Degé Kangyur volume 43, F.179.b

།ཡོད་པར་བདག་ནི་སྨོན་ལམ་མཐའ་ཡས་འདེབས། །​བདག་གི་དགེ་བ་དག་ནི་འདས་པ་དང་། །​མ་འོངས་པ་དང་ད་ལྟར་ཐམས་ཅད་ཀྱིས། །​འཇིག་རྟེན་དག་གི་ཁམས་ནི་ཐམས་ཅད་དུ། །​དཀོན་མཆོག་གསུམ་པོ་རྟག་ཏུ་འབྱུང་བར་ཤོག །​དཀོན་མཆོག་གསུམ་དང་བྱང་ཆུབ་སེམས་དཔའ་རྣམས། །བསྐལ་པར་བཞུགས་པས་ཕོངས་པར་མ་གྱུར་ཅིག །​བར་དུ་གཅོད་པ་མེད་པར་བྱང་ཆུབ་དང་། །​ཕ་རོལ་ཕྱིན་པ་རྣམས་ནི་རྫོགས་པར་ཤོག །​སེམས་ཅན་དག་ནི་ཐམས་ཅད་བདེ་བ་དང་། །​འཇིགས་པ་མེད་ཅིང་ངན་འགྲོ་འདས་པ་དང་། །​མི་དགེ་ཐམས་ཅད་དང་ནི་བྲལ་བ་དང་། །དགེ་བའི་རྩ་བ་ཐམས་ཅད་རྫོགས་གྱུར་ཅིག །​ཐེག་པ་གསུམ་པོ་དག་ལ་ཅི་རིགས་པར། །​དེ་དག་ལ་ནི་སྨོན་ལམ་མཐར་ཕྱིན་ཅིང་། །​ཚེ་རིང་བ་དང་རྣམ་པར་གྲོལ་བ་དང་། །​ཁྱད་པར་ཅན་གྱི་དོན་ཀུན་རྫོགས་པར་ཤོག །​རྫོགས་པའི་བྱང་ཆུབ་སྨོན་ལམ་འདེབས་པ་ན། །​མཐའ་ཡས་དཔག་ཏུ་མེད་པར་རབ་ཏུ་འདེབས། །​སེམས་ཅན་ཐམས་ཅད་དག་གི་སྡུག་བསྔལ་དང་། །​ཉོན་མོངས་དག་ནི་ཉེ་བར་ཞི་གྱུར་ཅིག །​ཆོས་དང་ལྡན་པའི་བྱ་བ་རྣམས་ཀྱི་ཕྱིར། །​འཇིག་རྟེན་དག་གི་ཁམས་རྣམས་ཐམས་ཅད་ཀྱི། །​རྒྱལ་བ་ཀུན་དང་བྱང་ཆུབ་སེམས་དཔའ་ལ། །རང་གི་ལུས་ནི་ངེས་པར་དབུལ་བར་བགྱི། །​རྫོགས་པའི་བྱང་ཆུབ་ཐོབ་པར་གྱུར་བར་དུ། །​མ་འོངས་པ་ན་སྨོན་ལམ་མཐའ་ཡས་གདབ། །​སྐྱེ་དང་སྐྱེ་བར་དཀོན་མཆོག་གསུམ་པོ་ལ། །​བདག་ནི་ཡོངས་སུ་སྤྱད་པར་བགྱིད་པར་ཤོག །​འཇིག་རྟེན་དག་གི་ཁམས་རྣམས་ཐམས་ཅད་ཀྱི། །དཀོན་མཆོག་གསུམ་དང་བྱང་ཆུབ་སེམས་དཔའ་ལ། །​ནམ་མཁའ་མཉམ་པའི་ལྷ་ཡི་སྤོས་མཆོག་དང་། །​ཕྲེང་བ་མེ་ཏོག་ཆུན་པོས་མཆོད་བྱེད་ཤོག །​ལྷུན་པོ་མཉམ་པའི་གསེར་དང་དངུལ་དག་དང་། །​གོས་དང་རིན་པོ་ཆེ་ཡི་ཕུང་པོ་དང་། །​གཞལ་མེད་ཁང་བཅས་གཞོན་དང་མལ་ཆ་དང་། །བཟའ་བ་མཐའ་ཡས་དག་ནི་སྦྱིན་པར་ཤོག །​འགྲོ་བའི་བསམ་པ་ལམ་གྱིས་རྫོགས་བྱེད་ཅིང་། །​སྐྱབས་དང་ལུས་དང་ཕ་འདྲར་གྱུར་པར་ཤོག །​བཟོད་ལ་དགའ་ཞིང་ཚུལ་ཁྲིམས་གཙང་བ་དང་། །​འགྲོ་ལ་ཆོས་ནི་རབ་ཏུ་སྟོན་གྱུར་ཅིག །​བྱང་ཆུབ་ཐེག་པ་མཆོག་ནི་རྙེད་པ་དང་། །