའ་བོ་ནང་དུ་ཞུགས་སོ། །མཐའི་རྒྱལ་ཕྲན་གྱི་ཕོ་ཉ་དེ་རྣམས་ཀྱང་དེ་ཉིད་དང་ལྷན་ཅིག་ནང་དུ་ཞུགས་སོ། །དེ་ནས་ཚེ་དང་ལྡན་པ་ཀུན་དགའ་བོས་རྒྱལ་པོ་བྲམ་ཟེ་མེས་སྦྱིན་ལ་ནད་མེད་པར་གྱུར་ཅིག་ཅེས་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་རྒྱལ་པོ་བྲམ་ཟེ་མེས་སྦྱིན་ལ་འདི་སྐད་ཅེས་སྨྲས་སོ།