།བཅོམ་ལྡན་འདས་ཀྱིས་དགོངས་པ། ཇི་ལྟར་འདི་དག་ཕྱིར་ཞིང་དད་པ་མངོན་པར་འཕེལ་བར་འགྱུར་བ་དེ་ལྟར་བྱིན་གྱིས་བརླབ་བོ་སྙམ་ནས་དེ་ནས་བཅོམ་ལྡན་འདས་ཀྱིས་ཇི་ལྟར་རེ་རེའི་ཡིད་ལ་བཅོམ་ལྡན་འདས་ཀྱི་དབུའི་གཙུག་གི་སྟེང་ན་བདག་གདུགས་འཛིན་ཏོ་སྙམ་པ་དེ་ལྟར་བྱིན་གྱིས་བརླབས་ཏེ། དེ་ནས་བཅོམ་ལྡན་འདས་མངོན་པར་རྫོགས་པར་བྱང་ཆུབ་པ་ལ་གདུགས་ཉིས་སྟོང་ལྔ་བརྒྱ་ལྷ་དང་མི་རྣམས་ཀྱིས་སྟེང་དུ་བཟུང་ངོ་། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། དེས་ན་བཅོམ་ལྡན་འདས་མངོན་པར་རྫོགས་པར་བྱང་ཆུབ་པ་ལ་གདུགས་ཉིས་སྟོང་ལྔ་བརྒྱ་ལྷ་དང་མི་རྣམས་ཀྱིས་དབུའི་གཙུག་གི་སྟེང་དུ་བཟུང་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་ན་ལས་བྱས་ཤིང་བསགས་པ་ཚོགས་རྙེད་པ་ཞེས་བྱ་བ་ནས། ལུས་ཅན་རྣམས་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ་ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ལེགས་མཐོང་ཆེན་པོ་ཞེས་བྱ་བ་བྱུང་སྟེ། རྒྱལ་པོ་དེ་ལ་བུ་སྟོང་དུ་གཅིག་གིས་མ་ཚང་བ་ཞིག་ཡོད་དོ། །རྒྱལ་པོ་དེའི་ཀུན་དུ་སྤྱོད་པ་ནི་བུ་བཙས་ཤིང་བཙས་པ་དག་ཕྱི་བཞིན་ཁྲིད་དེ་འཁྱམ་པར་བྱེད་དོ། །བཙུན་མོ་རྣམས་ཀྱིས་བསམས་པ། རྒྱལ་པོ་འདིའི་ཀུན་དུ་སྤྱོད་པ་ནི་སྲས་བཙས་ཤིང་བཙས་པ་དག་ཕྱི་བཞིན་ཁྲིད་ནས་འཁྱམ་པར་མཛད་པས་བདག་ཅག་བུ་ཡོད་བཞིན་དུ་བུ་མེད་པ་དང་འདྲས། ད་ནི་ནང་ཁྲིམས་ཞིག་བཅའ་སྟེ། གལ་ཏེ་བདག་ཅག་ལས་འགའ་ཞིག་སེམས་ཅན་དང་ལྡན་པར་གྱུར་ན། དེས་རྒྱལ་པོ་ལ་གདས་པར་མི་བྱའོ་ཞེས་བཅས་སོ། །ཇི་ཙམ་ན་བཙུན་མོ་གཞན་ཞིག་སེམས་ཅན་དང་ལྡན་པར་གྱུར་ནས། དེ་དེ་དག་གིས་ཕྱོགས་དབེན་པ་ཞིག་ཏུ་བཞག་སྟེ། དེ་ཟླ་བ་བརྒྱད་དམ་དགུ་འདས་པ་དང་ཁྱེའུ་གཟུགས་བཟང་བ།