།དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པས་བཀའ་སྩལ་པ་དེའི་དོན་ཅི་ལགས། ཀུན་དགའ་བོ་ཁྱོད་ཀྱིས་རྒྱལ་རིགས་ཀྱི་ཁྱེའུ་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་སེམས་དང་བ་བསྐྱེད་པ་གང་ཡིན་པ་དེ་མཐོང་ངམ། བཅོམ་ལྡན་འདས་མཐོང་ལགས་སོ། །དེ་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་སེམས་དང་བ་བསྐྱེད་ནས་མཉན་ཡོད་ནས་བྱུང་སྟེ་ཤིང་དྲུང་ཞིག་ཏུ་ཉལ་བ་ལས་མཉན་ཡོད་ཀྱི་བྲམ་ཟེ་དང་ཁྱིམ་བདག་དག་གིས་ཚོང་དཔོན་དུ་དབང་བསྐུར་ནས། དེ་མཐོང་བའི་ཆོས་ཁོ་ན་ལ་ལོངས་སྤྱོད་མངོན་པར་འཕེལ་བར་གྱུར་ཏོ། །ངས་དེ་ལས་དགོངས་ནས། ཆོས་རྣམས་སྔོན་དུ་ཡིད་འགྲོ་ཡིད་གཙོ་ཡིན། །ཞེས་བྱ་བ་ནས་སྔ་མ་བཞིན་དུ་འཐོབ་འགྱུར་གྲིབ་མ་ཡོལ་བར་མི་འགྱུར་བཞིན། །ཞེས་བྱ་བའི་བར་གསུངས་སོ། །གདུ་བུ་ཅན་དུ་བྱོན་ནས་གདུ་བུ་ཅན་དུ་སངས་རྒྱས་བཞིའི་གདན་ཞེས་བྱ་བ་རྒྱས་པར་གོང་མ་བཞིན་དུའོ། །ས་ཅན་དུ་བྱོན་ནས་ས་ཅན་དུ་སངས་རྒྱས་བཞིའི་གདན་ཞེས་བྱ་བ་གོང་མ་བཞིན་དུའོ། །སེང་གེ་ཅན་གྱི་གྲོང་དུ་བྱོན་ནས་སེང་གེ་ཅན་གྱི་གྲོང་དུ་སངས་རྒྱས་བཞིའི་གདན་ཞེས་བྱ་བ་རྒྱས་པར་གོང་མ་བཞིན་དུའོ། །གྲོང་གསར་དུ་བྱོན་ནས་གྲོང་གསར་དུ་སངས་རྒྱས་བཞིའི་གདན་ཞེས་བྱ་བ་གོང་མ་བཞིན་དུའོ། །གྲོང་ཁྱེར་ཅན་དུ་བྱོན་ནས་གྲོང་ཁྱེར་ཅན་དུ་སངས་རྒྱས་བཞིའི་གདན་ཞེས་བྱ་བ་གོང་མ་བཞིན་དུའོ། །རྒྱལ་པོའི་ཁབ་ཏུ་བྱོན་ནས་དེའི་ཚེ་ཀུན་དུ་རྒྱུ་ཁྲིའུ་བརྩེགས་ཞེས་བྱ་བ་མ་ག་དྷཱ་བཟང་མོའི་རྫིང་གི་འགྲམ་ན་གནས་ཏེ། དེ་མཚན་མོ་མཆིལ་པས་ཉ་བཤོར་ཅིང་ཟ་བར་བྱེད་དོ། །དེ་ནམ་ལངས་ནས་ནི་ཁྲིའུའི་སྟེང་དུ་ཁྲིའུ་བཞག་པ་ལ་འདུག་ནས་ཚིགས་སུ་བཅད་པས་སྨྲ་སྟེ། ཆོས་ཀྱི་ཆོས་མཆོག་གིས་འཚོ་སྲོག་ཆགས་དག །འགའ་ལ་ཡང་འཚེ་མི་བྱེད་དགེ་སློང་འགྱུར། །ཞི་བའི་ཡིད་ཀྱིས་སྤོང་དང་བརྟུལ་ཞུགས་སྤྱད། །དུལ་བ་དེ་ནི་ཞི་བའི་རྗེས་སུ་མཐུན། །བཅོམ་ལྡན་འདས་ཀྱིས་དེའི་གདུལ་བའི་དུས་མཁྱེན་ནས་དེའི་དྲུང་དུ་གཤེགས་ཏེ་བཀའ་སྩལ་པ།