བཏུང་བ་རྙེད་པའི་ཁྱིམ་དེ་དག་མངོན་པར་དད་པར་བྱས་ཤིང་དགེ་སློང་གཞན་དག་གི་ཉེ་བར་འཚོ་བར་བྱས་ནས། དེ་དག་ཏུ་ལན་གཉིས་སུ་འཇུག་པར་མི་བྱེད་པ་དང་། འཇུངས་པ་དང་། མ་དད་པ་དང་། ལོག་པར་ལྟ་བ་དང་ལྡན་པའི་ཁྱིམ་གང་དག་ཡིན་པ་དེ་དག་དད་པར་བྱེད་ཅིང་དེ་དག་ཁྲོ་ཞིང་གཤེ་ན་ཡང་ཡོངས་སུ་གདུང་བར་མི་འགྱུར་ཞིང་ཡིད་མི་བདེ་བར་མི་འགྱུར་བའི་ཕན་པའི་དངོས་པོ་ཉིད་དང་། ལྷག་པའི་བསམ་པ་ཉིད་དང་། འདོད་པ་ཆུང་བ་ཉིད་དང་། ཆོག་ཤེས་པ་ཉིད་དང་། དེས་པ་ཉིད་དང་། སྙིང་རྗེ་དང་ལྡན་པ་ཉིད་ལ་ལྟོས། བྱམས་པ་དེ་ལྟར་ན་སྔོན་གྱི་བྱང་ཆུབ་སེམས་དཔའ་རྣམས་ནི་ཁྱིམ་བདག་དད་པར་བྱས་ཤིང་གཞན་གྱི་ཉེ་བར་འཚོ་བར་བྱེད་ཀྱི། བདག་ཉིད་ཀྱི་ཆོས་གོས་དང་། བསོད་སྙོམས་ཀྱི་དོན་དུ་བྱེད་པ་ནི་མ་ཡིན་ནོ། །བྱམས་པ་དེའི་ཚེ་དེའི་དུས་ན་བྱང་ཆུབ་སེམས་དཔའ་བརྩོན་འགྲུས་མོས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་ཡིད་གཉིས་དང་། ཐེ་ཚོམ་ཟ་བར་གྱུར་ན་ཁྱོད་ཀྱིས་དེ་ལྟར་མི་བལྟ་སྟེ། ང་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་བརྩོན་འགྲུས་མོས་ཞེས་བྱ་བར་གྱུར་ཏོ། །བྱམས་པ་དེ་ལྟ་བས་ན་བྱང་ཆུབ་སེམས་དཔའ་ཁྱིམ་རྣམས་སུ་འགྲོ་བར་འདོད་པས་ནི་བྱང་ཆུབ་སེམས་དཔའ་བརྩོན་འགྲུས་མོས་དེའི་རྗེས་སུ་བསླབ་པར་བྱ། དེ་ལས་གཞན་པའི་བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་དག་གི་རྗེས་སུ་ཡང་བསླབ་པར་བྱ་ཞིང་དེ་དག་གི་ཆོས་ཀུན་དུ་སྤྱད་པར་ཡང་བྱའོ།། །།བམ་པོ་གཉིས་པ། བྱམས་པ་ཡང་ཕྱི་མའི་ཚེ་ཕྱི་མའི་དུས་ན་ལྔ་བརྒྱ་པ་ཐ་མ་ལ་བྱང་ཆུབ་སེམས་དཔར་ཁས་འཆེ་བའི་དགེ་སློང་ཁ་ཅིག་འབྱུང་བར་འགྱུར་ཏེ། དེ་དག་ནི་འདི་ལྟ་སྟེ། རྙེད་པ་དང་། ཆོས་གོས་དང་། བསོད་སྙོམས་ཀྱི་དོན་དུ་ཁྱིམ་རྣམས་སུ་འགྲོ་བར་འགྱུར་གྱི། ཁྱིམ་པ་རྣམས་དད་པ་ལ་དགོད་པའི་ཕྱིར་ནི་མ་ཡིན་ནོ། །དེ་དག་ནི་གཅིག་ལ་གཅིག་བསྔགས་པ་མ་ཡིན་པ་བརྗོད་པ་དང་། འབྱེད་པ་དང་། རྩོད་པའི་རང་བཞིན་ཅན་དུ་འགྱུར་རོ། །དེ་དག་ནི་ཇི་ལྟར་གཞན་དག་གིས་མ་རྙེད་པས་ཡི་རངས་པར་འགྱུར་བ་ལྟར་བདག་ཉིད་ཀྱིས་རྙེད་པས་ནི་དེ་ལྟ་མ་ཡིན་ལ། ཇི་ལྟར་གཞན་དག་གིས་རྙེད་པས་ཡིད་མི་བདེ་བར་འགྱུར་བ་ལྟར་བདག་ཉིད་ཀྱིས་མ་རྙེད་པས་ནི་དེ་ལྟ་མ་ཡིན་ནོ།