ཀུན་དགའ་བོ་དེ་ལྟར་ན་དྲན་པ་ཉེ་བར་གཞག་པ་བཞིའི་དབང་དུ་བྱས་ཏེ། བསྒོམས་པ་ཡིན་ནོ། །དེ་ནས་བཅོམ་ལྡན་འདས་རི་འོར་ཞིག་ཏུ་བྱོན་ཏོ། །རི་འོར་དེ་ན་ཚེ་དང་ལྡན་པ་མཽད་གལ་གྱི་བུ་ཆེན་པོའི་ཞང་པོ་དྲང་སྲོང་རྣམས་ཀྱི་ནང་དུ་རབ་ཏུ་བྱུང་བ་དེ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདུལ་བར་འགྱུར་བས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཞང་པོ་ལ་སོམས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ཀྱི་ལྟར་མཉན་ཏེ། དེའི་གདུལ་བའི་དུས་ཤེས་ནས་དྲང་སྲོང་རྣམས་ཀྱི་བསྟི་གནས་སུ་འཇུག་པར་བརྩམས་སོ། །དེ་ནས་དྲང་སྲོང་དེས་སྨྲས་པ། དགེ་སྦྱོང་འདུག་ཤིག །བྲམ་ཟེ་རྣམས་ཀྱི་བསྟི་གནས་འདིར་མ་འཇུག་ཤིག །དེས་སྨྲས་པ། ང་ཡང་བྲམ་ཟེ་ཡིན་ནོ། །དྲང་སྲོང་དེས་ཚིགས་སུ་བཅད་དེ་སྨྲས་པ། བྲམ་ཟེ་ཁྱོད་ལ་བསང་བྱེད་མེད། །བླུགས་གཟར་ཡང་ནི་ཡོད་མ་ཡིན། །ཁྱོད་ནི་མགོ་རེག་མེ་མཆོད་མིན། །བྲམ་ཟེ་བདག་ཅེས་ཅི་སྟེ་སྨྲ། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཀྱང་ཚིགས་སུ་བཅད་དེ་སྨྲས་པ། བྲམ་ཟེ་ང་ཡི་ངོ་ཚ་ཤེས། །བསང་བྱེད་བླུགས་གཟར་ཤེས་རབ་ཉིད། །ཆུ་རྒྱུན་རྟག་འབབ་དད་པ་ནི། །ང་ཡི་རིལ་བ་སྤྱི་བླུགས་ཡིན། །ནང་དུ་ལེགས་པར་མཉམ་བཞག་པའི། །བདེན་པ་ཁོ་བོ་མེ་མཆོད་དེ། །ཡང་དག་སྡོམ་དང་དུལ་བ་ཡིས། །ཉིན་མཚན་དུ་ནི་སྦྱིན་སྲེག་བྱེད། །གལ་ཏེ་དེ་ལྟར་གྱུར་ན་ཡང་དགེ་སྦྱོང་མགོ་རེག་ལ་ནི་འདིར་སྐབས་མི་འབྱེད་དོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་རླུང་དང་ཆར་དྲག་བཏང་ནས་མཚོ་བྲན་དང་ཉེ་བ་ཞིག་ཏུ་སོང་ནས་ཤིང་ཞིག་གི་དྲུང་དུ་རྟེན་ཅིང་འདུག་གོ། །དེ་ནས་ཀླུའི་རྒྱལ་པོ་དགའ་བོ་དང་ཉེ་དགའ་བོའི་འཁོར་ཞིག་གནས་པ་དེས་བསམས་པ། འདི་ནི་འཕགས་པ་མཽད་གལ་གྱི་བུ་ཆེན་པོ་ཡིན་ཏེ། ཀླུའི་རྒྱལ་པོ་དགའ་བོ་དང་ཉེ་དགའ་བོ་གཉིས་ཀྱིས་བླ་མར་བྱ་བ་ཡིན་གྱིས། མ་ལ་བདག་གིས་འདིའི་མཆོད་པ་བྱ་བ་ལ་བརྩོན་པར་བྱའོ་སྙམ་སྟེ། ཀླུ་དེ་གནས་ནས་བྱུང་ནས་ཚེ་དང་ལྡན་པ་མཽད་གལ་གྱི་བུ་ཆེན་པོའི་ལུས་ལ་ལན་བདུན་དུ་དཀྲིས་ཏེ་སྟེང་ནས་མགོའི་གདེངས་ཀ་ཆེན་པོ་བྱས་ནས་འདུག་གོ།