དགེ་སློང་གི་དངོས་པོ་ལ་རབ་ཏུ་བཀོད་དོ། །འོད་སྲུང་དེ་ནས་རྒྱལ་པོ་མུ་ཁྱུད་ཀྱིས་བུ་ཐུ་བོ་རྒྱལ་སྲིད་ལ་བཞག་པ་གང་ཡིན་པ་དེ་ཡང་ཞག་བདུན་འདས་པ་དང་། གཅིག་པུ་དབེན་པར་སོང་ནས་འདུ་ཤེས་ཀྱི་རྣམ་པར་རྟོག་པ་འདི་ལྟ་བུ་འདི་སྐྱེས་ཏེ། བདག་ལ་རྒྱལ་སྲིད་ཀྱིས་ཅི་བྱ། དབང་ཕྱུག་གིས་ཀྱང་ཅི་བྱ་སྟེ། བདག་འདོད་པ་ལྷུར་ལེན་ཅིང་འདོད་པའི་འཆིང་བས་བཅིངས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྤང་བར་ནི་མི་བྱའོ་སྙམ་ནས་དེས་དེའི་མདོ་ལ་རབ་ཏུ་འབྱུང་བའི་སེམས་ཆེན་པོ་བསྐྱེད་དེ། དེ་ཚེས་བཅོ་ལྔ་ཟླ་བ་ཉ་བའི་ཚེ་གླིང་ཆེན་པོ་བཞི་པོ་དག་ཏུ་རྒྱུ་བའི་ཚེ་ན་དེས་ཚིགས་སུ་བཅད་པ་འདི་དག་སྨྲས་སོ། །ཁོ་བོའི་ཕ་མ་ཕུ་ནུ་དང་། །རྩ་ལག་རྣམས་ཀྱང་རབ་འབྱུང་ཕྱིར། །ངེས་པར་བྱུང་སྟེ་ཆོས་དོན་ཕྱིར། །སྲོག་ཆགས་བྱེ་བ་ཐམ་པ་བྱུང་། །ང་ལ་ཁྱིམ་གྱིས་ཅི་བྱ་སྟེ། །བདག་ཀྱང་དེར་ནི་འགྲོ་བར་བྱ། །གལ་ཏེ་ཁྱེད་ཅག་འདོད་གྱུར་ན། །ང་ནི་ཁྱེད་ཀྱི་ཡོངས་འདྲེན་ཏེ། །གང་དག་རབ་ཏུ་འབྱུང་བའི་ཕྱིར། །སེམས་སྐྱེད་བྱེད་པ་དེ་དག་ནི། །ཁོམ་ལྡན་ཤིན་ཏུ་རྙེད་དཀའ་བས། །ང་དང་འགྲོགས་ཏེ་མྱུར་དུ་འདོང་། །གང་དག་ཁྱིམ་ནས་ཁྱིམ་མེད་པར། །རབ་འབྱུང་སེམས་སྐྱེད་མི་བྱེད་པ། །དེ་དག་བདེན་ཆོས་གནས་གྱིས་ལ། །ཁྱིམ་ནི་ལེགས་པར་བསྲུང་གྱིས་ཤིག །འོད་སྲུང་དེ་ལྟར་རྒྱལ་བུ་གཞོན་ནུ་དེས་ཚིགས་སུ་བཅད་པ་དེ་དག་སྨྲས་པ་ན། གླིང་ཆེན་པོ་བཞི་པོ་དེ་དག་ནས་གང་ཁྱིམ་ན་གནས་པ་ལ་སེམས་དགའ་བའི་སེམས་ཅན་ནི་གཅིག་ཀྱང་བྱུང་བར་མ་གྱུར་ཏེ། ཐམས་ཅད་རབ་ཏུ་བྱུང་བའི་སེམས་དང་ལྡན་ཞིང་རབ་ཏུ་འབྱུང་བ་ལ་གཞོལ་བ་དང་། མངོན་པར་འབྱུང་བའི་བསམ་པ་དང་ཆས་ཏེ་གནས་པར་གྱུར་ཏོ། །འོད་སྲུང་དེ་ནས་དེ་བཞིན་གཤེགས་པ་མེ་ཏོག་སྣ་ཚོགས་དེས་སེམས་ཅན་དེ་དག་ཐམས་ཅད་ཀྱི་ལྷག་པའི་བསམ་པ་ཐུགས་སུ་ཆུད་ནས་གླིང་བཞི་པའི་འཇིག་རྟེན་གྱི་ཁམས་ཐམས་ཅད་ཀྱི་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་ཐམས་ཅད་དུ་དེ་བཞིན་གཤེགས་པ་དགེ་སློང་གི་དགེ་འདུན་གྱི་འཁོར་དང་བཅས་པ་དག་སྤྲུལ་པ་མཛད་དོ།