བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་དགུང་ཟླ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་སྨན་གྱི་རྐྱེན་སྨན་གྱི་ཡོ་བྱད་རྣམས་དང་། སྨན་པའི་རྒྱལ་པོ་རྒྱུན་ཤེས་ཀྱི་བུ་དབུལ་ན་བདག་ལ་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་ཅང་མི་གསུང་བས་གནང་ངོ་། །དེ་ནས་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་སོང་ངོ་། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཀོ་ས་ལའི་རྒྱལ་པོ་གསལ་རྒྱལ་གྱིས་ཟླ་བ་གསུམ་དུ་ཡོ་བྱད་ཐམས་ཅད་དང་། སྨན་པའི་རྒྱལ་པོ་རྒྱུན་ཤེས་ཀྱི་བུས་རིམ་གྲོ་ཁོ་ན་བྱས་སོ། །ཀོ་ས་ལའི་རྒྱལ་པོ་གསལ་རྒྱལ་གྱི་ཀུན་དུ་སྤྱོད་པ་ནི་ནང་པར་སྔར་ལངས་ཏེ། བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་དགེ་སློང་ནད་པ་ལ་ལྟ་བ་ཡིན་ནོ། །ཇི་ཙམ་ན་དགེ་སློང་གཞན་ཞིག་གཞང་འབྲུམ་གྱིས་ཐེབས་ནས་དེ་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། ན་བས་ཉམ་དམས་པར་གྱུར་པ་དེ་ཀོ་ས་ལའི་རྒྱལ་པོ་གསལ་རྒྱལ་གྱིས་མཐོང་ནས་སྨྲས་པ། འཕགས་པ་ཁྱོད་ཅིའི་ཕྱིར་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། ན་བས་ཉམ་དམས་པར་གྱུར། ལྷ་བདག་གཞང་འབྲུམ་གྱིས་ཐེབས་སོ། །དེ་ནས་རྒྱལ་པོས་སྨན་པའི་རྒྱལ་པོ་རྒྱུན་ཤེས་ཀྱི་བུ་ལ་བསྒོ་བ། དགེ་སློང་འདིའི་དཔྱད་བྱོས་ཤིག །ལྷ་བཀའ་བཞིན་འཚལ། དེ་མ་དད་པས་དེས་མ་བྱས་སོ། །ཇི་ཙམ་ན་རྒྱལ་པོས་ཡང་དགེ་སློང་དེ་མཐོང་ནས་སྨྲས་པ། འཕགས་པ་ཁྱོད་རྒྱུན་ཤེས་ཀྱི་བུས་དཔྱད་མ་བགྱིས་སམ། ལྷ་མ་བགྱིས་སོ། །དེ་ནས་རྒྱལ་པོ་ཁྲོས་ཏེ་རྒྱུན་ཤེས་ཀྱི་བུ་ཕོ་ཉས་བཀུག་ནས་བསྒོ་བ། གལ་ཏེ་ཁྱོད་ཀྱིས་དགེ་སློང་འདིའི་དཔྱད་བྱས་ན་དེ་ལྟ་ན་ལེགས། གལ་ཏེ་མ་བྱས་ན་ཁྱོད་ཀྱི་དབང་ཐང་གཅད་དོ། །དེ་རང་བཞིན་གྱིས་མ་དད་པ་ཞིག་པས་ཆེར་འཁྲུགས་ནས། དགེ་སྦྱོང་མགོ་རེག་འདིའི་ཕྱིར་ལྷས་བདག་གི་དབང་ཐང་གཅོད་པར་འགྱུར་རོ་ཞེས་དེས་དགེ་སློང་དེ་རྒྱལ་བུ་རྒྱལ་བྱེད་ཀྱི་ཚལ་གྱི་སྒོར་བཟོ་བཅོས་བྱས་ནས་དེ་དང་དེ་ནས་མཚོན་གྱི་ལས་བྱ་བར་བརྩམས་སོ།