།བཙུན་པ་བཅོམ་ལྡན་འདས་བདག་ཅག་དགེ་སློང་རབ་ཏུ་མང་པོ་འདིར་སྔ་དྲོ་ཤམ་ཐབས་འཚལ་ལྷུང་བཟེད་དང་ཆོས་གོས་ཐོགས་ནས་སྒྲ་ཅན་དུ་བསོད་སྙོམས་ཀྱི་ཕྱིར་ཞུགས་ཏེ། བཙུན་པ་བདག་ཅག་དགེ་སློང་རབ་ཏུ་མང་པོ་སྒྲ་ཅན་དུ་བསོད་སྙོམས་ཀྱི་ཕྱིར་རྒྱུ་བ་ན་སྒྲ་ཅན་འདིར་སྐྱེ་བོའི་ཚོགས་ལ་མི་ངས་བྱུང་ནས། དེའི་ཚེ་དགེ་བསྙེན་བརྟན་པ་ཡང་གུམ། ཉེ་བ་དང་ལྷག་པར་བརྩོན་དང་བརྩོན་པའི་ཁྱུ་མཆོག་དང་། མཛེས་པ་དང་ཉེ་མཛེས་དང་ཡིད་འོང་དང་ཉེ་བར་ཡིད་འོང་དང་བཟང་པོ་དང་ཤིན་ཏུ་བཟང་དང་། གྲགས་པ་དང་གྲགས་བྱིན་དང་དགེ་བསྙེན་གྲགས་མཆོག་ཀྱང་གུམ་མོ་ཞེས་ཐོས་ལགས་ན། བཙུན་པ་དེ་རྣམས་ཀྱི་འགྲོ་བ་ནི་གང་སྐྱེ་བ་ནི་གང་། སྔོན་དུ་འགྲོ་བ་ནི་གང་ལགས། དགེ་སློང་དག་དགེ་བསྙེན་བརྟན་པ་ནི་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་རྣམས་སྤངས་པས་རྫུས་ཏེ་སྐྱེས་ཏེ་དེར་ཡོངས་སུ་མྱ་ངན་ལས་འདའ་ཞིང་འཇིག་རྟེན་འདིར་ཡང་ཕྱིར་མི་ལྡོག་པའི་ཆོས་ཅན་གྱི་ཕྱིར་མི་འོང་བར་འགྱུར་རོ། །ཉེ་བ་དང་ལྷག་པར་བརྩོན་དང་བརྩོན་པའི་ཁྱུ་མཆོག་དང་མཛེས་པ་དང་ཉེ་མཛེས་དང་ཡིད་འོང་དང་ཉེ་བར་ཡིད་འོང་དང་བཟང་པོ་དང་ཤིན་ཏུ་བཟང་དང་གྲགས་པ་དང་གྲགས་བྱིན་དང་། དགེ་བསྙེན་གྲགས་མཆོག་ཀྱང་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་སྤངས་པས་རྫུས་ཏེ་སྐྱེས་ཏེ་དེར་ཡོངས་སུ་མྱ་ངན་ལས་འདའ་ཞིང་འཇིག་རྟེན་འདིར་ཡང་ཕྱིར་མི་འོང་བའི་ཆོས་ཅན་གྱི་ཕྱིར་མི་འོང་བར་འགྱུར་རོ། །དགེ་སློང་དག་སྒྲ་ཅན་འདི་ཉིད་དུ་དགེ་བསྙེན་ཉིས་བརྒྱ་ལྔ་བཅུ་ལྷག་ཅིག་ཤི་བ་དེ་དག་ཀྱང་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་རྣམས་སྤངས་པས་རྫུས་ཏེ་སྐྱེས་ཏེ་དེར་ཡོངས་སུ་མྱ་ངན་ལས་འདའ་ཞིང་འཇིག་རྟེན་འདིར་ཡང་ཕྱིར་མི་འོང་བའི་ཆོས་ཅན་གྱི་ཕྱིར་མི་འོང་བར་འགྱུར་རོ། །དགེ་སློང་དག་སྒྲ་ཅན་འདི་ཉིད་དུ་དགེ་བསྙེན་སུམ་བརྒྱ་ཤི་བ་དེ་དག་ནི་ཀུན་དུ་སྦྱོར་བ་གསུམ་ཡང་སྤངས་ལ་འདོད་ཆགས་དང་ཞེ་སྡང་དང་། གཏི་མུག་དག་ཀྱང་བསྲབས་པའི་ཕྱིར་ལན་གཅིག་ཕྱིར་འོང་བ་ཡིན་ཏེ། འཇིག་རྟེན་འདིར་ལན་གཅིག་ཕྱིར་འོངས་ནས་སྡུག་བསྔལ་མཐར་བྱེད་པར་འགྱུར་རོ། །དགེ་སློང་དག་གྲོང་ཁྱེར་སྒྲ་ཅན་འདི་ཉིད་དུ་དགེ་བསྙེན་ལྔ་བརྒྱ་ལྷག་ཅིག་ཤི་བ་དེ་དག་ནི་ཀུན་དུ་སྦྱོར་བ་གསུམ་སྤངས་པས་རྒྱུན་དུ་ཞུགས་པ་རྣམ་པར་མི་ལྟུང་བའི་ཆོས་ཅན་རྫོགས་པའི་བྱང་ཆུབ་ལ་ངེས་པར་གཞོལ་བ།