Degé Kangyur volume 44, F.96.b

།རྟག་པར་རྫུས་ཏེ་སྐྱེ་ཞིང་ཚེ་རབས་དྲན། །​སྦྱངས་པས་རྩོད་པ་མ་མཆིས་དགོན་གནས་ནས། །​སེམས་ནི་རབ་བཏུལ་ཉོན་མོངས་ཞི་བགྱིད་དང་། །​ཚུལ་ཁྲིམས་ལྡན་ཞིང་བྱང་ཆུབ་ལམ་བསྒོམས་དང་། །​བདུད་རྩི་འགོག་ཐོབ་བདུད་དཔུང་འཇོམས་པ་དང་། །​བདེ་སྩོལ་ཆོས་ཀྱི་འཁོར་ལོ་སྐོར་འགྱུར་བ། །​དེ་འདྲའི་ཡང་དག་ལམ་ནི་བཀས་བཤད་གསོལ། །​དེ་ནས་བཅོམ་ལྡན་འདས་ཀྱིས་བུ་མོ་རྣམ་དག་དད་པ་ལ་བཀའ་སྩལ་པ། བུ་མོ་བྱང་ཆུབ་སེམས་དཔའ་གང་སྟོབས་རྣམ་པ་བརྒྱད་དང་ལྡན་པར་གྱུར་ན་འཁོར་བ་ན་གནས་ཀྱང་རབ་ཏུ་བརྟན་པའི་དཔའ་བོར་འགྱུར་ཞིང་ཡོངས་སུ་ངལ་བ་མེད་པར་འགྱུར་རོ། །​བརྒྱད་གང་ཞེ་ན། དང་པོ་ནི་སེམས་ཀྱིས་འདུན་པའི་སྟོབས་ཏེ་གཡོ་སྒྱུ་མེད་པའི་ཕྱིར་རོ། །​གཉིས་པ་ནི་མོས་པའི་སྟོབས་ཏེ། སྡིག་པ་རྣམས་སྤོང་བར་བྱེད་པའི་ཕྱིར་རོ། །​གསུམ་པ་ནི་སྦྱོར་བའི་སྟོབས་ཏེ། རྟག་ཏུ་དགེ་བ་བསྒྲུབ་པའི་ཕྱིར་རོ། །​བཞི་པ་ནི་མངོན་པར་ཡིད་ཆེས་པའི་སྟོབས་ཏེ། ལས་ཀྱི་རྣམ་པར་སྨིན་པ་དག་ལ་ཤིན་ཏུ་མངོན་པར་ཡིད་ཆེས་པའི་ཕྱིར་རོ། །​ལྔ་པ་ནི་བྱང་ཆུབ་ཀྱི་སེམས་ཀྱི་སྟོབས་ཏེ། ཐེག་པ་དམན་པ་ཡོངས་སུ་མི་ཚོལ་བའི་ཕྱིར་རོ། །​དྲུག་པ་ནི་བྱམས་པ་ཆེན་པོའི་སྟོབས་ཏེ། སེམས་ཅན་ལ་གནོད་པ་མེད་པའི་ཕྱིར་རོ། །​བདུན་པ་ནི་སྙིང་རྗེ་ཆེན་པོའི་སྟོབས་ཏེ་གནོད་པ་བྱས་པ་རྣམས་དང་དུ་ལེན་པར་བྱེད་པའི་ཕྱིར་རོ། །​བརྒྱད་པ་ནི་དགེ་བའི་བཤེས་གཉེན་གྱི་སྟོབས་ཏེ། དུས་དུས་སུ་སད་པར་བྱེད་པའི་ཕྱིར་རོ། །​བུ་མོ་འདི་ནི་སྟོབས་རྣམ་པ་བརྒྱད་ཅེས་བྱ་སྟེ། བྱང་ཆུབ་སེམས་དཔའ་གང་སྟོབས་བརྒྱད་པོ་འདི་དག་དང་ལྡན་པར་གྱུར་ན་རབ་ཏུ་བསྟན་པའི་དཔའ་བོར་འགྱུར་བས་འཁོར་བ་ན་གནས་ཀྱང་མངོན་པར་ཞེན་ཅིང་ཆགས་པ་མེད་པར་འགྱུར་རོ། །​དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། སེམས་འདུན་དཔའ་བོ་གང་ཡིན་པ། །​གཡོ་སྒྱུ་དག་ནི་སྤོང་བྱེད་ཅིང་། །​རྟག་པར་དྲང་པོར་སྤྱོད་པས་ན། །​ཡང་དག་བྱང་ཆུབ་གཞོལ་བར་འགྱུར། །​མོས་པའི་སྟོབས་ནི་གང་ཡིན་པ། །​ཉེས་པ་མང་པོ་སྤོང་བྱེད་ཅིང་། །​དགེ་བ་འབའ་ཞིག་སྤྱོད་པས་ན།



The English translation of this folio by 84000 - Translating the words of the Buddha can be found at:
https://read.84000.co/translation/toh84.html?part=UT22084-044-004-343#UT22084-044-004-343