Degé Kangyur volume 43, F.177.b

བསམ་གཏན་དང་། སྙོམས་པར་འཇུག་པ་ལ་གནས་པར་བརྩོན་པ་དང་། རྟེན་ཅིང་འབྲེལ་པར་འབྱུང་བ་རབ་ཏུ་རྣམ་པར་འབྱེད་པ་ལ་མཁས་པ་དང་། རང་བྱང་ཆུབ་ཏུ་སྨོན་པ་དང་། རང་བྱང་ཆུབ་ཏུ་སྨོན་ལམ་འདེབས་པ་དེ་ནི་རང་སངས་རྒྱས་ཀྱི་ཐེག་པ་ཞེས་བྱའོ། །​མོས་པ་ཁྱད་པར་དུ་འཕགས་པ། དབང་པོ་ཁྱད་པར་དུ་འཕགས་པ། སེམས་ཅན་ཐམས་ཅད་བསྒྲལ་བ་དང་། སེམས་ཅན་ཐམས་ཅད་དགྲོལ་བ་དང་། སེམས་ཅན་ཐམས་ཅད་དབུགས་དབྱུང་བ་དང་། ཐམས་ཅད་མཁྱེན་པ་ཉིད་ཐོབ་པར་བྱ་བའི་ཕྱིར་སངས་རྒྱས་ཀྱི་ཆོས་ཐམས་ཅད་ཡོངས་སུ་བསྐང་བར་འདོད་པ་དང་། ཕ་རོལ་ཏུ་ཕྱིན་པ་དྲུག་ཡོངས་སུ་བསྐང་བར་འདོད་པ་དང་། འཇིག་རྟེན་གྱི་དོན་དུ་འཁོར་བའི་སྡུག་བསྔལ་ལ་མི་ལྟ་བ་དང་། འཁོར་བའི་བདེ་བ་ལ་ཡང་དམོད་པ་མང་བ་ཡིན་ན་འཁོར་བའི་སྡུག་བསྔལ་ལ་དམོད་པ་མང་བ་ལྟ་སྨོས་ཀྱང་ཅི་དགོས་ཏེ། ཚུལ་ཁྲིམས་དང་སྤྱོད་པ་ཁྱད་པར་དུ་འཕགས་པ་ལ་རྣམ་པར་གནས་པ་དང་། རྫོགས་པའི་བྱང་ཆུབ་ཀྱི་ཐེག་པ་ཅན་གྱི་མདོ་སྡེ་རྣམས་ཀློག་པ་དང་། ཁ་ཏོན་དུ་བྱེད་པ་དང་། ལུང་ནོད་པ་དང་། ཡིད་ལ་བྱེད་པ་རྣམས་ལ་བརྩོན་འགྲུས་བརྩམས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཡིན་པ་དེ་དག་དགེ་བའི་བཤེས་གཉེན་ཡིན་པ་དང་། དེ་དག་གི་བྱིན་གྱི་རླབས་བཞི་པོ་བདེན་པ་དང་། གཏོང་བ་དང་། ཉེ་བར་ཞི་བ་དང་། ཤེས་རབ་ལ་སློབ་པ་དང་། ཤེས་བྱ་ཐམས་ཅད་ཉེན་པ་དང་། ལེན་པ་དང་། འཛིན་པ་དང་། དཔྱོད་པར་དགའ་བ་དང་། ཏིང་ངེ་འཛིན་དང་། སྙོམས་པར་འཇུག་པ་ཐམས་ཅད་ཡང་དག་པར་བསྐྱེད་པར་འདོད་པ་དང་། རང་གི་དོན་ལ་མི་ལྟ་བ་དང་། འཇིག་རྟེན་གྱི་དོན་ལྷུར་ལེན་པ་དང་། སྟོབས་ཇི་ལྟ་བ་བཞིན་དུ་སེམས་ཅན་ཐམས་ཅད་ཐེག་པ་གསུམ་པོ་དག་ལ་དགོད་པར་འདོད་པ་དང་། དགོད་པར་སྤྲོ་བ་དང་། བདག་ཉིད་ཀྱང་བྱང་ཆུབ་ཀྱི་ཐེག་པ་ལ་ཤིན་ཏུ་གནས་པ་དང་། མི་ཕྱེད་པ་དང་། མི་བསྐྱོད་པ་དང་། རྡོ་རྗེ་ལྟ་བུའི་སེམས་དང་། རྟག་པར་རྒྱུན་ཏུ་བྱང་ཆུབ་ཏུ་སྨོན་ཅིང་བྱང་ཆུབ་ཏུ་སྨོན་ལམ་འདེབས་པ་དེ་ནི་ཐེག་པ་ཆེན་པོ་ཞེས་བྱ་སྟེ། དེ་ལྟར་ཐེག་པ་གསུམ་པོ་དག་རབ་ཏུ་ཤེས་སོ། །



The English translation of this folio by 84000 - Translating the words of the Buddha can be found at:
https://read.84000.co/translation/toh70.html?part=UT22084-043-007-474#UT22084-043-007-474