ཕན་པའི་དངོས་པོ་ཕུན་སུམ་ཚོགས་པ། སྙིང་རྗེ་ཆེ་བ། མཛེས་པ། བལྟ་ན་སྡུག་པ། དགེ་བ་མི་སྤྱོམས་པ། ཡོན་ཏན་སྦེད་པ། སྤྱོད་པ་བརྟན་པ་དག་ཏུ་འགྱུར་རོ། །དེ་དག་རིགས་སྣ་ཚོགས་ལས་རབ་ཏུ་བྱུང་ནས་བསྐལ་པ་གྲངས་མེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྒྲུབས་པ་འདི་ཀུན་ཏུ་སྲུང་ཞིང་འཛིན་པར་བྱེད་དེ། ལུས་དང་སྲོག་དང་ཡང་བསྔོས་ནས་དགོན་པ་དང་། ནགས་ཁྲོད་དང་། བས་མཐའི་གནས་མལ་སྟེན་ཅིང་རྙེད་པ་དང་། བཀུར་སྟི་མི་འདོད་པར་འགྱུར་ཏེ། རྟག་ཏུ་བརྩོན་ཞིང་རབ་ཏུ་བརྩོན་ལ། སེམས་ཅན་གྱི་སྤྱོད་པ་ལ་འཇུག་པ་ལ་མཁས་པ། གསང་སྔགས་དང་བསྟན་བཅོས་ལ་མཁས་པ། མགོ་སྨོས་པས་གོ་བ། ལྷག་མཐོང་ལ་མཁས་པ། སྤོབས་པ་ཆགས་པ་མེད་པ་དག་ཏུ་འགྱུར་རོ། །གཟུངས་མི་ཟད་པ་ཐོབ་པ་དེ་དག་སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་རླབས་ཀྱིས་འཁོར་བཞི་པོ་དག་ལ་ཆོས་སྟོན་ཅིང་དེ་བཞིན་གཤེགས་པས་གསུངས་པ་མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པའི་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་། གཏན་ལ་བབ་པར་བསྟན་པའི་སྡེའི་མདོ་དག་ལ་སྤོབས་པར་འགྱུར་རོ། །དེར་བྱང་ཆུབ་སེམས་དཔའ་ཐབས་ལ་མཁས་པ་ཉི་ཤུ་པོ་གང་ཡིན་པ་དེ་དག་སློབ་དཔོན་གྱི་ལུང་རྗོད་ཅིང་མཁན་པོའི་ལུང་རྗོད་པར་འགྱུར་ཏེ། སློབ་དཔོན་ཆེ་གེ་མོ་ཞིག་དང་། མཁན་པོ་ཆེ་གེ་མོ་ཞིག་ལས་ཆོས་ཀྱི་རྣམ་གྲངས་འདི་བདག་གིས་ཀུན་ཆུབ་པར་བྱས་སོ་ཞེས་རྗོད་ཅིང་སྐྱེས་བུ་དམ་པ་དེ་དག་གི་སེམས་ཀུན་ནས་དཀྲིས་ཏེ་འཇུག་པར་མི་འགྱུར་རོ། །དེར་བྱང་ཆུབ་སེམས་དཔའ་ཐབས་ལ་མི་མཁས་པ་འབྱུང་བར་འགྱུར་བ་གང་ཡིན་པ་དེ་དག་ནི་དགེ་བ་སྤྱོམས་པས་གནས་ཤིང་སྤོབས་པས་དེ་ལ་མི་ལྟ་བར་སྐྱེ་བོ་མང་པོ་དག་ཤེས་པར་བྱེད་དེ། དེ་དག་གིས་དམ་པའི་ཆོས་འཛིན་པར་མི་འགྱུར་རོ།