Degé Kangyur volume 43, F.136.b

སྨན་དང་། ཡོ་བྱད་ཀྱི་ཕྱིར་གཞན་དག་ལ་ཆོས་སྟོན་པར་འགྱུར་རོ་བྱམས་པ་འདི་ལྟ་སྟེ། དཔེར་ན་མི་ལ་ལ་ཞིག་ལ་ཁྱི་རོ་འམ། མི་རོ་འམ། སྤྲེའུ་འི་རོ་ཡང་རུང་སྟེ། ཤི་བ་རུལ་བ་མནམ་པོ་ཞིག་མགུལ་པར་བཏགས་ན་གཙང་སྦྲ་འདོད་པའི་ཕྱིར་ངོ་ཚ་ཞིང་མི་དགའ་ལ་ཡོངས་སུ་སྤོང་བར་བྱེད་དོ། །​དེ་བཞིན་དུ་དེ་དག་ཟང་ཟིང་མེད་པའི་ཆོས་ཀྱི་སྦྱིན་པས་ངོ་ཚ་ཞིང་མི་དགའ་བར་བྱེད་དེ། མནོག་མེད་པར་ཤེས་ནས་སྐྱོ་སྟེ་འདོར་ཞིང་འགྲོ་བར་འགྱུར་རོ། །​གང་གི་ཕྱིར་བདག་ཅག་ལ་གོས་དང་ཟས་མི་སྦྱིན་པར་སེམས་པས་ན་བདག་ཅག་གི་ཆོས་ཀྱི་སྦྱིན་པ་ནི་དོན་མེད་པ་ཡིན་ཏེ། བདག་ཅག་ནི་འདི་ན་དོན་མེད་པར་མི་དགའ་ཞིང་འདུག་གོ་ཞེས་ཟེར་ནས་དེ་དག་ལུས་བརྒྱན་པ་ཆེད་ཆེར་བྱ་བའི་ཕྱིར་སློབ་མ་སྡུད་པར་བྱེད་ཀྱི། སེམས་ཅན་བསྡུ་བ་ཆེད་ཆེར་བྱ་བའི་ཕྱིར་ནི་མ་ཡིན་ནོ། །​དེ་དག་འདི་སྐད་དུ་བདག་ཅག་ནི་སྙིང་བརྩེ་བས་འཁོར་སྡུད་པར་བྱེད་ཀྱི་བདག་ཅག་ལ་ནི་བསྙེན་བཀུར་བྱེད་པ་ཅི་ཡང་དགོས་པ་མེད་དོ། །​བདག་ཅག་ནི་ཕན་པའི་དངོས་པོས་སེམས་ཅན་ཡོངས་སུ་སྨིན་པར་བྱ་བའི་ཕྱིར་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་དག་ཏུ་འགྲོ་བར་ཟད་དོ་ཞེས་སྐྱེ་བོ་མང་པོ་དག་ཤེས་པར་བྱེད་དེ། དེ་དག་གི་སེམས་ནི་གོས་དང་ཟས་ལ་སོང་བར་འགྱུར་རོ། །​བྱམས་པ་ད་ནི་སེམས་ཟང་ཟིང་དང་བཅས་པ་ལ་སེམས་ཅན་ཡོངས་སུ་སྨིན་པར་བྱེད་པ་ཞེས་མི་སྨྲའོ། །​དེ་ཅིའི་ཕྱིར་ཞེ་ན། དེ་ནི་བདག་ཉིད་ཀྱང་ཡོངས་སུ་མ་སྨིན་ན་སེམས་ཅན་རྣམས་ཡོངས་སུ་སྨིན་པར་བྱེད་པ་ལྟ་ཅི་སྨོས་ཏེ། གནས་འདི་ནི་ཐོབ་པར་སླ་བའི་ངོ་བོ་མ་ཡིན་པའི་ཕྱིར་རོ། །​བྱམས་པ་ང་ནི་བསྙེན་བཀུར་ལྷུར་ལེན་ཅིང་ལུས་ཀྱི་བསྙེན་བཀུར་གྱི་བདེ་བའི་སྦག་པས་སྦགས་པར་གྱུར་པ་ལ་ཕན་པའི་དངོས་པོ་ཉིད་དུ་མི་སྨྲའོ། །​དེ་ཅིའི་ཕྱིར་ཞེ་ན། དེ་ནི་ལུས་ལ་བདེ་བར་བསྙེན་བཀུར་བྱ་བའི་ཕྱིར་འཁོར་སྡུད་པར་ཟད་ཀྱི། ནན་ཏན་དུ་སྒྲུབ་པ་ལ་གནས་པའི་ཕྱིར་ནི་མ་ཡིན་པའི་ཕྱིར་རོ། །​བྱམས་པ་ང་ནི་ཚུལ་འཆོས་པ་ལ་དགོན་པ་ན་གནས་པ་ཞེས་མི་སྨྲའོ། །



The English translation of this folio by 84000 Translating the words of the Buddha can be found at:
https://read.84000.co/translation/toh69.html?part=UT22084-043-006-421#UT22084-043-006-421