།དེ་ནས་བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གང་ན་བ་དེར་སོང་སྟེ་ཕྱིན་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་ནས། དེ་རྣམས་ཀྱི་ཁ་དོག་གི་མཐུས་སྣང་བ་རྒྱ་ཆེན་པོ་བྱུང་བར་གྱུར་པ་རྒྱལ་པོ་ནོར་ལྡན་གྱིས་མཐོང་ངོ་། །མཐོང་ནས་ཀྱང་བློན་པོ་རྣམས་ལ་དྲིས་པ། ཤེས་ལྡན་དག་རྒྱལ་པོ་གོས་སྦྱིན་གྱི་ཡུལ་ན་སྣང་བ་རྒྱ་ཆེན་པོ་བྱུང་བ་འདི་ཅི་ཡིན། དེ་རྣམས་ཀྱིས་སྨྲས་པ། ལྷ་རྒྱལ་པོ་གོས་སྦྱིན་གྱི་ཡུལ་དུ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་བྱུང་སྟེ། དེ་ལ་བལྟ་བའི་ཕྱིར་བརྒྱ་བྱིན་དང་ཚངས་པ་ལ་སོགས་པ་མཆིས་པ་དེས་ན་སྣང་བ་ཆེན་པོ་འདི་བྱུང་སྟེ། དེ་ནི་རྫུ་འཕྲུལ་ཆེ་ཞིང་མཐུ་ཆེ་བ་ལགས་པས་འདི་ནི་དེའི་མཐུ་ལགས་སོ། །རྒྱལ་པོ་ནོར་ལྡན་གྱིས་སྨྲས་པ། ཤེས་ལྡན་དག་གང་གི་ཡུལ་དུ་གང་ལ་བརྒྱ་བྱིན་དང་ཚངས་པ་ལ་སོགས་པ་ཡང་བལྟ་བའི་ཕྱིར་འོང་བའི་རྐང་གཉིས་བསོད་ནམས་ཀྱི་ཞིང་དེ་ལྟ་བུ་བྱུང་བ་དེ་ལ་བདག་གིས་གནོད་པ་ཅི་འདྲ་བ་ཞིག་བྱ་ཞེས། དེས་དེ་ལ་ཕོ་ཉ་བཏང་སྟེ། གྲོགས་པོ་ཁྱོད་དེ་ལ་བདག་ཅུང་ཟད་ཀྱང་མི་བྱེད་ཀྱིས་ཚུར་སྤྱོན། ཁྱོད་ནི་བསོད་ནམས་ཀྱི་མཐུ་ཆེན་པོ་ཅན་ཞིག་པས་ཁྱོད་ཀྱི་ཡུལ་ན་གང་ལ་བརྒྱ་བྱིན་དང་། ཚངས་པ་ལ་སོགས་པ་ཡང་བལྟ་བའི་ཕྱིར་འོང་བ་རྐང་གཉིས་བསོད་ནམས་ཀྱི་ཞིང་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་བཞུགས་སོ། །འོན་ཀྱང་ཁྱོད་ཀྱི་མགུལ་ནས་འཁྱུད་ནས་འགྲོ་བར་བྱ་སྟེ། དེ་ལྟ་ན་བདག་ཅག་ཕན་ཚུན་ཡིད་བདེ་བར་འགྱུར་རོ་ཞེས་སྤྲིང་ངོ་། །རྒྱལ་པོ་གོས་སྦྱིན་ཡིད་མ་ཆེས་ནས་དེ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གང་ན་བ་དེར་སོང་སྟེ་ཕྱིན་ནས། ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་རྒྱལ་པོ་གོས་སྦྱིན་གྱིས་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་འདི་སྐད་ཅེས་གསོལ་ཏོ།