ཡང་དག་པར་དགའ་བར་བྱ་བའི་གཏམ་རྣམ་པ་སྣ་ཚོགས་བྱས་ནས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་སོ། །ཅི་རིགས་ཀྱི་བུ་དག་ཁྱེད་དགེ་བའི་ཆོས་རྣམས་ཀྱིས་འཕེལ་བའམ། ཡོངས་སུ་ཉམས་པར་མ་གྱུར་ཏམ། དེ་དག་གིས་སྨྲས་པ། ཚེ་དང་ལྡན་པ་བྱམས་པ་བདག་ཅག་ནི་དགེ་བའི་ཆོས་རྣམས་ལས་ཡོངས་སུ་ཉམས་ཏེ་འཕེལ་བར་མ་གྱུར་ཏོ། །བདག་ཅག་དེ་བཞིན་གཤེགས་པར་འགྱུར་རམ་མི་འགྱུར་སྙམ་པའི་ཐེ་ཚོམ་གྱིས་ཀྱང་བདག་ཅག་གི་སེམས་ཀུན་ནས་དཀྲིས་ཤིང་འདུག་གོ །བདག་ཅག་ལོག་པར་ལྟུང་བའི་ཆོས་ཅན་ཡིན་ནམ། ལོག་པར་ལྟུང་བའི་ཆོས་ཅན་མ་ཡིན་ཞིག་གུ་སྙམ་པའི་འགྱོད་པས་ཀྱང་བདག་ཅག་གི་སེམས་ཀུན་ནས་དཀྲིས་ཤིང་འདུག་སྟེ། བདག་ཅག་ནི་དགེ་བའི་ཆོས་རྣམས་ལ་ཡང་འདུན་པ་མི་སྐྱེའོ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་ཚུར་ཤོག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བཞུགས་པ་དེར་འདོང་ངོ་། །དེ་ཅིའི་ཕྱིར་ཞེ་ན། བཅོམ་ལྡན་འདས་དེ་ནི་ཐམས་ཅད་མཁྱེན་པ། ཐམས་ཅད་གཟིགས་པ། ཡེ་ཤེས་སྒྲིབ་པ་མི་མངའ་བ་དང་ལྡན་པ། སེམས་ཅན་ཐམས་ཅད་ཀྱི་སྤྱོད་པ་ལ་འཇུག་པ་ལ་མཁས་པ་སྟེ། དེས་ཁྱེད་ཀྱི་སྤྱོད་པའི་རིམ་པ་ཇི་ལྟ་བ་བཞིན་དུ་ཆོས་སྟོན་པར་འགྱུར་བའི་ཕྱིར་རོ། །དེ་ནས་བྱང་ཆུབ་སེམས་དཔའ་དྲུག་ཅུ་ཙམ་པོ་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ། ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ངུ་ཞིང་བཅོམ་ལྡན་འདས་ལ་ཡན་ལག་ལྔས་ཡང་དང་ཡང་དུ་ཕྱག་འཚལ་ནས་གདོང་ལ་མཆི་མ་ཟག་ཅིང་མགོ་མ་བཏེག་གོ །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།