Degé Kangyur volume 44, F.72.a

ཀུན་དགའ་བོ་བཟང་སྐྱོང་འདིའི་བདེ་བའི་ཡོ་བྱད་གང་ཡིན་པ་དང་། དགའ་ཞིང་རྩེ་ལ་དགའ་མགུར་སྤྱོད་པ་གང་ཡིན་པ་དེ་ནི་ཚོང་དཔོན་གཞོན་ནུ་ཟླ་བ་འབྱོར་པ་མ་གཏོགས་པར་ལྷ་རྣམས་ཀྱི་དབང་པོ་བརྒྱ་བྱིན་ལ་ཡང་མེད་དོ། །​འཛམ་བུའི་གླིང་འདི་ན་ཁྱད་པར་དུ་འཕགས་པ་རྣམས་ལ་ཡང་མེད་དོ། །​དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །​བཅོམ་ལྡན་འདས་ཚོང་དཔོན་བཟང་སྐྱོང་འདིའི་ནོར་དུ་གྱུར་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཚོང་དཔོན་དགེ་བའི་རྩ་བ་བྱས་པ་འདིའི་འབྱོར་པ་དང་ལོངས་སྤྱོད་རྒྱས་པ་ཉོན་ཅིག །​ཀུན་དགའ་བོ་ནོར་དང་གསེར་ཕུན་སུམ་ཚོགས་པའི་ཚོང་པ་དྲུག་ཁྲི་འདིའི་ཕྱི་བཞིན་འབྲང་ངོ་། །​མལ་ཁྲི་ཚོན་སྣ་ཚོགས་སྤེལ་བས་མཛེས་པར་བྱས་པ། སྨིག་ཐགས་ཅན་ལ་སྟན་ནང་ཚངས་ཅན་གཏིང་བ། གཡས་གཡོན་དུ་སྔས་དམར་པོ་བཞག་པ་དྲུག་ཁྲི་དང་། བུད་མེད་བགོ་བ་དར་དང་། དུ་ཀུ་ལའི་རས་དང་། མེན་ཏྲི་དང་། མོན་དར་དང་། མེས་སྦྱངས་པའི་གོས་དང་། ལ་ཚིག་གུའི་སྟོད་ཀོར་དང་། དམར་པོ་དང་། རྣམ་པ་སྣ་ཚོགས་ཀྱི་སྣམ་ཕྲན་གྱི་གོས་གྱོན་པ། འོད་ཆགས་པའི་རྒྱན་གྱིས་བརྒྱན་པ། ལག་མཐིལ་རེག་ན་སྙི་ཞིང་ཤིན་ཏུ་འཇམ་པ་རྣམ་པ་སྣ་ཚོགས་སུ་གྱུར་པ་དགོད་ཅིང་དགའ་བ་དང་། ཚིག་འཆོས་ཤིང་སྒེག་ལ་སྙན་པའི་གཏམ་བརྗོད་པས་བསྐྱེད་པའི་དགའ་བ་དང་མཆོག་ཏུ་དགའ་བས་རྒོད་པར་བྱེད་པ། ཁྱིམ་ཐབ་ལ་བསྙེན་བཀུར་བྱེད་པའི་ཚུལ་གྱིས་ལུས་ལ་སྟོད་པར་བྱེད་པ། སྐྱེས་པ་གཞན་ལ་འདོད་པའི་རྒྱུད་སྤངས་པ་མཛེས་པས་འདུད་ཅིང་བླ་གོས་བཟང་པོ་བགོས་པ། གཅིག་ལ་གཅིག་ཕྲག་དོག་གིས་འཐབ་པ་དང་། འཚེ་བས་བཞིན་ཁྲོ་གཉེར་གཙིགས་ཤིང་འཁུ་བར་འགྱུར་བ་མེད་པ། རྐང་ལག་དང་སོར་མོ་ཤིན་ཏུ་འཇམ་པ། རྐང་ལག་གི་ཚིགས་ཀྱི་བར་མཚམས་མི་མངོན་པ། རྐང་ལག་རྒྱས་པ། སྐྲ་མཉམ་ཞིང་བཅོས་ལ་གཡས་སུ་འཁྱིལ་ཞིང་མཛེས་པ། སྙིང་ཆགས་པ་དང་ལྡན་ཞིང་ཤིན་ཏུ་སྙིང་ཉེ་བ། སྙན་པར་གྲགས་པའི་རིགས་དང་རུས་ལས་བྱུང་བས་གྲགས་པ་དང་ལེགས་པ་བསྐྱེད་པ།



The English translation of this folio by 84000 - Translating the words of the Buddha can be found at:
https://read.84000.co/translation/toh83.html?part=UT22084-044-003-237#UT22084-044-003-237