Degé Kangyur volume 44, F.80.b

།དེ་བཞིན་དུ་རྣམ་པར་ཤེས་པའི་ཁམས་འདི་གང་དང་གང་དུ་འཕོ་བ་དེ་དང་དེར་ཚོར་བ་འཕོ་བར་འགྱུར་རོ། །​བསོད་ནམས་དང་། བསོད་ནམས་མ་ཡིན་པ་དང་། དྲན་པ་ཡང་འཕོ་བར་འགྱུར་རོ། །​གཞན་ཡང་རྣམ་པར་ཤེས་པའི་ཁམས་འདིས་ནི་ལུས་ཡོངས་སུ་བཏང་ནས་བདག་གི་ལུས་འདི་ཡོངས་སུ་བཏང་ངོ་སྙམ་དུ་རབ་ཏུ་ཤེས་ཏེ། དེ་བས་ན་འདི་ལ་རྣམ་པར་ཤེས་པའི་ཁམས་ཞེས་བྱའོ། །​དགེ་བའི་ལས་ཀྱང་རབ་ཏུ་ཤེས་སོ། །​མི་དགེ་བའི་ལས་ཀྱང་རབ་ཏུ་ཤེས་སོ། །​ལས་འདི་དག་ནི་བདག་གི་ཕྱི་བཞིན་འབྲང་ངོ་། །​བདག་ཀྱང་འདི་དག་གི་ཕྱི་བཞིན་དུ་འབྲང་ངོ་སྙམ་དུ་དེ་ལྟར་རབ་ཏུ་ཤེས་ཏེ། དེ་བས་ན་རྣམ་པར་ཤེས་པ་ཞེས་བྱའོ། །​གཞན་ཡང་ལུས་འདིའི་བྱ་བ་ཐམས་ཅད་རབ་ཏུ་ཤེས་ཏེ། དེ་བས་ན་རྣམ་པར་ཤེས་པ་ཞེས་བྱའོ། །​དཔེར་ན་རླུང་གི་ཁམས་གྲང་བར་ཡང་འགྱུར་ཞིང་ཚ་བར་ཡང་འགྱུར་ལ། དྲི་ཞིམ་པོར་ཡང་ལྡང་ཞིང་དྲི་ང་བར་ཡང་ལྡང་སྟེ། སྤྱོད་པ་དེ་དག་ཐམས་ཅད་ནི་རླུང་གི་ཁམས་ཀྱི་རྐྱེན་ལས་བྱུང་ཡང་རླུང་གི་ཁམས་དེ་ཡང་གཟུགས་ཅན་མ་ཡིན་ལ། ལེན་པའི་རྒྱུས་སྣང་སྟེ། ཇི་ལྟར་རླུང་གི་ཁམས་ཀྱིས་ཤིང་གཡོ་བ་དང་། གྲང་བ་དང་། ཚ་བའི་རེག་པ་ལེན་པའི་རྐྱེན་བྱེད་པ་ལས་རླུང་གི་ཁམས་ཤེས་པར་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་གཟུགས་ཅན་མ་ཡིན་ཏེ། གཟུགས་ལེན་པའི་རྐྱེན་དང་། འདོད་པ་ལེན་པའི་རྐྱེན་དང་། ལྟ་བ་ལེན་པའི་རྐྱེན་དང་། ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པ་ལེན་པའི་རྐྱེན་གྱིས་ཚོར་བ་མྱོང་བར་འགྱུར་རོ། །​ཚོར་བའི་རྐྱེན་གྱིས་ལུས་དང་ཁ་དོག་སྐྱེ་ཞིང་འགྲུབ་པར་བྱེད་པས་ན་རྣམ་པར་ཤེས་པ་ཞེས་བྱའོ། །​དེ་ནས་ཚོང་དཔོན་གཞོན་ནུ་ཟླ་བ་འབྱོར་པ་སྟན་ལས་ལངས་ཏེ། ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་གཟུགས་ཇི་ལྟར་བལྟ་བར་བགྱི། ལེན་པ་ནི་ཇི་ལྟ་བུ་ལགས། ལས་ལེན་པ་ནི་ཇི་ལྟར་བལྟ་བར་བགྱི། ལྟ་བ་ལེན་པ་ནི་ཇི་ལྟ་བུ་ལགས། ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པའི་ལེན་པ་ནི་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཟླ་བ་འབྱོར་པ་ལེགས་སོ་ལེགས་སོ། །



The English translation of this folio by 84000 - Translating the words of the Buddha can be found at:
https://read.84000.co/translation/toh83.html?part=UT22084-044-003-254#UT22084-044-003-254