Degé Kangyur volume 43, F.155.a

པའི་ཡེ་ཤེས་བླ་ན་མེད་པའི་སྟོབས་ཀྱིས་བརྟན་པ་ཐོབ་པར་བྱ་བའི་ཕྱིར་ཟས་སྦྱིན་ནོ། །​སྐོམ་འདོད་པ་རྣམས་ལ་ནི་སེམས་ཅན་ཐམས་ཅད་ཉོན་མོངས་པའི་སྐོམ་པ་ཐམས་ཅད་བསལ་བའི་སྟོབས་ཐོབ་པར་བྱ་བའི་ཕྱིར་སྐོམ་སྦྱིན་ནོ། །​གོས་འདོད་པ་རྣམས་ལ་ནི་སེམས་ཅན་ཐམས་ཅད་ངོ་ཚ་ཤེས་པ་དང་ཁྲེལ་ཡོད་པའི་གོས་ཐོབ་པར་བྱ་བའི་ཕྱིར་གོས་སྦྱིན་ནོ། །​བཞོན་པ་འདོད་པ་རྣམས་ལ་ནི་སེམས་ཅན་ཐམས་ཅད་བྱང་ཆུབ་སེམས་དཔའི་ཐེག་པ་དང་། རྫོགས་པའི་སངས་རྒྱས་ཀྱི་ཐེག་པ་བླ་ན་མེད་པ་ཐོབ་པར་བྱ་བའི་ཕྱིར་བཞོན་པ་སྦྱིན་ནོ། །​སྤོས་འདོད་པ་རྣམས་ལ་ནི་སེམས་ཅན་ཐམས་ཅད་སངས་རྒྱས་ཀྱི་ཚུལ་ཁྲིམས་ཀྱི་དྲི་བསུང་ཐམས་ཅད་ཐོབ་པར་བྱ་བའི་ཕྱིར་སྤོས་སྦྱིན་ནོ། །​མེ་ཏོག་འདོད་པ་རྣམས་ལ་ནི་སེམས་ཅན་ཐམས་ཅད་དེ་བཞིན་གཤེགས་པའི་བྱང་ཆུབ་ཀྱི་ཡན་ལག་བདུན་གྱི་མེ་ཏོག་བླ་ན་མེད་པ་ཐོབ་པར་བྱ་བའི་ཕྱིར་མེ་ཏོག་རྣམས་སྦྱིན་ནོ། །​ཕྱེ་མ་འདོད་པ་རྣམས་ལ་ནི་སེམས་ཅན་ཐམས་ཅད་ཉེས་པར་སྤྱོད་པའི་དྲི་ང་བའི་དྲི་མ་གཞོམ་པའི་སྟོབས་ཐོབ་པར་བྱ་བའི་ཕྱིར་ཕྱེ་མ་སྦྱིན་ནོ། །​བྱུག་པ་འདོད་པ་རྣམས་ལ་ནི་སེམས་ཅན་ཐམས་ཅད་ཉེས་པ་མེད་པའི་ཚུལ་ཁྲིམས་དང་སྤྱོད་པའི་བྱུག་པ་ཐོབ་པར་བྱ་བའི་ཕྱིར་བྱུག་པ་སྦྱིན་ནོ། །​གདུགས་འདོད་པ་རྣམས་ལ་ནི་སེམས་ཅན་ཐམས་ཅད་ཉོན་མོངས་པའི་གདུང་བ་ཐམས་ཅད་ཉེ་བར་ཞི་བའི་སྟོབས་ཐོབ་པར་བྱ་བའི་ཕྱིར་གདུགས་སྦྱིན་ནོ། །​ལྷམ་འདོད་པ་རྣམས་ལ་ནི་སེམས་ཅན་ཐམས་ཅད་བླ་ན་མེད་པའི་བདེ་བ་མངོན་པར་ཤེས་པ་ཐོབ་པར་བྱ་བའི་ཕྱིར་ལྷམ་སྦྱིན་ནོ། །​མལ་ཆ་འདོད་པ་རྣམས་ལ་ནི་སེམས་ཅན་ཐམས་ཅད་ལྷ་དང་། ཚངས་པ་དང་། འཕགས་པའི་གནས་པའི་མལ་ཆའི་བདེ་བར་སྦྱར་བའི་སྟོབས་ཐོབ་པར་བྱ་བའི་ཕྱིར་མལ་ཆ་སྦྱིན་ནོ། །​སྟན་འདོད་པ་རྣམས་ལ་ནི་སེམས་ཅན་ཐམས་ཅད་བྱང་ཆུབ་ཀྱི་སྙིང་པོར་བདུད་དང་ཉོན་མོངས་པའི་སྒྲིབ་པ་བར་དུ་གཅོད་པ་ཐམས་ཅད་ཀྱིས་མི་ཕྱེད་པ། དཔའ་བའི་སྟན་ཐོབ་པར་བྱ་བའི་ཕྱིར་སྟན་སྦྱིན་ནོ། །​གནས་འདོད་པ་རྣམས་ལ་ནི་སེམས་ཅན་ཐམས་ཅད་སྐྱབས་དང་། གནས་



The English translation of this folio by 84000 Translating the words of the Buddha can be found at:
https://read.84000.co/translation/toh70.html?part=UT22084-043-007-429#UT22084-043-007-429